Manipud Managbasatayo
Salaknibanyo Dagiti Annakyo Naam-ammok ti maysa nga agkabannuag a babai a nangpadagus iti dadduma nga ubbing a naabuso iti seksual. Impaimak kenkuana ti Oktubre 8, 1993 a ruar nga addaan serye a “Salaknibanyo Dagiti Annakyo!” Idi sinarungkarak manen, kinunana: “Dagiti artikulo ti timmulong kaniak a mangtaming iti daytoy baro a kasasaad. Intugotko ti magasin idi napanak iti korte dagiti ubbing ket impakitak iti piskal. Nagustuanna, agraman ti hues, dagiti artikulo ket kayatda nga ibunong iti dadduma pay nga abogado.” Nagkiddaw daytoy agkabannuag a babai iti ad-adu a literatura ket makipagad-adal itan iti Biblia kadakami.
E. T. V., Brazil
Dagiti Crossword Puzzle Sumagmamano nga aldawen ti napalabas, bidbidingenmi a dua iti apokok ti Disiembre 8, 1995 nga Agriingkayo! idi nakitami ti crossword puzzle. Indir-ina, “Pagay-ayatko dagiti crossword puzzle!” Isu a kinitami a dua dagiti kasuratan, ket binay-ak nga isu a mismo ti mangpanunot kadagiti sungbat. Binusbosmi a dua ti makaparagsak unay a kagudua nga oras wenno nasursurok. Itultuloyyo dayta! Segseggaanmi ti sumaganad a crossword puzzle.
M. G., Canada
Agtawenak iti siam. Pagay-ayatko ti magasinyo, ngem nangnangruna iti amin, kayatko dagiti crossword puzzle agsipud ta tultulongandak a manglagip kadagiti pasamak ken tattao iti Biblia. Pagyamanan unay iti daytoy a paset.
J. M. T., Brazil
Mammapatay a Saksakit Pagyamanan iti adut’ saklawenna, nalawag, ken umiso a serye a “Mammapatay a Saksakit—Ti Dangadang ti Tao ken Mikrobio.” (Pebrero 22, 1996) Diak pulos naamiris ti kasta unay a kinakomplikado ti mikrobio ken ti kaadu ti maaramidna a pakadangranan ti bagi.
C. L., Estados Unidos
Dimteng ti magasin iti umiso unay a tiempo, tangay nakaptanak iti pulmonia ket masapul nga agtomarak kadagiti antibiotiko. Ti artikulo ti timmulong kaniak a mangtarus no apay idi damo a nagtomarak iti agas, kimmaro ti sakitko imbes a sumayaat. Agyamanak iti daytoy a material, a naiparang iti kasta a nalaka a maawatan a pamay-an.
I. W., Alemania
Ethiopia Kalpasan ti panangbasak iti artikulo a “Ti Makaawis nga Ethiopia” (Pebrero 22, 1996), napno ti pusok iti panagyaman. Adu ti kabagiak a taga Ethiopia a saan a Saksi ni Jehova. Nagpintas daytoy nga artikulo nga uray la agtalekak a parayrayennanto ti interesda nga agadal maipapan iti naindaklan a Diostayo a ni Jehova.
J. R., Luxembourg
Dati a Geisha Kasta unay ti pannakaabbukay ti riknak iti artikulo a “Ti Anak ti Tukak.” (Pebrero 22, 1996) Maigapu iti impluensia ni nanangko, nagadalak iti classical ballet manipud pay idi ubingak. Idi nagbalinak a maysa kadagiti Saksi ni Jehova, inkeddengko nga isardengen ti ballet, nupay pagay-ayatko unay dayta. Pinaregtanak daytoy nga artikulo. Tinulongannak a mangawat nga adda dadduma a Kristiano a nangaramid kadagiti umasping a sakripisio. Naimpusuan nga agyamanak kadakayo.
Y. S., Japan
Diak malapdan ti panagsangitko idi nakitak ti retrato ni Sawako Takahashi ken ti naragsak, teokratiko a pamiliana. Dagiti sinagabak iti napalabas ti nabayag a nangituray iti biagko, ket ti pannakarikna a nabiktimaak ti nangriribuk unay kaniak. Ti pannakaamiris a mapakawan ni Jehova dagiti napalabas a nagkamaliak ti mangpatured kaniak a mangitrabaho iti panagbalinko a bautisado a Kristiano.
M. K., Japan
Daytat’ maysa kadagiti makaisuro unay ken kapintasan pay laeng a pakasaritaan a nabasak. Tinulongannak met a mangtarus iti saklawen ti panagdayaw kadagiti inapo. Idi laeng nabasak daytoy a pakasaritaan a naawatak daytoy a kita ti panagdayaw.
P. Y., Estados Unidos