Agsubli ti Tuberculosis!

NANIPUD idi 1950’s, bimmassit ti bilang dagiti kaso ti tuberculosis (TB) idiay Estados Unidos iti kaadu a 5 porsiento iti makatawen. Nanipud idi 1985, nupay kasta, addan 18-porsiento nga inaduan dagiti naipadamag a kaso ti TB. Ti ad-adda pay a makapadanag isu ti kaadda ti baro a kita ti sakit a saan a maagasan iti droga. Ita, ti TB papatayennan ti napattapatta a tallo a milion a tattao iti kada tawen. Apay a saanen nga agbalballigi ti pannakidangadang iti TB?

Maysa a rason isut’ saan a panagtomar ti adu a pasiente kadagiti agasda iti kapaut a kasapulan​—masansan nga innem agingga iti siam a bulan. Idiay New York City, kas pagarigan, impalgak ti maysa a panagadal a 89 a porsiento iti maysa a grupo dagiti 200 a pasiente a nakaro ti TB-na ti di nangturpos ti panagagasda. “Nakaam-amák dayta,” kuna ni Dr. Lee Reichman, presidente ti American Lung Association, “agsipud ta dagidiay a tattao (a)saandanton a maagasan, ken (b)nalabit makapataudda iti TB a naandur kadagiti gagangay a maus-usar a droga.” Ngem saan laeng a perdien dagitoy a masakit ti salun-atda. “Babaen ti saanda a panagtomar iti agasda,” inayon ni Dr. Reichman, “maakaranda ti dadduma a tattao.” Awan duadua a daytoy ti nakaigapuan ti napattapatta a walo milion a baro a kaso a na-diagnose iti sangalubongan iti kada tawen.

Maamiris dagiti estudiante ti Biblia a ‘dagiti angol iti nadumaduma a lugar’ ti paset iti pagilasinan nga agbibiagtayon “iti maudi nga al-aldaw” daytoy a sistema ti bambanag. (Lucas 21:11; 2 Timoteo 3:1) Anianto ti sumaruno? Maysa a baro a daga, a sadiay “awanto ti agtaeng nga agkuna: ‘Masakitak.’” (Isaias 33:24) Wen, ikari ni Jehova a Dios, saan a ti temporario a bang-ar, no di ket ti permanente a pannakawayawaya manipud sakit ken ipapatay.​—Apocalipsis 21:1-4.