Panangiwaksi iti Di Umiso a Panangipapan Kadagiti Saksi Ni Jehova

BAYAT ti pannakiramanda iti panangasabada iti binalaybalay, dua kadagiti Saksi ni Jehova ti nakasarak iti maysa a lalaki a nangibaga kadakuada a saan nga interesado. Naulimek a pimmanaw dagiti Saksi, ngem bayat a magmagnada iti dalan, nadlawda a sursuroten ida ti lalaki. “Aguraykayo, pangngaasiyo,” impukkaw ti lalaki. “Kayatko ti agpadispensar. Awan ti ammok maipapan kadagiti Saksi, ket patiek nga adu a tattao ti di umiso ti pannakaammoda maipapan kadakayo.”

Kalpasanna, inyam-ammo ti lalaki ti bagina a kas Renan Dominguez, ti tserman iti programa ti Rotary Club iti Abagatan a San Francisco, California. Dinamagna no mabalin nga umay ti maysa a Saksi iti club ken agpalawag maipapan iti patpatien ken ar-aramid dagiti Saksi ni Jehova. Nayurnos ti mapagsasaritaan. Agpalawag ti Saksi iti 30 a minuto ket kalpasanna palubosanna nga agsaludsod dagiti dumdumngeg. Nakiddaw ni Ernest Garrett, maysa a Saksi iti adun a tawen iti lugar ti San Francisco, nga agpalawag iti Rotary Club idi Agosto 17, 1995, ket inranudna ti sumaganad:

“Pinampanunot ken inkararagko no ania ti mabalin a maibagak kadagiti miembro ti Rotary Club, a buklen dagiti lider ti negosio ken ti komunidad, kas kadagiti agtartrabaho iti banko, abogado, ken dodoktor. Nagsirarakak bassit ket naammuak a ti panangpabileg iti komunidad ti naipablaak a panggep ti Rotary Club. Isu nga imparangko ti impormasion iti panid 23 iti broshur a Jehovah’s Witnesses in the Twentieth Century, a napauluan ‘Praktikal a Pateg ti Naimbag a Damag iti Komunidadyo.’”a

“Inlawlawagko a makaimpluensia dagiti Saksi ni Jehova iti pannakaibanag daytoy. Inaldaw iti lawas, agtuktok dagiti Saksi ni Jehova kadagiti ruangan iti komunidadda. Tarigagayanda nga impluensiaan dagiti kaarrubada a maaddaan iti nabileg a pamilia​—ta ti nabileg a pamilia agbanag iti nabileg a komunidad. No ad-adu nga indibidual ken pamilia ti maimpluensiaan dagiti Saksi ni Jehova nga agbiag a maitunos kadagiti Nakristianuan a prinsipio, maksayan ti kinadelingkuente, imoralidad, ken krimen iti komunidad. Nagsayaat ti panangawat dagiti miembro iti daytoy nga impormasion ta maitunos kadagiti kalat ti Rotary Club.”

“Apay a Dikay Makiraman iti Politika?”

“Idi naipalubosen ti panagsaludsod, maysa kadagiti immuna a saludsod ket: ‘Apay a dikay makiraman iti politika ken iti gobierno?’ Innayon pay ti natakneng a lalaki a nagimtuod: ‘Ammoyo, kuna ti Nagsayaat a Libro: “Ibayadyo ken Cesar dagiti bambanag ni Cesar.”’ Imbagak kenkuana a naan-anay a patienmi dagita a sasao ken tungpalenmi dayta. Impabigbigko a kaaduan a tattao a mangad-adaw iti dayta a kasuratan dida pulos adawen ti kaguduana, a kunaenna: ‘Ibayadyo iti Dios dagiti bambanag ti Dios.’ (Mateo 22:21) Ngarud, maibagatayo a saan nga amin a bambanag kukua ni Cesar. Adda dagiti bambanag a kukua ti Dios. Naipasango kadatayo ti panangammo no ania dagiti bambanag a kukua ni Cesar ken no ania ti kukua ti Dios.

“Impakitak kenkuana nga idi nayimtuod ken Jesus ‘Nainkalintegan kadi ti agbayad iti panguluen a buis ken Cesar wenno saan?’ saan a simmungbat iti wen wenno saan. Kinunana: ‘Ipakitayo kaniak ti panguluen a buis a sinsilio,’ a denario ti Roma. Sinaludsodna: ‘Makinladawan ken surat daytoy?’ Kinunada: ‘Ni Cesar.’ Idin kinunana kadakuada: ‘Ngarud, ibayadyo ken Cesar dagiti bambanag ni Cesar.’ (Mateo 22:17-21) Kayatna a sawen, agbayad iti buis ken Cesar agsipud ta magun-odantayo dagiti serbisio ni Cesar ket umiso nga agbayadtayo iti buis para kadagitoy. Inlawlawagko nga agbayad dagiti Saksi ni Jehova iti buisda ket dida kusiten ti gobierno iti umiso a kukuana.

“Ngem kinunak a saan a patien dagiti Saksi ni Jehova nga utangda ti biagda ken Cesar. Patienda nga utangda ti panagdayawda iti Dios, ket umiso nga itedda daytoy kenkuana. Isu a no alaenmi daytoy a takder, dikam panggep a di padayawan ni Cesar. Tungpalenmi amin dagiti linteg ni Cesar, ngem no agkontrada, siraraem a pilienmi ti agtungpal iti Dios kas agturay imbes a ti tattao. Ti lalaki a nagimtuod itoy kinunana iti amin a tallaong: ‘Diak supiaten dayta!’

“Nasungbatanmi met dagiti adu a saludsod maipapan iti trabahotayo a panangasaba. Adu kadagiti miembro ti immay nakialamano kalpasan ti miting ket kinunada a naan-anay nga umanamongda kadatayo​—a ti pamilia ti pamuon ti nabileg a komunidad. Kalpasanna inikkanmi ti tunggal miembro ti broshur a Jehovah’s Witnesses in the Twentieth Century.

“Kalpasan daytoy a miting tineleponuannak ti tserman ti programa, ni Mr. Dominguez, ket kiniddawna no makadagasak iti opisinana, ta adu pay ti isaludsodna maipapan iti patpatientayo. Naaddaankami iti nagsayaat a panagsarita maipapan iti sumagmamano a kasuratan. Nangnangruna a kayatna nga ilawlawagko kenkuana ti takdertayo maipapan iti dara. Kinunana a mismo a dina kayat ti agpayalison, ket nagsidsiddaawanna unay ti impormasion nga intedko kenkuana manipud iti broshur a Kasano nga Ispalen ti Dara ti Biagyo? ta inawisnak nga agsubli ken agpalawag kadagiti miembro ti club maipapan iti takdertayo iti dara. Inawisko ti sabali a Saksi, ni Don Dahl, a kuyogennak iti daytoy a programa. Isut’ mapmapan kadagiti ospital ket salaysayenna ti isyu kadagiti doktor no mapan agpaopera dagiti Saksi. Nagtinnulongkami a nangilawlawag a naan-anay no kasano ti pannakipagtrabahomi kadagiti doktor ken ti administrasion ti ospital tapno malawlawagan ti Nainkasuratan a takdertayo ket itukonmi ti naballigi a kasukat ti panangyalison ti dara.”​—Levitico 17:10-12; Aramid 15:19-21, 28, 29.

‘Kayatmo a Sawen Palubosam a Matay ti Barom?’

“Kalpasan ti miting immay ti maysa a natakneng a lalaki ket sinaludsodannak a pribado: ‘Kayatmo a sawen palubosam a matay ti barom no naaksidente ket maiyeg iti kuarto ti emerhensia nga agpadpadara iti kasta unay?’ Impanamnamak kenkuana a maseknanak met, ta adda barok a natay gapu iti ibebettak ti eroplano idiay Lockerbie, Scotland, idi 1988. Kas sungbat iti saludsodna, immuna nga imbagak kenkuana a diak kayat a matay ti barok.

“Dikam busoren dagiti doktor, ti panangagas, wenno ti ospital. Saankami a mangag-agas gapu iti pammati. Kasapulanmi dagiti serbisio ti doktor. Agtalekkami iti Dios ket pagtalkanmi a naynay a pagimbaganmi ti panangiwanwanna maipapan iti dara. Deskribiren ti Biblia ti Dios a kas ‘Diosmo a [Daydiay, NW] mangisuro kenka a maipaay iti gunggonam, a mangiturong kenka iti dalan a papanam koma.’ (Isaias 48:17) Inikkanna ti Anakna iti abilidad a mangpagungar iti natay. Kinuna ni Jesus: “Siak ti panagungar ken ti biag. Ti mangalagad iti pammati kaniak, uray no matay, agbiagto; ket tunggal maysa a sibibiag ken alagadenna ti pammati kaniak saanto a pulos matay. Mamatika kadi iti daytoy?”​—Juan 11:25, 26.

“Kidkiddawenmi laeng kadagiti doktor a maawatanda koma a ti takdermi ket maigapu iti konsensia ket di mabalin nga ikompromiso. Dikam ikompromiso daytoy a banag a kas met iti dikam panangikompromiso iti linteg ti Dios maipapan iti pannakikamalala. Dikam mabalin nga itulag iti Dios ket kunaenmi, ‘O Dios, adda kadi aniaman a kasasaad a mabalin a makikamalalaak?’ Idin kinunak itoy a lalaki: ‘Sinaludsodmo no palubosak a matay ti barok babaen ti panagkedkedko iti panangyalison iti dara. Buyogen ti panagraem, damagek koma no palubosam a matay ti barom nga agserbi iti buyot ti aniaman a nasion?’ Dagus a simmungbat ken naganetget, ‘Wen! Agsipud ta obligasionna dayta!’ Kinunak: ‘Palubosam ti barom a matay agsipud ta maigapu dayta iti pammatim. Ipalubosmo met ngarud dayta a pribilehiok iti barok.’

“Nagsayaat ti nagbanagan amin daytoy ta ti tserman ti programa, ni Mr. Dominguez, inawisnak ken ti asawak a makipangmalem kenkuana ken iti asawana. Nariknana a ni baketna biktima ti di umiso nga impormasion ken di umiso a panangipapan kadagiti Saksi ni Jehova. Agpayso ti kinunana. Di umiso ti naammuan ni baketna. Tinagiragsakmi ti rabii, ket adu ti sinaludsod ti asawana maipapan kadatay ken iti trabahotayo, nga impalubosna a sungbatanmi a detalyado. Iti sumaganad nga aldaw immawag ket imbagana a tinagiragsakda unay nga agassawa ti pannakaam-ammo kadakami nga agassawa ket nautobda a nagsayaattayo a tattao.

“Intultuloyko ti simmarungkar a regular ken ni Mr. Dominguez, ket imparangarangna ti napasnek nga interes iti Biblia. Talaga nga imbagana kaniak: ‘Diak bumdeng a mangparegta kenka a makiuman kadagiti tserman ti programa kadagiti amin a Rotary Club iti Greater San Francisco Bay ket itukonmo nga agpalawagka iti kaasping ti impalawagmo iti club-mi. Mabalinda ti agsaludsod kaniak, ket no makiumanda kaniak, maragsakanak a mangipaay iti kasayaatan a rekomendasion nga awisendaka a kangrunaan nga agpalawag.’

“Internasional dagiti club ti Rotary. Mabalinan kadi nga awaten ti dadduma a club idiay Estados Unidos ken iti intero a lubong ti panangilawlawag dagiti Saksi ni Jehova?”

[Footnote]

[Ladawan iti panid 18]

Da Mr. Renan Dominguez, kannigid, ken Kabsat Ernest Garrett