Manipud Managbasatayo
Pannaturog Pagyamanan iti artikulo a “No Apay Agkasapulan ti Bagiyo iti Turog.” (Hunio 8, 1995) Makunak a linawlawaganna ti panunotko. Kas estudiante iti medisina, agkurangak iti adu a napapateg nga oras ti pannaturog tapno mairingpasko dagiti leksionko. Sagsagabaek ti sumagmamano kadagiti epekto a nadakamat iti artikulo. Ikagumaakto ti maaddaan iti nasayaat a padron ti pannaturog.
L. H., Trinidad
Dagiti Apong Uray la nakaluaak gapu iti rag-o idi nabasak dagiti serye ti magasin nga “Apresiarenyo Aya Dagiti Apongyo?” (Hulio 8, 1995) Diak makatunosan dagiti nakaikamangak, isu a dimteng ti artikuloyo iti umiso a tiempo. Impaamirisna kaniak a diak ipakpakita kadakuada ti umiso a panagraem a pakaikarianda. Inaramidkon dagiti maitutop a panagbalbaliw, ket naragragsakkam itan.
A. T., Canada
Idi impanmi ni tatangko iti maysa a nursing home, inkeddengmi a sarungkaran mamitlo iti kada lawas. Natungpalmi dayta a kari iti unos ti dua a tawen. Nagpateg unay kenkuana ti inaldaw a babassit a damag idiay balay! Kasapulan ti determinasion tapno agtultuloy daytoy a rutina, ngem magunggonaan dagiti appoko agraman dagiti apong.
P. L., Estados Unidos
Kas maysa a Katoliko, naibuyogak iti kinapudno a saan nga ipamaysa dagiti artikulo ti kredo wenno relihion no di ket awan dasdasiganna. Situtured nga inlawlawagyo ti maysa nga annongen a talaga a din maikankano.
A. B., Costa Rica
Trahedia ti Pamilia Nakaluaak a nangbasa iti artikulo nga “Agyamanak iti Panangyawidmo Kaniak, Nanang.” (Hulio 8, 1995) Napukawko met ni lakayko iti aksidente idi 1982. Nabatiak a pilay—nga addaan innem nga annak ken ina nga aywanan. Ti panangbasak iti artikulo kayariganna ti panangbasak iti bukodko a pakasaritaan. Ni Jehova ti mangmangted kadakami iti tured nga agtultuloy.
C. R., Estados Unidos
Talaga nga inapektarannak daytoy a pakasaritaan. Agtawenak iti 16, ket sangkapanunotko no kasanot’ panangsarangetko no rumsua dagita a parikut. Ti kapadasan ni Todd ti timmulong kaniak a mangapresiar a kanayon nga adda sadiay ni Jehova a tumulong kadatayo la ketdi no agtalektayo kenkuana.
N. F., Dominica
Nagsayaat ti pannakaisalaysay ti pakasaritaan nga uray la dandani nakasangitak. Nagbassit nga amang dagiti pakaupayak no idilig kadagiti pakasuotan ti pamilia Boddy. Nupay nagduma ti kasasaadmi, ti pannakaimatang no kasano a tultulongan ida ni Jehova ti timmulong kaniak nga agregget nga agtultuloy.
V. S., Pilipinas
Ni lakayko iti 33 a tawen, maysa a matalek a Saksi nga adun a tawen a nagserbi kas panglakayen, ti addaan iti Pick’s disease—napaut, nakaro a sakit a mamagsagaba unay iti biktima ken iti pamiliana. Kasta unay ti pannakaibuyogko iti bileg ni Mrs. Boddy agpapan pay iti pannakapukawna ken ni lakayna, agraman ti adu a tawen ti maseknan, naipamaysa a panangtaripatona iti anakna. Sapay koma ta isu ken ti annakna ti bendisionan ni Jehova.
E. N., Estados Unidos
Nabangsit a Sang-aw Masapul nga agyamanak kadakayo iti makaisuro nga artikulo nga “Ania ti Maaramidanyo iti Nabangsit a Sang-aw?” (Hulio 8, 1995) Problemak idi dayta! Agpayso a maldaangka no nabangsit ti sang-awmo. Naminduan a napanak iti dentista, ngem adda pay la ti angot. Inyaplikarkon dagiti singasing ti artikulo, ket agkurkurrida. Pangngaasiyo ta itultuloyyo a tulongan dagiti tattao iti intero a globo.
R. O. I., Nigeria
Costa Rica Simmangpet ti artikulo a “Costa Rica—Bassit a Pagilian, Adu a Nagdudumaan” (Hulio 8, 1995) sumagmamano nga aldaw sakbay unay ti biahek; intugotko dayta kas reperensia. Talaga a lugar a napno iti pagsidsiddaawan ken ragsak! Iti amin a napananmi, umisem ken agpayapay dagiti tattao kadakami. Darepdepenyo man laengen ti baro a lubong inton nainggayyeman ti tunggal maysa iti amin a lugar!
T. N., Estados Unidos