Adda Aya Asinoman a Mapagtalkan?
“Isut’ maysa kadagiti sumagmamano a tattao a saan a kameng ti pamilia a naan-anay a pagtalkan dagiti dadakkelko. . . . Imparangarangna ti bagina a naimbag ken maseknan a tao a saanto a pulos a mangaramid iti aniaman a mangdangran kadakami. . . . Isut’ maysa kadagiti sumagmamano a tattao iti biagko a nalawag a pagtalkak.”
KASTA ti panangiladawan ti maysa nga agtutubo a babai iti panagtalekna iti doktor ti pamiliana. Nakalkaldaang ta, dakes ti nagtungpalan dayta a panagtalek. Nanipud idi isut’ agtawen iti 16, daytoy a doktor ti seksual a nangabuso kenkuana. “Nagulbod kaniak ken inallilawnak,” imbagana kadagiti autoridad iti korte a nangipaay idin iti kinahustisia.—The Toronto Star.
Nadadael ti Panagtalek iti Sadinoman
Ti panagtalek, kas napintas ngem narasi a sabong, nalaka laeng a maparut ken mabaddekan. Mailupek dayta iti sadinoman! Kinuna ni Michael Gaine, sekretario idi ti maysa a kardinal ken maysa nga arsobispo idiay Inglaterra: “Adda idi tiempo nga isuamin agtalek iti padi. Italek idi dagiti pamilia ti annakda iti panangaywanna. Diak inanamaen dayta itan. Napukawen kadatayo dayta a panagtalek iti agnanayon.”—The Guardian Weekend.
Kusiten dagiti negosiante ti kakompetensiada. Allilawen ken gundawayan dagiti nasikap a managanunsio dagiti sukida. Maysa nga awanan asi nga opisial ti nangbusbos iti pondo ti kompaniana a para iti pension, a nangikkat kadagiti empleadona iti kuarta a pondoda. Kanayon a takawan dagiti empleado ti amoda. Kinuna ti maysa a report, kas pagarigan, a “mapukaw dagiti negosio ti Canada ti napattapatta a $20 bilion iti tinawen kadagiti panagtakaw dagiti empleado a mismo.”—Canadian Business.
Addada met politiko a mapagtalkan. Ngem dagiti report kas iti sumaganad ti mangpasiddaaw iti sumagmamano laeng a tattao: “Dua a lawas kalpasan ti asasinasion ti maysa a mapagsusupiatan unay a politiko a babai iti Francia, in-inuten nga ibutbutaktak ti polis ti panangallilaw iti politika ken ti kriminal a panagkukumplot a nabayagen a nangabbong iti negosio ti gobierno iti kosta ti Mediteraneo.”—The Sunday Times, London.
Masansan a marbek ti panagtalek kadagiti nasinged a relasion. Dagiti assawa a lallaki ken babbai saanda a matalek iti sekso kadagiti assawada. Abusuen dagiti nagannak ti annak. Allilawen dagiti annak ti nagannak. Idi nalukatan dagiti archives ti Stasi, ti secret police ti dati nga Akindaya nga Alemania, impalgakda ti “managpanuynoy a sistema ti kinakusit” dagiti tattao a naibilang a gagayyem. Iti agkakanat a panangliput, kuna ti maysa a report, “nakagteng iti kuarto a pageskuelaan, iti pulpito, iti kuarto a pagturogan, uray iti pagkompesaran, dagiti gamat ti Stasi.”—Time.
Idiay Ireland nagsurat ti maysa a kolumnista: “Nagulbodandatayo, inallilawdatayo ken inusar ken inabuso ken imbabaindatayo dagidiay insaadtayo iti pannakabalin.” (The Kerryman) Agsipud ta masansan a naliputanda, adu a tattao ti di agtalek iti asinoman. Ania ti maaramidantayo tapno maipanamnama a naimbag ti pagtalkantayo? Usigen dagiti sumaganad a dua nga artikulo daytoy a saludsod.