Manipud Managbasatayo
Mapukpukaw nga Ubbing Apaman a nabasak dagiti serye ti artikulo a “Mapukpukaw nga Ubbing—Kaanonto nga Agpatingga ti Trahedia?” (Pebrero 8, 1995), nagarubos ti lua iti rupak. Mayasping iti kapadasak ti dadduma kadagiti naisalaysay a kapadasan iti artikulo. Agyamanak ken ni Jehova iti panangpabilegna kaniak nga agibtur. Babaen iti Saona, naaddaanak iti namnama iti paraiso a sadiay dinton agsagaba ti tattao iti kasta a kinadangkok.
T. O., Brazil
Hapones a Balud Naparegtaak iti nabasak nga artikulo nga “‘Inruar ti Bomba Atomika Idiay Pagbaludan’ ni Tatangko.” (Oktubre 8, 1994) Nabiit pay a nabautisaranak kas maysa a Kristiano, ket masansan a pampanunotek no mataginayonko ti kinatarnawko iti sidong ti pakasuotan. Naabbukay unay ti riknak bayat a binasak ti kas bato a pammati ni Kabsat Katsuo Miura. Daytat’ timmulong kaniak a mangamiris no ania ti kurang iti pammatik—a nasken a pagbalinek ni Jehova a Dios a gubuayan ti panagtalekko.
K. T., Japan
Genetiko Napagsasaritaanmi ti genetic code idiay eskuelaan. Isu a ginundawayak nga iragpin ti magasin a natemaan iti “Genetiko ti Tao—No Ania ti Mangbukel ‘Kenka’” (Marso 22, 1995) iti exercise book-ko. Inusigmi a dua ken ni maestrak iti science ti artikulo. Imbagana a nupay isut’ maysa a biologo ken inadalna ti DNA iti adun a tawen, dayawenna ti kinauneg ti material.
P. N., Italia
Impakita dagiti artikulo no kasano a mailawlawag kadagiti maawatan a termino ti komplikado a tema. Dayta ti timmulong kaniak nga ad-adda a nakatarus iti material nga ad-adalek iti klasemi iti biology. Nupay kasta, diak mabalin nga usaren dagiti nakotar iti artikulo, tangay saanyo nga impakaammo dagiti reperensia kas iti autor ken ti nangipablaak.
M. G., Alemania
Tangay limitado ti espasio, kadawyanna a saanmi nga ipablaak ti listaan dagiti sekular a reperensia a kas iti masansan a maar-aramid kadagiti teknikal ken nasientipikuan a pagiwarnak. Tangay naisurat ti “Agriingkayo!” agpaay ti kaaduan iti publiko, saan la a kadagiti propesional, ti panagkunami, sumagmamano laeng a managbasa ti aginteres iti kasta a bibliograpiko nga impormasion.—ED.
Homoseksualidad Agserserbiak a kas ministerial nga adipen ken payunir, maysa nga amin-tiempo a managebanghelio. Kasla naisurat nga agpaay kaniak dagiti artikulo ti “Agimtuod Dagiti Agtutubo . . .” maipapan iti homoseksualidad! (Pebrero 8, Pebrero 22, ken Marso 22, 1995) Idi karugrugi agingga iti ngalay ti kinatin-edyerko, nageksperimentoak iti homoseksualidad. Insardengkon, ngem sipud idi, narigatanakon a nangparukma kadagitoy a rikna. Babaen kadagitoy nga artikulo, nupay kasta, naawatak met laengen ti rikriknak, ket nakaawatak iti tulong tapno maitultuloyko ti makidangadang!
Impailimedna ti naganna, Denmark
Adda homoseksual a rikriknak sipud pay bimmaroak. Napadakkelak kas maysa a Kristiano, isu a talaga a nangburibor kaniak dagitoy a rikna. Maigapu ta mabain ken maburiboranak, pulos nga awan ti nagipudnuak, uray pay kadagiti nagannakko. Kasadoakon iti nagpintas a babai, ngem pasaray sumken pay la ti dakes a riknak. Kamaudiananna, imbagak ken baketko ti sekretok, ket pinaregtanak a makisarita kadagiti panglakayen iti kongregasion. Mannakaawat ken manangandingayda unay. No adda man makunak iti asinoman a makidangdangadang kadagitoy a rikna, isu daytoy: Dikay ilimlimed dayta. Ibagayo dayta iti asawayo, nagannakyo, panglakayen, wenno mapagpiaran a gayyem—ngem diyo ing-ingpen dayta.
Impailimedna ti naganna, Estados Unidos
Manipud kinaubing, nagsagabaak iti seksual a panangabuso. Awan ayat wenno panangipateg a naipakita kaniak. Nakiramanak iti homoseksualidad, ngem no ammo la koma dagiti agtutubo ti bain, sakit ti nakem, kinaliday, ken pannakapaay nga ibunga ti homoseksual a rikrikna, idianda la ketdi ida. Adu ti mangliklik a pagsasaritaan daytoy a tema, ngem silalawag nga imbuksilanyo dayta. Naimpusuan unay ti panagyamanko iti panangipablaakyo kadagita a tema.
Impailimedna ti naganna, Brazil