Manipud Managbasatayo

Panagsugal Nupay ti serie dagiti artikulo a “Panagsugal—Makagunggona Aya?” (Hunio 8, 1992) ket pudno a makaipaay iti impormasion ken naintiempuan, awan ti nadakamat maipapan iti pustaan. Saan a kas kadagiti baraha, loteria, slot machines, ken dadduma pay, ti pustaan ket mabalin a maaramid iti aniaman a tiempo, aldaw wenno rabii. Saan pay a masapul a pumanawka iti trabahom. Patiek a daytoy a kita iti panagsugal ket nasaksaknap ngem ti kita a naisalaysay kadagiti artikuloyo. Ti pustaan saanna laeng a sayangen ti kuarta no di ket ti pay napateg a tiempo a mabalin a busbosen koma iti pamilia ti maysa a tao. Ti kasta a tiempo mausar a mangsiput kadagiti iskor ken nagbanagan dagiti ay-ayam. Ti pustaan ngarud ket sabali pay a nakalkaldaang a pakasaritaan daytoy a sistema ti bambanag.

C. Y., Estados Unidos

Agyamanak ti panangipaayyo kadakami iti pannakaawat maipapan iti napeklan a sugador. Masapul nga ibturak ti rigat ti pinadakkel ti napeklan a sugador. Ni nanang ket maysa nga agsolsolo a naganak nga addaan lima nga annak. Agay-ayam ti bingo iti innem a rabii iti maysa a lawas, tunggal lawas, ket ag-bingo pay laeng agingga ita. Kanayon nga ipangpangrunana ti panagsugal. Idawdawatmi a mangbusbos iti tiempo a kaduami, agluto para kadakami, ngem awan ti mamaay dayta. Insakripisiona dagiti annakna agpaay iti bingo. Agyamanak iti panangtulongyo kaniak a mangawat a nasaysayaat no apay nga inaramidna daytoy.

R. E., Estados Unidos

Dagiti “Curfew” Kayatko ti agyaman kadakayo gapu iti artikulo nga “Agimtuod dagiti Agtutubo . . . Apay Nakaing-inget ti Al-alagadek a “Curfew”?’’ (Mayo 22, 1992) Dandanin 17 ti tawenko, ket pagarupek a di nainkalintegan a mangikeddeng pay laeng ni nanang iti alas 11:00 t.r. a curfew. Sumagmamano a rabii a naladawak a nagawid gapu iti kinaliway, ket kasta unay ti pannakaupay ni nanangko! Apresiarek ta inlawlawagyo a masikoran ken madanagan dagiti nagannak, nga agamakda iti kinatalgedmi no dikam agawid iti naikeddeng nga oras. Pudno a naagumak no siak ti pakaigapuan iti kasta nga awan mamaayna a panagdanag.

O. C., Estados Unidos

Crossword Puzzles Kayatko ti agyaman kadakayo iti panangipablaakyo kadagiti crossword puzzles iti Agriingkayo! Tarigagayak laeng nga ad-adu pay koma. Makipagad-adalak kadagiti Saksi ni Jehova, ngem ti asawak saan unay nga interesado. Saan a managbasa, ket narigat ti makasarak iti pangparegta kenkuana nga agbasa. Ngem pagay-ayatna a solbaren dagiti crossword puzzles yo! Kinapudnona, agkaduakami a mangsolbar iti dayta, isu a nagsayaatan para kadakami. Agyamanak.

E.X.E., Brazil

Ti “Agriingkayo!” agtultuloyto a mangipablaak kadagiti crossword puzzles iti sagpaminsan.—ED.

Kinabirhen Ti artikulo nga “Agimtuod dagiti Agtutubo . . . Apay Agtalinaed a Birhen?” (Abril 22, 1992) ket dakkel naitulongna kaniak. Nakiabigak sakbay ti pannakiasawak. Uray no diak ammo a naan-anay dagiti linteg ni Jehova idi a tiempo, kasta unay ti panangriribuk dayta iti konsiensiak, ken nagleddaangak. Nagsangitak idi nabasak ti artikulo. Naliwliwaak a makaammo a nadalusanakon iti imatang ti Dios. Anian a makagunggona no basaen koma dagiti agtutubo daytoy nga artikulo ken ikeddengda ti agtalinaed a birhen! Tarigagayak a nagtalinaedak koma a birhen.

M. S., Puerto Rico

Uniberso Anian ti kinaawan mamaaytayo iti imatang ti Dios! Dayta ti impakitayo iti artikulo a “Panangibutaktak kadagiti Palimed ti Uniberso.” (Marso 22, 1992) Dagiti teleskopio ti tao in-inut nga ipalpalgakda ti awan patinggana nga uniberso. Dagiti naammuanda patalgedanda kadatayo nga adda dakdakkel ken nasirsirib ngem datayo a nangparsua itoy misterioso nga uniberso ken dagiti linteg a mangkontrol iti dayta. Napakumbabatay koma a mangbigbig iti daytoy.

M.R. S., Brazil