Ti Colosseum ken Padto ti Biblia

BABAEN TI KORESPONSAL TI AGRIINGKAYO! IDIAY ITALIA

MAYSA a kadaanan a surat a nasarakan idiay Colosseum iti Roma, Italia, mabalin a saan a direkta a patalgedanna ti padto ti Biblia maipapan iti pasdek ti Jerusalem. Ti surat nalawag nga adda pakainaiganna iti pannakaibangon ken ti inagurasion ti Colosseum idi 80 K.P. Kas panangisurat manen ni Propesor Géza Alföldy iti University of Heidelberg, Alemania, mabasa ti surat: “Ni Emperador Titus Vespasian Caesar Augustus impaibangonna ti baro nga amphitheater babaen ti intero a gatad ti samsam.” Ania a samsam?

“Sarsaritaenmi ti maipapan iti dakkel a gatad ti samsam nga innala ni Titus iti pannakigubatna a maibusor kadagiti Judio,” kuna ni Alföldy, “ken nangnangruna, dagiti balitok nga alikamen” iti templo idiay Jerusalem. Daytoy a templo nadadael kas kaitungpalan ti padto ni Jesus. (Mateo 24:1, 2; Lucas 21:5, 6) Kuna ni Alföldy a ti Colosseum​—agraman ti nalatak nga Arch of Titus, a mangiladawan kadagiti nagballigi a Romano a nagawit kadagiti samsam a naalada iti gubat a Judio​—ti mangpasingked iti daytoy a historiko a balligi dagiti Romano.