No Kasano ti Gumatang iti Segunda-Mano a Kotse

ASINO ti madi a gumatang iti kotse a kagudua laeng iti dati a presiona wenno nalaklaka pay? ‘Talaga kadi a mabalin dayta?’ maisaludsodyo. Wen​—no daytat’ kukua idi ti maysa a tao, a makuna met a segunda-mano a kotse. Ti parikut, adut’ agamak a saan a makagunggona ti gumatang iti segunda-mano a kotse. Dagiti kotse, kas iti dadduma a makina, madadael gapu iti kauusarda. Gapuna, bumaba ti balor ti kotse no dumaanen, nawatiwat ti nabiahenan, ken nabayagen a maus-usar.

Iyam-ammok man ti bagik? Maysaak a technician ti kotse iti nasuroken a 15 a tawen. Gapuna bay-andak a mangiranud kadakayo ti dadduma a banag a nasursurok. Dagiti sumaganad ti sumagmamano a salsaludsod nga imtuodenyo iti bagiyo sakbay a gumatangkayo iti segunda-mano a kotse.

Mano ti Kabaelak nga Igatang?

Umuna, pattapattaenyo no mano ti budget a kabaelanyo nga igatang iti kotse. Dagiti ad iti warnakan mabalin a maikkandakayo iti pamalatpatan iti tawen [a naaramid] ken modelo ti kotse a kabaelanyo a gatangen. Iti dadduma a pagilian, dagiti banko, agpapautang nga institusion, ken dadduma a libraria addaanda kadagiti binulan a giya a mangilista iti presio dagiti segunda-mano a kotse. Siguraduenyo a pattapattaen saan laeng a ti presio ti kotse no di ket ti pay magasto a buis, pannakairehistro, ken seguro. Kasta met, iplano nga adda kuarta para iti di mapakpakadaan a pannakatarimaan iti kotse kalpasan a nagatangyon dayta.

Ania a Kita ti Kotse ti Kasapulak?

No ikeddengyo ti kasapulanyo, ammuenyo no ania ti napateg kadakayo. Usigenyo ti kadakkel ti pamiliayo ken dagiti pakausaran ti kotse, kas ti pagluganan a mapan agtrabaho, panangitulod kadagiti ubbingyo iti eskuelaan, ken ti ipapan iti Nakristianuan a ministerio. Mausarto kadi ti kotse a pagluganan laeng iti lugaryo wenno iti nawatiwat a biahe? Saan laeng a ti kita ken modelo ti usigenyo; imbes ketdi, sapulenyo ti kotse a nasayaat ti pannakamantenerna ken nasayaat ti kondisionna. Mangalakayo iti kotse a nalaka a tarimaanen. Amin a kotse inton agangay masapul a masukatán dagiti piesana. Iti lugaryo, adda kadi supplier dagiti maitutop a piesa? Narigat a magun-odan dagiti piesa ti kotse a nasuroken a sangapulo ti tawenda. No kurang ti budget-yo, liklikanyo ti gumatang kadagiti luxury wenno naisangsangayan a kotse a naggaput’ ballasiw taaw, ta awan duadua a nanginngina dagiti piesa ken ti pannakatarimaanna. Nupay dagita a kotse talaga a mapangnamnamaanda, nagastos met ti panangtagikua kadakuada.

Nasayaat Kadi a Kotse Dayta?

Nasayaat a kotse ti nagsayaat ti pannakamantenerna. Kaaduanna, nasaysayaat ti panangliklik kadagiti kotse a nakawatwatiwaten ti nabiahena​—nangnangruna no daytoy ket gapu iti panagmaneho iti siudad imbes a kadagiti highway. Ti mangbukel iti nawatiwat a biahe mabalin a nagduduma iti nadumaduma a lugar. Awan ti naan-anayto a segunda-mano a kotse. Nupay kasta, kabaelanyonto aya ti gastos a kasapulan iti pannakatarimaan ti kotse? Kadawyanna a dagiti panangtarimaan ti saanto a mangpangina iti gatad ti kotse. Kas pagarigan, no gumatangkayo iti kotse a $3,000 ket kalpasanna gumastos iti $1,000 a kasapulan a pangtarimaan, saanto laeng a $4,000 ti balor ti kotse. Gagangay, nalaklaka no gumatang iti nasayaat ti kondisionna a kotse ngem ti gumatang iti kotse a di nasayaat ti kondisionna ket tarimaanen dayta.

Adtoy ti sumagmamano a pamalatpatan iti panangpili iti nasayaat a kotse:

• Sukimatenyo a naan-anay ti kotse sakbay a gatangenyo dayta. Tapno matingitingyo ti pudno a balor ti kotse, dikay kitaen ti kotse iti rabii wenno no agtudtudo. Likmutenyo ti kotse iti apagbiit. Ania ti makunayo? Ti kadi uneg ken ruarna ipakitana nga impateg ken inaywanan a naimbag ti immuna a makinkukua? Nasayaat kadi ti pannakamantenerna? Makaipaay kadi ti mangilako iti rekord ti pannakamantener a naaramid iti lugan? No saan, mabalin a nabaybay-an ti kotse. Mabalin a dikay kayaten a sukimaten pay daytoy a kotse.

• Subokenyo a manehuen ti kotse. Papartakenyo ti kotse agingga iti kapartak a maipaay iti highway iti panangpadasyo a panangmaneho. Kasta met a patarayen ken pasardengenyo iti naturod ken patag a kalkalsada.

Makina:

Nalaka kadi mapaandar ti makina?

Saan kadi a naasuk unay ti tambutsona?

Nasayaat kadi ti panagandar ti makina?

Suabe kadi ti panagmenorna?

Saan kadi a naungor ti makina?

Nabileg kadi ti makina no papartaken?

No saan ti sungbat iti aniaman kadagiti immuna a saludsod, ngarud ti makina mabalin a kasapulanna ti tune-up wenno narikrikut pay a pannakatarimaan. Dagitoy a kasasaad mabalin a pagilasinan met ti gastado a makina. Agannadkayo no kunaen ti aglako a kasapulanna laeng ti tune-up. Ti tune-up rumbeng a paset ti kanayon a pannakamantener ti kotse.

Transmission:

Ti kadi automatic transmission agkabsiw wenno saan a dumket no maikambio?

Saan kadi a suabe ti panagkambiona?

Nakaung-ungor kadi no agbaliw ti kambio?

No wen ti sungbat iti aniaman kadagitoy a saludsod, mabalin a masapul a tarimaanen ti transmission.

Dagiti preno ken suspension:

Aggutad kadi ti kotse iti maysa a sikigan no agmaneho wenno agprenokayo?

Aggunggon kadi ti kotse no papartaken wenno agprenokayo?

Agungor kadi no agprenokayo wenno agsikko wenno lumasat iti bakkuor?

No wen ti sungbat iti aniaman kadagitoy a saludsod, mabalin a masapul a tarimaanen ti preno wenno suspension ti kotse.

• Sukimatenyo ti dadduma pay a lugar a masapul a matarimaan. Agisuotkayo iti kawes a dikay iyal-alikaka no sukimatenyo [a naan-anay] ti uneg, ruar, ken sirok ti kotse.

• Sukimatenyo ti kaha no adda lati. Liklikanyo dagiti kotse nga addaan lati. Kaaduan kadagiti baro a kotse ti “unibody” ti pannakabukelna wenno di naglalasin ti bagi ken ti kaha ti makina. Dagiti paset ti bagina mausarda a mangpalagda iti dadduma a paset. No aglati dagitoy a paset, kaaduanna a nakanginngina ti interamente a panangtarimaan kadakuada. Mabalin a mapinturaan ti lati ti tapaludo ngem gagangay a pagilasinan dayta nga adda pay dagiti naglati a paset. Kitaenyo no adda lati iti sirok ti kotse. Agannadkayo no nabiit pay a napinturaan ti kotse; ti kotse mabalin a kas iti kapinpintura a panteon.

• Kitaenyo dagiti nadadael iti aksidente. Sukimatenyo dagiti nakalemmeng a dinadael ti aksidente iti sirok ti hood ken iti kargadera. Dagiti kadi rikep, hood, ken kargadera nasayaat ti panagserrada? Adda kadi pagilasinan iti lugar a napinturaan a di rumbeng a pinturaan, kas kadagiti hamba? Adda kadi agtedted iti kargadera wenno iti paset nga addaan alpombrana? Dagitoy a tedted makapataudda iti lati.

• Sukimatenyo ti engine oil. Usisaenyo ti oil dipstick. Bassit kadi unayen ti oil-na? Daytoy mabalin a resulta ti nabuslon a pannakausar ti oil wenno agtedted dayta. Narugit unay kadi wenno nangisiten ti oil-na? Narinet kadi? Siputanyo dagiti pagilasinan ti nabasa a lana iti aglawlaw ti kalub ti balbula. Sumrekkayo iti kotse, ket i-switch-yo ti ignition, ngem dikay paandaren ti kotse. Agsindi kadi ti low-oil-pressure warning light? No adda oil pressure gauge ti kotse, masapul a zero daytoy. Ita paandarenyon ti makina, a pagtalinaedenyo a nakamenor, ket siputanyo no kasano kabayag a maiddep ti oil pressure light wenno ti pannakabasa a normal ti engine pressure. No nasurok a dua a segundo sa maiddep wenno mabasa ti gauge a normal pressure ipamatmatna nga adun ti narunot iti makina. Kadagiti dadduma a babbaro a kotse idiay Estados Unidos, ti silaw a “Check Engine” wenno “Service Engine Soon” agsindi a dagus apaman a matulbekan ngem saan nga agan-andar ti makina. Rumbeng a maiddep ti silaw no agan-andaren ti makina. No nakasindi latta ti silaw ket agan-andaren ti makina, gagangay nga ipamatmat daytoy nga adda problema iti makina, nalabit ti emission control system wenno ti sistema a mangipaay iti gasolina.

• Sukimatenyo ti automatic transmission fluid. Nakapuy kadi wenno nauramen? Sukimatenyo no adda agtedted iti sirok ti transmission. Dagitoy a kasasaad ipamatmatda a masapul ti dakkel a panangtarimaan iti transmission. No ti kotse ket front-wheel drive, kitaenyo ti sirokna tapno makita no napisang ti rubber a mangabbong iti constant velocity joint. No kasta, mabalin a maibelleng ti grasa, ket mangpataud daytoy iti napartak a pannakadadael dagiti nagkakamangan, a nakanginngina a sukatán.

• Sukimatenyo amin dagiti uppat a goma. No kalbodan, namnamaenyo a sukatányo idan. No adda naiduma a pannakarunot ti getleng ti goma, mabalin a masapulna ti alignment wenno masapul a masukatán dagiti piesa ti steering system.

• Sukimaten ti power-steering system. Kasla kadi nauram ti hydraulic fluid wenno bassiten? Paandarenyo ti kotse ket pusiposenyo ti manibela iti sumagmamano a daras iti agsumbangir a sikigan. Rumbeng nga agpada ti pressure-na iti kannawan wenno iti kannigid. Adda kadi gumuyod bayat a pusiposenyo ti manibela? Masapul a di agranetret ti manibela no mapusipos. Aniaman a parikut ti panangpusipos mabalin a kaipapananna ti nangina a panangtarimaan.

• Dadduma a panangsukimat.

Sukimatenyo ti kasasaad dagiti belt ken dagiti hose.

Sukimatenyo ti panagandar ti parking brake iti maysa a turod.

Sukimatenyo ti naidumduma a pannakarunot ti brake pedal.

Sukimatenyo ti tambutsona. Naungor kadi? Nalukay kadi?

Sukimatenyo ti shock absorber ken dagiti spring-na. Nababa unay kadi ti kotse, wenno no italmegyo ti tunggal sulina, aglugayog kadi iti nasursurok ngem tallo a daras?

No addaan iti air-conditioner, nasayaat kadi ti panagandarna aniaman ti kapigsa ti blower-na?

Nasayaat kadi dagiti silaw, wiper, busina, seat belt, ken tawana?

Sukimatenyo ti sirok iti akinlikud a paset ti lugan iti aniaman a pagilasinan a naikkan iti pagguyod. No kasta, agannadkayo, ta mabalin a nakaro ti panangparigatna iti transmission.

No dikay sigurado iti aniaman a panangsukimat a nadakamat iti daytoy nga artikulo, nalabit nainsiriban no sukimaten ti maysa a propesional a mekaniko dayta sakbay a gatangenyo. Kiddawenyo kenkuana a sukimatenna pay ti kotse ken mangaramid iti listaan ti sumaganad:

1. Dagiti pannakatarimaan a kasapulan a dagus ti kotse ken mapattapatta a gatad dagiti piesa ken ti tangdan ti mangtarimaan.

2. Ti panangtarimaan a kasapulan ti kotse iti sumaganad a tawen ken ti mapattapatta a gastos iti piesa ken ti tangdan ti mangtarimaan.

Daytoy a panangsukimat ti maysa a propesional a mekaniko rumbeng nga alaenna ti nakurang a maysa nga oras. Nupay mabalin a tangdananyo daytoy a panangsukimat iti maysa nga oras, bassit ti gastos no idilig iti di ammo a gastos a kasapulan iti panangtarimaan. Damagenyo iti aglako no ania dagiti panangtarimaan a nabiit pay a naaramidan iti kotse. Kiddawenyo dagiti rekord ti pannakatarimaanna. Kanayon kadi a nasuksukatán ti oil ken ti oil filter-na? Nasukimat kadin ti automatic transmission? Kaano ti naudi a pannaka-tune-up ti kotse? Laglagipenyo, ti nasayaat a kotse isu daydiay nasayaat ti pannakamantenerna ket dina kasapulan ti adu unay a trabaho.

Agtugawkayo ket umuna a pattapattaenyo ti gastos​—agraman dagiti amin nga impormasion ken kasasaad ti kotse. Kalpasanna ikeddengyo no maitutop ti gatad ti kotse ken no umdas ti budget-yo a kuarta a manglitup saan laeng nga iti igatangyo no di ket iti pay dadduma a gastos.​—Impatulod ti maysa a technician ti kotse.

[Dagiti ladawan iti panid 16, 17]

Kasano a masiguradoyo a nasayaat a kita ti gatangenyo a segunda-mano a kotse?

Nayilustrar ditoy ti sumagmamano kadagiti adu a banag a masapul nga usigenyo

Ipasukimatyo ti kotse iti technician ti kotse sakbay a gatangenyo dayta

Kanayon kadi a masuksukatán ti oil ken ti oil filter-na?

Sukimatenyo dagiti dinadael ti aksidente. Nasayaat kadi ti panagserra dagiti rikep, hood, ken kargadera?

Ti naiduma a pannakarunot ti goma mabalin nga ipamatmatna ti nakaro a problema iti alignment wenno iti steering system