Kinabirhen—Apay?
“TI KULTO ti kinabirhen”—dayta ti pangawag ni Randall Balmer, associate professor ti relihion idiay Barnard College/Columbia University, iti kasla agsaksaknap nga uso kadagiti tin-edyer a mangitantan iti seksual nga aramid agingga a natataengandan.
Agtaud gayam kadagiti narelihiosuan nga organisasion ti kaaduan a panangparegta a mangidian iti sekso. “Ngem nailubongan, saan a narelihiosuan, ti motibo iti likudan ti kulto ti kinabirhen,” ipaganetget ni Dr. Balmer. “Ti pudno a motibo iti panagtalinaed a birhen isut’ buteng—saan a buteng iti nadibinuan a pannusa, no di ket buteng iti makapapatay a sakit.” Isu a paggidiatenna “ti kulto ni Birhen Maria,” a nangiparang iti panangidian kas narelihiosuan a kalat, iti moderno aldaw a “kulto ti kinabirhen,” nga ad-adda a mangiparang iti panangidian kas isyu ti salun-at.
“Daytat’ nakalkaldaang a pannakailawlawag ti kasasaad ti relihion iti dekada ti 1990 a ti buteng iti sakit ti mangim-impluensia iti moralidad,” intuloy a kinuna ni Dr. Balmer. “Mangisingasing dagiti narelihiosuan a lider, a magagaran unay a mangliklik iti panangsair, iti nakapuy a moralidad, wenno awan a pulos. Isu a naipabiangen kadagiti sientista ken opisial iti salun-at ti publiko ti panangbalakad kadagiti agtutubo no kasano nga iwanwanda ti seksual a biagda.”
Nupay kasta, saan a kastoy ti kasasaad kadagiti pudno a Kristiano. Usigenyo ni Chad, maysa a tin-edyer a napadakkel kas maysa kadagiti Saksi ni Jehova. Ni Chad ti inasitgan ti maysa a balasang a nangirugi iti saritaan. Ngem di nagbayag, nagminar a saan laeng a pannakisarita ti intensionna. “Kellaat a nalagipko,” kuna ni Chad. “Diak kayat nga upayen ni Jehova. Tangay pampanunotek ti kanayon a panangay-ayok ken ni Jehova, imbagak kenkuana nga agawidakon.”
Kas ken Chad, adu nga agtutubo kadagiti Saksi ni Jehova ti mangtagtaginayon iti nagsayaat a kababalinda saan laeng a maigapu iti nasayaat a salun-at no di ket kangrunaanna tapno maay-ayoda ti Namarsua kadakuada, ni Jehova a Dios. Saan a ti buteng iti sakit ti mangim-impluensia iti moralidadda. Imbes ketdi, tungtungpalen dagita nga agtutubo ti balakad ti Eclesiastes 12:1: “Lagipem met ti Namarsua kenka kadagiti aldaw ti kinaagtutubom.”