Manipud Managbasatayo

Dagiti Mormon Naklaatak idi nabasak ti artikulo a “Ti Mormon Church​—Pannakaisubli ti Isuamin a Banag?” (Nobiembre 8, 1995) Aw-awaganyo ti bagbagiyo a pudno a Kristiano agsipud ta agkedkedkayo a makigubat. Ngem pagpannakkelko dagiti Mormon a nakidangadang idi Gubat Sangalubongan II ken timmulong kadagiti Judio nga indadanes ni Hitler. Aniat’ ar-aramiden dagiti Saksi ni Jehova idi a tiempo malaksid a nagmayat ti tutugawanda ken buybuyaenda a matay ti innem a milion a Judio?

G. D., Alemania

Pudno a nakibakal a maibusor iti Nazismo dagiti Mormon idiay Estados Unidos ken Britania. Ngem saan a kasta idiay Alemania a mismo. Kuna ti libro a “The Nazi State and the New Religions,” ni historiador Christine King, vice-chancellor ti Staffordshire University idiay Inglatera: “Nakipaset dagiti Mormon iti panagserbi iti buyot ket adda innem a gasut a Mormon iti buyot ti Alemania idi 1940. . . . Intultuloy nga ipaganetget dagiti Mormon ‘dagiti agpapada a kalat’ ti Mormonism ken National Socialism. . . . Dadduma a lider dagiti Mormon ti nangrugi a nangisuro kadagiti kongregasionda kadagiti kangrunaan a paset ti National Socialism, a nangidauloda kadagiti kararag para iti Führer, a nasaoda kas ‘tinudingan ti Dios.’ . . . Adda laeng dua a naipadamag a kaso dagiti Mormon a nagkitakit kadagiti Nazi.” Nupay kasta, kas maysa a grupo, nagkitakit dagiti Saksi ni Jehova a mangsuporta iti rehimen a Nazi. Isu a nagbalinda a puntiria ti nainget a pannakaibalud ti gobierno ni Hitler. Rinibu ti nagsagaba iti pannakaidadanes kadagiti kampo konsentrasion ket adu ti natay sadiay. Kitaenyo ti ruarmi nga Agosto 22, 1995.​—ED.

Pannakariro iti Retrato Naan-anay a makaparagsak ti serye ti “Science Fiction​—Panangsirpat iti Masanguanantayo?” (Disiembre 8, 1995) Nupay kasta, ti retrato ni Jules Verne iti panid 3 ket kasla retrato ni William Morris, maysa a maika-19 a siglo nga artist ken mannurat.

R. G., Estados Unidos

Adu a managbasa ti nakadlaw itoy a kamali. Adda klerikal a kamali, ket di umiso ti pannakanagan ti file-mi a retrato ni William Morris. Dispensarendakami iti daytoy a pannakariro.​—ED.

Nakaskasdaaw nga Uniberso Kalpasan ti panagbasak iti seryeyo a “Ti Nakaskasdaaw nga Uniberso​—Nagtaudanna?” (Enero 22, 1996), nalawlawagen ti pannakaawatko maipapan iti agdama a nasientipikuan a pannakaammo iti uniberso. Naitampok ti presentasionyo babaen iti nasigo a pannakausar ti aglaplapusanan nga impormasion, gubuayan, ken reperensia. Kas maysa a maestro, usarekto a naimbag ti material nga imparangyo.

M. P., Estados Unidos

Masansan a basaek dagiti umasping nga artikulo iti dadduma a magasin, ngem kanayon a dida padayawan ti Nangdisenio kadagita a pagsidsiddaawan. Nangipaay dagiti artikuloyo iti kasapulan a mangpunno iti kasta a kinakawaw.

P. B., Italia

Saan laeng a pudno ti material no di pay ket makapabileg pammati. Pinabilegna ti panangapresiarmi iti Diostayo​—ti Namunganayan ti nakaskasdaaw, makapaamangá nga unibersotayo!

C. S., Grecia

Talaga a makaparagsak a basaen dagiti artikulo. Agtawenak iti 14, ket kanayon a kasta unay ti panagamangak iti uniberso. Dagitoy nga artikulo ti nangipakaammo kaniak iti kinaawan serserbi ti tattao no idilig iti kinarikut daytoy a panamarsua.

M. D., Portugal

Binasak dagiti artikulo buyogen ti naisangsangayan nga interes. Maragsakanak ta ilawlawag ti Agriingkayo! dagita nga isyu. Inikkannak iti kanayonan a pannakaawat kadagiti misterio ti uniberso, nangnangruna iti impormasion maipapan iti pammaneknek a “dagiti labutab” a 100 a milion a light-years ti kadakkelda, nga aduan iti ariwanas iti ruar ken yuyeng iti uneg. Daytoy ti mangpataud iti parikut iti moderno a teoria a big bang! Pinagpanunotnak no kasano kabassit ti agpayso nga ammotayo maipapan iti uniberso.

D. K., Czech Republic