Impalubos ti Dios ti Pannakasarakmi Kenkuana

IDI sisasaganan ni Ari David a mangyawat ti kinaari iti barona a ni Solomon, intedna kenkuana daytoy a balakad: “Ammuem ti Dios ni Amam ken agserbika kenkuana a buyogen ti naan-anay a puso ken ti naragsak a kararua; ta sukimaten ni Jehova dagiti amin a puso, ken dagiti amin a pagannayasan ti panunot. No isu sapulem, ipalubosnanto ti pannakasarakmo kenkuana; ngem no isu panawam, iwaksinakanto iti agnanayon.”​—1 Cronicas 28:9.

Naammuanmi a pudno daytoy kadakami. Sinapulmi ti Dios, ket talaga a nasarakanmi​—ngem idi laeng naisiasikamin iti adu nga ulbod a dalan. Patienmi nga ammo ni Jehova no kasano kabileg ti pannakaisentro dagiti pagannayasan ti panunotmi kenkuana ken iti serbisiona, ket impalubosna ti pannakasarakmi kenkuana. Adtoy ti pakasaritaan no kasano a napasamak dayta.

Uppatkami nga agkakabsat a lallaki, a napadakkel idiay Florida, E.U.A. Nagtrabaho ni tatangmi iti napaut nga oras kas kosinero tapno suportaran ti pamilia, ni nanang ti agtagibalay, ket dakami nga uppat a lallaki ti nakapagtrabaho a para arbas ti ruot, agitulod iti periodiko​—aniaman a mabalin a mangnayon iti birok ti pamilia. Katoliko ni Nanang, ket Baptist ni Tatang. Mamatikam amin iti Dios ken iti Biblia ngem awan ti ar-aramidenmi maipapan iti dayta, ket manmano a makimisakami. Kattapog idi ti 1970’s, natalna pay la idi, uso ti bell-bottom a pantalon, atiddog a buok, ken musika a rock. Amin daytoy ti nangapektar iti biagmi.

Idi laeng 1982 a dua kadakami, ni Scott ken ni Steve​—24 ken 17 ti tawenmi idi​—ti naaddaan iti napinget nga interes iti Biblia ket kimmaro ti pannakaseknanmi iti dumakdakes a kasasaad ti lubong. Adda bukod a negosio ni Scott a konstruksion. Dakkel ti ganansia, isu nga immakarkami a nagkadua iti maysa nga apartment. Dikam maragsakanen nga agnaed kadagiti kuarto ti bar ken dayta a kasasaad ti biag ket ammomi nga adda nasaysayaat ken makaay-ayo a pamay-an ti biag iti sabali a lugar. Nangrugin nga agbisinkami kadagiti naespirituan a bambanag. Tinulongannakami ti kanayon a panagbasa iti Bibliami tapno agtarigagay iti ad-adu a pannakaammo ken pannakaawat iti Sao ti Dios.

Rinugianmin ti mapan iti nadumaduma a simbaan no Domingo. Kadagiti napananmi iti asideg ti pagtaenganmi idiay Lake Worth, Florida, agpalawag ti ministro iti 25 minuto maipapan iti panangited ti kuarta iti sermonna iti Domingo. “Mangtedkayo a sipaparabur, mangtedkayo a sibubuslon,” kuna ti ministro bayat ti panagsammakedna iti podium. Masansan nga ipasada ti plato a pagkolekta ti kuarta iti mamitlo a daras iti maminsan a panaggigimong, a nagbanag nga adu ti awanton a pulos ti nagyan ti bulsada inton agawidda. Napankami iti adu a simbaan, ngem nasarakanmi laeng ti ad-adu a plato a pagkolekta a naipasa ken dagiti sosial a panagtitipon.

Napakdaarankami Maipapan Kadagiti Saksi ni Jehova

Pudno a nadoktrinaankami iti pagarupenmi a kangrunaan a pannursuro ti Biblia, ket inawatmi ida gapu ta propesional a teologo dagiti mannursuro. Maysa kadagiti klase ti maipapan kadagiti kulto idiay America, ket dagiti Saksi ni Jehova ti umuna iti listaan. Napakdaarankami a dida patien ni Jesus, nga addaanda iti bukodda a Biblia, a saanda a mapan idiay langit, ken patienda nga awan ti impierno. Amin daytoy, siempre, ti nangiturong kadakami a nangikuna a biddut dagiti Saksi.

Idin, bimmileg ti reggetmi ngem saan a maitunos iti umiso a pannakaammo. (Roma 10:2) Ammomi ti kinuna ni Jesus idiay Mateo 28:19, 20​—masapul nga ikasabami ti naimbag a damag ken agaramid kadagiti adalan. Idi a tiempo tumabtabunokami iti 2,000-miembrona nga iglesia a naawagan Bible Town, a sadiay pasetnakami ti maysa a grupo dagiti agtutubo nga agarup 100 nga agtawen iti baet ti 17 ken 30. Pinadas ni Scott nga allukoyen ida iti maysa a kita ti panangasaba​—ngem di nagballigi.

Gapuna rinugianmi ti bukodmi a kampania a panangasaba. Napanunot ni Scott a mangipasdek ti paglakuan idiay flea market iti dayta a lugar ken agited kadagiti tract ken Biblia. Isu a kasta ti inaramidmi. Napankami iti maysa a lokal a “Kristiano” a paglakuan iti libro ket gimmatangkami iti adu a supply ti tract ken Biblia, napankami idiay flea market, nangipasdekkami iti dua a tukod a pangiparabawanmi iti plywood tapno adda lamisaan, imparabawmi dagiti tract ken Bibliami kadakuada, ket pinadasmi ti agbalin a “managtungpal iti sao, ket saan a managdengngeg laeng.”​—Santiago 1:22.

Bayat a limmabas ti tunggal lawas, dimmakkel ti makuna a ministerio iti flea market, ket nakaipaimakami kadagiti Ingles agraman Español a literatura. Kasta met, addaankami kadagiti Biblia, 30 a nagduduma a kita ti tract, ken uray dagiti pin ti kallugong a nasuratan iti “Ay-ayatennakayo ti Dios.” Di nagbayag kalpasanna, gimmatang ni Scott iti decal machine tapno agimaldit iti babassit a mensahe ti Biblia kadagiti T-shirt​—nga agkunkuna ti: “Nabasayo kadin ti Bibliayo ita?,” “Napanunotyo kadin no apay nga umis-isemak? Adda ni Jesus iti pusok,” ken adu pay. Namalditan ti maysa iti “Apocalipsis” nga addaan ti ladawan ti uppat a kumakabayo.

Impagarupmi a no isuotmi dagiti T-shirt iti amin a lugar, mangipapaaykami iti naulimek a panangsaksi. Tunggal Sabado ken Domingo, manipud alas 8 t.b. agingga iti ala 1 t.m., makita ti maysa ti ministeriomi iti flea market. No agpaspasiarkayo iti paradaan ket nakitayo dagiti tract kadagiti kotse​—bueno, dakami ti nangikabil kadagidiay. Amin dagiti literatura maipaay babaen iti donasion, nupay nagbassit ti kuarta a simrek. Iti makatawen ginupgopmi ti gastos iti tawen, ket nagdagup iti nasurok a $10,000.

Naam-ammomi ti Maysa Kadagiti Saksi ni Jehova

Naminsan, idi aglanglangoykami iti maysa kadagiti aplaya idiay Bonita Springs, immasideg kadakami ti maysa a lakay ket imbagana a nakitana dagiti sticker iti bumper ti truck-mi ken nadlawna dagiti T-shirt-mi. Rinugianna ti nagsarita maipapan iti Biblia ken nakirinnason manipud iti Kasuratan. Inruarna ti punto idiay Aramid 2:31, sa nagimtuod: “No adda umap-apuy nga impierno ken no dagiti laeng dakes a tattao ti mapan sadiay, apay ngarud a kuna ti Biblia a ni Jesus adda idi sadiay?” Intuloyna a sinalaysay ti adu a sabali pay a kasuratan. Kamaudiananna, kinuna ni Scott: “Nalabit maysaka kadagiti Saksi ni Jehova.” Simmungbat: “Wen, maysaak.” Kalpasanna, kinuna ni Scott: “Dakayo a tattao dikay mamati ken ni Jesus.” Iti simmaganad a 20 a minuto, insalaysay ti Saksi maipapan ken Jesus, ngem dikam nakombinsir.

Intultuloymi dagiti ministeriomi iti flea market kadagiti ngudot’ lawas. Inar-aramidmi daytoyen iti tallo a tawen​—a patienmi a kanayon nga adda kadakami ti kinapudno ket umiso ti ar-aramidenmi. Sarsarungkaranmi pay laeng dagiti simbaan, maysa-maysa iti tunggal rabii ti Domingo, ket pulos a dikam napnek iti aniaman kadagiti tinabunuanmi. Awanen dagiti iglesia a bisitaenmi, isu a maysa a rabii inkeddengmi ti mapan iti maysa a “kapilia dagiti Saksi ni Jehova,” kas pangawagmi. Kasabaanmi ida maipapan ken Jesus. Nasarakanmi ti direksion iti maysa a telephone directory ket napankami sadiay iti maysa a rabii ti Domingo. Idi naammuanmi nga awan ti gimongda iti rabii ti Domingo a kas iti dadduma a relihion, nagkonklusionkami a talaga a saanda a patien ni Jesus. Nakitami ti panagadal iti libro iti rabii ti Lunes iti karatula a mangipakpakita ti oras ti gimong. Isu a nagsublikami nga awitmi dagiti Bibliami ken nakasuot kadagiti T-shirt-mi. Malagipmi a sumagmamano a minuto ti binusbosmi a nangikeddeng no ania kadagiti T-shirt ti isuotmi​—ania kadagitoy ti mangipaay iti nasayaat a pammaneknek. Nasapakam bassit a simmangpet sadiay, ket immasideg kadakami ti sumagmamano a kakabsat a lallaki. Nabara ken mannakigayyemda. Dagus a nainget ti panagsasaritami maipapan iti Apocalipsis. Kiniddawda nga agtalinaedkami maipaay iti gimong. Intedda kadakami ti libro a Nagkaykaysa iti Panagdayaw, isu a nagtugawkami.a Maysa a kabsat a lalaki ti nanglukat iti panagadal babaen iti kararag.

Sipapasnek nga immimdengkami. Kas pangserra, kinunana: “Iti nagan ni Jesus. Amen.” Nakigtotkami a nagkinnita. “Umiso kadi ti nangngegta kenkuana? Nagkararag iti nagan ni Jesus!” Iti dayta a tiempo kasla naluktan dagiti matami ken natnag dagiti napuskol a siksik. No pudno dagiti pusomi, daytoyen ti tiempo ti panagimdeng. Kiniddaw ti kabsat iti amin a lukatanda ti kapitulo 21 iti libro a Nagkaykaysa iti Panagdayaw, a daytat’ maipapan ken Jesus ken ti saan a panagbalin a paset ti aniaman iti lubong. Awanen ti nasaysayaat pay a panagadal a tinabunuanmi. Daytat’ maipapan iti biag ni Jesus ken ti ministeriona, ti maudi nga al-aldaw, ken neutralidad. Nangngegmi dagiti agtutubo a nagkomento maipapan iti adu a punto a dikam pulos ammo. Kalpasanna manen, iti panagserra ti gimong, nagkararag ti kabsat a lalaki iti nagan ni Jesus!

Napakankami iti Naespirituan

Simrekkami iti hall a mawaw iti kinapudno, ket sadiay ti kinapudno pulos a saan nga adayo. Pagaammomi a pimmanawkami a napakan iti naespirituan, ket pulos a dikamin napan nakimisa. Iti sumaganad a rabii, bayat ti panaglabami iti Laundromat, nadlawmi ti adu a nabunton a magasin a Pagwanawanan ken Agriingkayo! iti abay ti soda machine​—agarup 150 ti bilangda. Idi, pulos a dikam basaen ida, ngem itan binalkutmi ida, agsipud ta interesadokami kadagiti adu a tema.

Maysa kadagiti artikulo inimtuodna, “Mamatikayo kadi iti Trinidad?” Ti sabali, “Pudno kadi nga adda impierno?” Iti maysa nga Agriingkayo! adda artikulo maipapan iti ladladawan. Iti dayta a rabii binasa ni Steve daydiay maipapan iti Trinidad, nangaramid iti adu a panagsukimat, kinitana amin a kasuratan, ket riniingna ni Scott idi alas 12:30 t.b. gapu iti naammuanna. Iti sumaganad nga aldaw, Mierkoles, kalpasan ti trabaho, binasa ni Steve ti artikulo maipapan iti impierno. Inkalinteganna ti Juan 11:11, a sadiay kinuna ni Jesus a naturog ni Lazaro. Idi nakita ni Steve ni Scott, kinunana: “Ti Bibliak dina isuro nga adda umap-apuy nga impierno.” Kalpasan ti panangbasana iti Agriingkayo! maipapan iti ladladawan ken ti nadumaduma a porma ti krus, imbellengmin dagiti ladawan ken krusmi iti trak [ti basura] ket binuyami bayat a naipanaw dayta. Nagkinnitakami, nagtung-edkami [buyogen ti pannakapnek], ken immisem. Ammomi a nasarakanmin ti naisangsangayan unay​—ti kinapudno.

Maysa nga aldaw kalpasanna, simmangpet ti dua a kahon. Naglaonda iti 5,000 a tract nga agkunkuna a no dikay agbabawi, mapankayo idiay impierno. Ammomi itan nga adu kadagitoy a tract ti saan nga umiso sigun iti pannursuro ti Biblia. Gapu ta marirokami bassit, timmabunokami manen iti panagadal ti libro iti rabii ti Lunes ket intugotmi ti adu a tract-mi. Nagimtuodkami, “OK kadi daytoy?” Maysa a rabii sinukimatmi amin ida. Idi agangay, nabuntonen dagiti tract iti suelo; awan uray maysa kadakuada a napaneknekan a maitunos iti pannursuro ti Biblia. Imbellengmi amin ida. Ammomi a ti nasarakanmi a baro a pammatimi kaipapananna ti biagmi ken ti biag dagidiay a kasabaanmi. Tarigagayanmi nga idian tapno makapagadalkami iti Biblia nga awan ti makasingsinga.

Immakarkami idiay Alaska. Iti damo a pannakigimongmi sadiay, kiniddawmi iti maysa a panglakayen no mayadalannakami iti inaldaw. Ammok a nangngeg ti amin a timmabuno ti kiddawmi. Nagsayaat ti panagrang-aymi, ket naturposmi ti libro nga Agbiag nga Agnanayon, ket kayatmi ti agpabautisar iti maysa kadagiti dua-aldaw nga asamblea.b Ngem masapul nga aguraykami bassit. Ti kalatmi isu ti ag-pioneer. Di ninamnama, nagsakit ni tatangmi, ket masapul nga agsublikami idiay Florida a tumulong.

Rimmang-aykami iti Naespirituan a Kinanataengan

Idiay Florida nagsayaat ti irarang-aymi, naturposmi ti libro a Nagkaykaysa iti Panagdayaw, ket kalpasanna nagpabautisarkami idi 1987. Napalabasen ti 11 a bulan nanipud idi nangrugikami. Dagus a nag-auxiliary pioneer-kami iti innem a bulan ket kalpasanna nagbalinkami a regular pioneer. Makatawen laeng ket kagudua kalpasanna, agpadakamin a natudingan a ministerial nga ad-adipen. Dua a tawen kalpasan ti bautismo, addakamin nga agserserbi idiay Brooklyn Bethel, a sadiay agserserbi pay laeng ni Scott ita ket ad-adalenna ti Insik iti dua a tawenen. Agserserbin ni Steve idiay Moscow, Russia, kas regular pioneer. Agpadakami a nakasarak ti kinapudno ket apag-isu ti pannakabirokmi iti dayta kas iti iladawan ti Proverbio 2:1-5: “Anakko no awatemto dagiti saok, ket ipenpenmo kenka dagiti bilinko; iti kasta iyallingagmo ta lapayagmo iti kinasirib, ken ikilingmo ita pusom iti panangilasin; kasta met, no awagam ti pannakaawat a mismo ket idir-im ta timekmo iti panangilasin a mismo, no isu birokem a kas pirak, ken birokem a kas nalmeng a gameng, iti kasta maawatamto ti panagbuteng ken ni Jehova, ken masarakamto ti pannakaammo a mismo iti Dios.”

No Kasano a Nakagteng ni Steve Idiay Moscow

Iti panagnaedko idiay New York, a sadiay ti panangammo iti sabali a pagsasao ti mamagbalin nga ad-adda a makapainteres ti trabaho a panangasaba​—ken ti panangpampanunot a nalabit lukatanto ni Jehova ti gundaway idiay Russia iti mabiiten​—inkeddengko nga adalen ti Ruso. Idin, bayat nga agserserbiak idiay Brooklyn Bethel, rinugiakon a tabunuan ti panagadal ti libro iti Ruso. Maymaysa ti Ruso a panagadal ti libro nga aggigimong iti Biernes. Bayat ti panaglabas ti tiempo, nangrugin nga ad-adda a nairamanak iti grupo a Ruso. Nakikaduaak kadakuada iti panangasaba, a makaparagsak unay gapu iti kinabara dagiti Ruso. Nagsuratak iti Service Department a kiniddawko ti pannakayakar iti grupo a Ruso. Naragsakanak idi immanamongda iti daytoy.

Maysa nga aldaw iti morning worship idiay Bethel, imbaga ti presidente ti Watch Tower Bible and Tract Society, ni Milton G. Henchel, iti pamilia nga addanto maysa a naisangsangayan a report. Kalpasanna inyanunsiona a legal a nabigbigen dagiti Saksi ni Jehova idiay Russia ket tagtagiragsakenen dagiti kakabsattayo ti wayawaya iti panagdayaw. Pagarupek nga awan ti asinoman idiay Bethel ti makalipatto iti rag-o a nariknami iti pannakangngegmi iti kasta a nakaskasdaaw a damag. Pinanunotko iti daydi a kanito a nagdakkel a pribilehio ti agbalinto a paset dayta a naglawaan a baro a teritoria.

Rinugiak ti nakisinnurat iti kabsat a lalaki a taga Russia nga agnagan Volodeya, nga agnanaed idiay Krasnodar, Russia. Inawisnak a bumisita idiay Russia. Gapuna idi Hunio 1992, nagimpakeak dagiti maletak ket addaakon iti dalanko a mapan idiay Moscow. Idi simmangpetak, naragsakanak unay a makakita ken Kabsat Volodeya nga agur-uray kaniak idiay eropuerto. Nakipagnaedak ken ni Kabsat Stephan Levinski​—45 a tawennan iti kinapudno. Isu ti kaunaan a Saksi a naam-ammok idiay Moscow, ket binusbosnan ti adu a tawen idiay pagbaludan gapu iti takderna iti kinapudno. Talaga a nakaskasdaaw ti kinamanagpadagus dagiti kakabsat.

Isu nga addaakon ditoy Moscow, a di unay makaawat iti pagsasao. Iti dayta a tiempo, adda laeng uppat a kongregasion, ket kasla am-ammomi amin dagiti kakabsat. Sipud idin, babaen ti panangpadpadas iti nadumaduma a pamay-an, nabaelak nga impawayway ti visak. Nabaelak ti nagtrabaho iti sagpaminsan tapno adda gastosek. Ti kadakkelan a nakarigatak isu ti panangsursuro iti umdas a Ruso tapno makapagsaoak ken makapanganak iti naespirituan kadagiti gimong. In-inut a naparang-ay, ken siempre, agad-adalak pay laeng.

Naaddaanak iti pribilehio a tumabuno iti adu a kombension ken nakasaksi iti nakaskasdaaw nga irarang-ay ken ti naisangsangayan a kaadu dagiti agpabpabautisar. Kasta unay a makapabileg-pammati ti kapadasan a makakita iti pudno a kinaregta dagiti kakabsattayo ditoy. Diak isukát dayta iti aniaman. Adu kadagiti kakabsat a naam-ammok nga agad-adal pay laeng wenno kababautisar pay laeng idi simmangpetak ti agserserbi itan kas amin-tiempo a pioneer wenno ministerial nga ad-adipen, wenno kas Bethelites nga agserserbi idiay Solnechnoye, iti asideg ti St. Petersburg, Russia.

Mapuspusek ti kongregasionmi iti agarup 530 iti kada Domingo, ket binulan nga agpromediokami iti 12 a baro a di bautisado nga agibumbunannag. Ag-380 nga agibumbunannag, 3 a panglakayen, ken 7 a ministerial nga adipen ti naudi a bilang [iti kongregasionmi]. Mangirepreport ti kongregasionmi iti nasurok a 486 a panangyadal iti Biblia iti pagtaengan. Idi Pebrero 1995, naaddaanak ti pribilehio a mangsarungkar iti 29 a panagadal iti libro ken mangted iti service talk. Binisitak ti uppat a grupo iti linawas. Okupadokami met unay sakbay ti tunggal kombension iti salsaludsod agpaay kadagiti kandidato ti bautismo. Idi Mayo 1995, naaddaankami iti special assembly day a nakabautisaran ti 30 manipud kongregasionmi. Adda dagup dagiti nabautisaran nga 607 iti agarup 10,000 a timmabuno. Iti kombension distrito idi kalgaw, 24 manipud kongregasionmi ti nairaman kadagiti 877 a nabautisaran! Addaankami iti 13 a pioneer iti kongregasionmi ken 3 nga special pioneer. Agdagup ti agarup 110 a panangyadal ti irepreportda! Ita, addaankam iti 132 a di bautisado nga agibumbunannag.

Iti Memorialmi idi 1995, adda timmabuno a 1,012! Nabiit pay a nangibaon ti Sosiedad iti maysa a taga Poland a kabsat a lalaki, ni Mateysh, iti kongregasionmi. Isut’ nagturpos iti Ministerial Training School ket makatulongto unay. Ita addaankamin iti tallo a panglakayen. Gapuna mabuangayton ti kanayonan a kongregasion, ket ti teritoriami​—a dandani sangamilion ti populasionna​—mabingayton nga agkadua. Tunggal maysa iti dua a kongregasion ti addaanton iti agarup 200 nga agibumbunannag. Maysa a kongregasion ti addaanto iti dua a panglakayen, ket ti sabali maysa. Adda sabali pay nga umadani nga asambleami, isu a reprepasuenmi itan dagiti saludsod kadagiti 44 a nakasaganan a mabautisaran. Kasla di nakapapati! Talaga a maysa a naespirituan a paraiso! Nakaskasdaaw! Pudno a bembendisionan ni Jehova ti trabaho. Ti karuahena kasla nakaparpartak ti panagtarayna a lumasat iti Russia iti daytoy a tiempo. Idi Oktubre 1995, adda agarup 40 a kongregasion idiay Moscow. Nalaka laeng a madoble no adda umdas a panglakayen.

Nabayagen a napalabas dagidi aldaw ti ministeriomi idiay flea market. Adda ni Scott idiay Brooklyn Bethel, agserserbi ni Steve kas maysa a panglakayen iti maysa kadagiti kongregasion idiay Moscow​—agpadakami nga agyaman unay ta impalubos ti Dios ti pannakasarakmi kenkuana. Ikarkararagmi a minilion ti mangbirokto pay kenkuana ket ipalubosto ti Dios ti pannakasarakda kenkuana.​—Kas insalaysay da Scott ken Steve Davis.

[Dagiti Footnote]

[Ladawan iti panid 12]

Ni Scott

[Ladawan iti panid 13]

Ni Steve

[Ladawan iti panid 15]

Adda nasurok a 530 a tumabtabuno iti maysa a kongregasion ti Moscow iti kada Domingo