Manipud Managbasatayo

Pangtimbeng Kalpasan a nabasak ti artikulo a “Ti Regalo ti Dios a Pangtimbeng” (Marso 22, 1996), natignayak nga agyaman kadakayo. Madama nga ad-adalek ti audiology, ket awan uray maysa kadagiti librok ti addaan impormasion a kompleto ken nalaka a maawatan a kas iti artikulo ti Agriingkayo! Nagsayaat met ti pannakai-drawing ti lapayag.

J. P. A., Brazil

Kurbata Pagyamanan unay iti artikulo nga “Asino ti Nangimbento iti Kurbata?” (Mayo 8, 1996) Kas ministro a Saksi ni Jehova, agkurbataak nupay 30 degrees Celsius ti kapudotna bayat a mangasabaak iti binalaybalay. Masansan a pampanunotek idi a ti kurbata ket inimbento la ketdi ti maysa a naulpit nga inkisidor idi maika-13 siglo tapno mapagpudnona ti maysa a heretiko, a butbutngenna babaen ti panangusar iti pagtutuokan a pagiddaan, panangpairut iti tangan babaen iti screw, panangsinit iti agburburek a lana, wenno pagkurbataen iti nabara a malem.

W. B., Estados Unidos

Mabalin a patien ti dadduma a makapatuok ti panagkurbata iti aniaman a panniempo. Ngem naimbag ta kadagiti kultura a maibilang a maitutop ti panagkurbata, kaaduanna, an-anusan dagiti Saksi ni Jehova ti agkurbata bayat a makiramramanda iti panagministerio ken itatabuno kadagiti Nakristianuan a gimong.​—ED.

Awanan Asuk a Sigarilio Iti klasemi ti health idiay eskuelaan, ad-adalenmi ti maipapan kadagiti droga. Impakitak iti maestromi ti kopia ti Abril 22, 1996, a ruar ti Agriingkayo! nga addaan artikulo nga “Agimtuod Dagiti Agtutubo . . . Awanan Asuk a Sigarilio​—Di Aya Makadangran?” Nagpaaramid kaniak iti 30 a kopia ti artikulo tapno maibunongna ken maibasa ti artikulo kadagiti klasena. Tinagiragsak dayta dagiti ubbing iti klasek, ket nakaipaimaak pay iti sumagmamano a magasin kadakuada.

M. C., Estados Unidos

Seksual a Panangriribuk Pagyamanan kadagiti serye nga “Inton Awanen ti Seksual a Panangriribuk!” (Mayo 22, 1996) Idi inranudko ti magasin iti sabsabali, natakuatak nga adu a babbai ti nagyaman kadagiti singasing no kasano a maliklikan ti pannakariribuk ken no ania ti aramiden no mariribukka. Sumagmamano a lawas kalpasanna, napadasak a mismo ti mamolestia idiay panggedan ket impulongko dayta iti polisia. Nakomendaranak iti wagas ti panangtamingko iti situasion.

Impailimedna ti naganna, Alemania

Talaga nga agyamanak kadagiti artikulo. Addaakon iti maikadua a tawen iti sekundaria, ket napadasak met ti nariribuk, nupay awan ti nangibagbagaak iti dayta. Pinaregtanak dagitoy nga artikulo a mangipudno kadagiti nagannak kaniak ken mannursurok. Ita, maitakderakon ti bagik kadagiti manangriribuk.

K. Y., Japan

Maysaak a sekretaria nga agedad iti 21 ken nabiit pay ti seksual a panangriribuk ti amok kaniak. Idi a pampanunotek no kasanok a kasarita tapno mayebkasko ti rikriknak, naawatko daytoy a ruar ti Agriingkayo! Inikkak ti amok iti kopia a binasana. Nagpadispensar ken inkarina a dinanton uliten ti inaramidna kaniak.

D. N. I., Nigeria

Apresiarek ti panangipalgakyo iti daytoy nagpateg a banag, ngem sigun kadagiti retratoyo, dagiti laeng lallaki ti mangrirriribuk. Nalawag a nangiparangkayo iti mangidumduma a panirigan.

H. T., Estados Unidos

Kuna ti kaaduan a managsirarak nga ad-adu dagiti babbai a biktima ti seksual a pannakariribuk. Uray pay no kasta, binigbig dagiti artikulo a mariribuk met dagiti lallaki, babaen ti panangdakamat kadagiti espesipiko a pagarigan.​—ED.

Ipaganetget ti kaaduan nga artikulo maipapan itoy a tema dagiti laeng rumbeng nga aramiden ti babbai tapno masalaknibanda ti bagida ngem maliwayanda nga isuro dagiti lallaki a pagraemanda koma dagiti babbai. Ngamin, no awan dagiti manangriribuk, awan panangriribuk. Inlawlawag ti artikuloyo ti “Umiso a Kababalin Dagiti Lallaki.” Gapu itoy, rumbeng a makomendaran.

O. C., Taiwan