Agimtuod Dagiti Agtutubo . . .

Kasano nga Agbalinak a Gayyem ti Dios?

“KINASUNGDO.” “Personal a debosion.” Dagitoy a sasao ti masansan a pangiladawan ti tattao iti singgalutda iti kadekketan a gagayyemda. Ammom kadi nga iladawan met dagitoy a termino ti singgalut iti Naindaklan a Namarsua daytoy nakaskasdaaw nga uniberso​—a mabalin a magayyemmo ti Dios a mismo? Wen, saritaen ti Biblia ti kaadda ti nadiosan a debosion, ket dayta a balikas iramanna saan laeng a ti kinatulnog no di pay ket ti personal a singgalut iti Dios, kinasinged a tumaud iti managyaman a puso.

Impakita dagiti napalabas nga artikulo daytoy a serye nga agpadpada a posible ken makagunggona ti kasta a singgalut.a Ngem kasano a magun-odam daytoy a personal a pannakigayyem iti Dios? Saan a naisigud wenno automatiko a banag dayta a natawidmo kadagiti nadiosan a dadakkelmo. Imbes ketdi, daytat’ tumanor laeng babaen iti napudno a panagregget. Kinuna ni apostol Pablo ken ni agtutubo a Timoteo a ‘sanayenna ti bagina buyogen ti nadiosan a debosion kas kalatna.’ Wen, rumbeng nga agregget a kas iti panagregget ti atleta iti panagsanayna! (1 Timoteo 4:7, 8, 10) Rumbeng a kasta met ti aramidem tapno magayyemmo ti Dios. Ngem kasano a mairugim ti agsanay itoy a banag?

Personal a Pannakaammo iti Dios

Tangay tumanor ti nadiosan a debosion iti puso, masapul a punnuem ti pusom iti pannakaammo iti Dios. Nakalkaldaang ta idi napagsaludsodan ti nasurok a 500 nga agtutubo iti, “Kasano kasansan ti panagbasam iti Biblia a siksika?” 87 porsiento ti nagkuna iti “pasaray,” “manmano,” wenno, “pulos.” Nabatad a kaaduan nga agtutubo ti mangipagarup a makatuok ken makapasikor ti agbasa iti Biblia. Ngem di rumbeng a kasta! Usigem: Apay nga ikabesa ti dadduma nga agtutubo amin nga impormasion maipapan iti isports wenno dagiti liriko ti paboritoda a kanta? Agsipud ta interesadoda kadagidiay a banag. Umasping iti dayta, agbalin a makapainteres ti panagadal iti Biblia no maipamaysaka iti dayta. (1 Timoteo 4:15) Indagadag ni apostol Pedro: “Patanorenyo ti panagtarigagay iti awan lalaokna a gatas a kukua ti sao.” (1 Pedro 2:2) Wen, masapul a parnuayem, wenno patanorem, ti kasta a panaginteres iti Kasuratan. Sapulen daytoy ti panagregget, ngem makagunggona dagiti ibungana.b

Maysa a gunggona ket ti panagbasa ken panagadal iti Sao ti Dios ken dagiti naikugnal-Biblia a publikasion ti mangipalgak iti “sayaat ni Jehova.” (Salmo 27:4) Pinagbalin ti maysa nga agtutubo a Kristiano nga agnagan Amber a kalat a basaenna ti intero a Biblia. Daytoy gistay naalana ti makatawen. “Bassit dagiti bambanag iti biagko nga agkasapulan iti adu a tiempo ken panagregget ngem mangyeg iti adu a gunggona,” inlawlawag ni Amber. “Idi basbasaek, nariknak a kaslattay saksaklotennak ni Jehova a kas maysa nga ama ken sursuruannak. Adut’ nasursurok maipapan ken ni Jehova​—bambanag nga ad-adda a nangyadani kaniak ken nangtignay kaniak nga agbuteng kenkuana iti intero a panagbiagko.”

No basaem ti Biblia, maammuam ti namin-adu nga okasion a sisusungdo a panangtulong ti Dios kadagiti gagayyemna. (Salmo 18:25; 27:10) Maammuam a dagiti pagalagadanna kanayon nga isudat’ kasayaatan ken agpaay iti manayon a pagimbagantayo. (Isaias 48:17) Ti panangbasa kadagiti awan kaaspingna a kualidad ti Dios, kas iti ayat ken siribna, tignayennaka a mangtulad kenkuana. (Efeso 5:1) Ngem tapno maabbukay ta pusom kadagita nga impormasion, masapul met nga agmennamennaka. Bayat nga agbasbasaka, saludsodam ta bagim: ‘Aniat’ isursuro daytoy kaniak maipapan ken Jehova? Kasano a mayaplikarko daytoy iti panagpampanunot ken tigtignayko? Kasano nga ipakpakita daytoy a ti Dios ti kasayaatan pay laeng a pakigayyemak?’

Ti pannakaammo a magun-odam maipapan iti Dios babaen ti panagadalmo a siksika ken kadua ti kongregasion ti tumulong kenka tapno agbalinka a nadekdekket kenkuana iti sabali pay a pamay-an. Kuna ti maysa a proverbio dagiti Pranses: “Agkapanunotan dagiti pudno nga aggayyem.” Ngem kasanokay nga “agkapanunotan” iti Dios? Ilawlawag ti agtutubo a ni Denise: “No ad-adda nga agadal ken agsirarakka iti maysa a tema, ad-adda a maawatam ti panangmatmat ni Jehova iti dayta. Makatulong no ammom ti panagriknana iti maysa a banag.”

Nasken ti Nalinteg a Kababalin

Pilien ti Dios kas gagayyemna dagidiay laeng mangraem kadagiti moral a paglinteganna. “Ti pannakipagayamna adda kadagiti nalinteg,” kuna ti Proverbio 3:32. Ti maysa nga agtutubo a mangikagkagumaan nga agbalin a nalinteg ‘agannad iti pannagnana iti linteg ni Jehova.’ (2 Ar-ari 10:31) Kasano a ti kasta a natulnog a kondukta mayadanina ti tao iti Dios? Kinuna ni Jesu-Kristo: “Isu ayatento ni Amak, ket umaykaminto kenkuana ket makipaggiankaminto kenkuana.” (Juan 14:21-24) Anian a makaparagsak a ladawan! Agasem, ti dua a katan-okan a persona iti uniberso a naynay a mangpampanunot ken mangtartaripato iti maysa a tao! Daytat’ mapasamak kenka no annadam nga alagaden ti linteg ni Jehova.

Kaipapanan kadi ti panagbalin a nalinteg a rumbeng nga agbalinka a perpekto? Sigurado a saan! Ti panagkamali maigapu iti pagkapuyan dina kaipapanan a simmiasikan ‘iti dana dagiti bilbilin ti Dios.’ (Salmo 119:35) Usigem ti saritaen ti Biblia kadatayo maipapan ken Ari David. Nupay nasungdo a gayyem ti Dios, nakaaramid iti sumagmamano a nadagsen a kamali gapu iti pagkapuyanna. Nupay kasta, kinuna ni Jehova a nagna “iti kinatarnaw ti puso ken kinasingpet.” (1 Ar-ari 9:4) Kanayon nga impakita ni Ari David ti naimpusuan a panagbabawi iti aniaman a nakabasolanna ket inkagumaanna nga aramiden ti makaay-ayo iti Dios.​—Salmo 51:1-4.

Nupay ni David inayatna ti Dios, ammona no kasano karigat no dadduma ti agaramid iti umiso. Isu nga impakpakaasina iti Dios: “Iturongnak iti kinapudnom.” Wen, pinatanorna ti napasnek a panagamak, wenno panagbuteng, a mangsair iti Dios. Isu a naikuna ni David: “Ti kinapagayam ni Jehova addanto kadagiti agbuteng kenkuana.” (Salmo 25:5, 14) Daytoy ket saan a makapasidduker a panagbuteng no di ket nauneg a panagraem iti Namarsua ken ti makagunggona a panagamak a mangpagura kenkuana. Daytoy a nadiosan a panagbuteng isut’ pamuon a nakaikugnalan ti umiso a kababalin. Tapno iyilustrar, usigem ti ehemplo ti Kristiano nga agtutubo nga agnagan Joshua.

Nakaawat ni Joshua iti surat ti kaeskuelaanna nga agkuna nga agkursonada kenkuana ken kayatna ti “makirelasion” kenkuana. Naamiris ni Joshua, nupay kursonadana met, a ti pannakitimpuyog iti di manamati makaituggod iti imoralidad ken dadaelenna ti pannakigayyemna ken Jehova. Isu nga imbagana kenkuana a silalawag a saan nga interesado! Idi imbagana ken ni nanangna idi agangay no kasano a tinamingna ti kasasaad, indir-ina: “Ayna, Joshua, di la ket ta nasairmo ti riknana!” Simmungbat ni Joshua: “Ngem Inang. Kaykayatko laengen a sairen ngem ti masairko ni Jehova.” Ti nadiosan a panagbutengna, ti panagamakna a mapagurana ti nailangitan a Gayyemna, ti nangtignay kenkuana a mangtaginayon iti nalinteg a kababalin.

Sapulem Dagiti Naimbag a Kakadua

Nupay kasta, intultuloy ti agtutubo nga agnagan Lynn ti nagpailaw-an. Ti problema? Makitimtimpuyog kadagiti dakes a kakadua. (Exodo 23:2; 1 Corinto 15:33) Ti solusion? Panangsapul kadagiti baro a gagayyem! “No adda gagayyemmo nga agayat ken Jehova,” nakuna ni Lynn, “daytat’ tumulong kenka a mangtaginayon iti sensitibo a konsiensia ken agtalinaed a di mailaw-an. No karimonda ti dakes, kastanto metten ti panagriknam.”

Kinapudnona, ti di umiso a pannakigayyem ti kangrunaan a lapped ti pannakigayyem iti Dios. Binigbig ti 18-anyos a ni Ann: “Adda dakkel nga impluensia kenka dagiti kakaduam. Di agbayag, maituladkanton kadakuada. Impluensiaanda ti panunotmo. Ti saritaanda mabalin a kaaduanna maipapan iti sekso. Pagusiosuennaka. Pampanunotemton no kasano dayta.” Nagnakem ni Ann kalpasan a nailaw-an. Kunana: “Ammok a pudno daytoy. Nakiramanak iti imoralidad ket nagsikogak idi agtawenak iti 15.”

Kamaudiananna, naapresiar met laengen ni Ann ti kinapudno ti sasao ti Biblia: “Siasinoman, ngarud, a tarigagayanna ti agbalin a gayyem ti lubong ibilbilangna ti bagina a kabusor ti Dios.” (Santiago 4:4) Wen, kayat idi ni Ann​—ken determinado idi nga agbalin​—a gayyem ti lubong. Ngem nangibunga laeng daytoy iti agsasaganad a sanaang. Naimbag ta nagnakem ni Ann. Kasta unay ti babawina iti inaramidna ket nagpatulong kadagiti dadakkelna ken kadagiti panglakayen iti kongregasionna. Nakasarak metten iti baro a gagayyem. (Salmo 111:1) Babaen iti kasta unay a panagreggetna, nagbalin manen ni Ann a gayyem ti Dios. Ita, sumagmamano a tawen kalpasanna, maikunana: “Nadekdekketen ti relasionko ken Jehova.”

Babaen ti personal a panagadal iti Biblia, panagmennamenna, nalinteg a kababalin, ken naimbag a kakadua, mapatanormo met ti nadekket a pannakigayyem iti Dios. Nupay kasta, sabali met a banag ti panangtaginayon iti dayta a pannakigayyem. Kasano a posible a maaramidam dayta agpapan pay kadagiti pakarigatan ken personal a pagkapuyan? Daytoy a banag ti lawlawaganto ti masanguanan nga artikulo daytoy a serye.

[Dagiti Footnote]

[Ladawan iti panid 13]

Dagiti kadi kakaduak tulongandak nga agbalin a gayyem ti Dios?