Manipud Managbasatayo

Dagiti Karnabal Pagyamanan iti artikulo a “Ti Panangmatmat ti Biblia: Panangselebrar iti Karnabal​—Umiso Wenno Dakes?” (Hunio 8, 1996) Agnanaedak iti Brazil, ket makaparagsak unay a tiempo ti karnabal ditoy. Kanayon idi a masulisogak a makiraman kadagiti selebrasion. Ammok a dakes, ngem talaga a diak naawatan no apay. Ngem silalawag nga impakita daytoy nga artikulo a dagiti karnabal iramanna ti naariwawa a panagragragsak ket matmatan ti Dios dagita a selebrasion kas “ar-aramid a kukua ti kinasipnget.”​—Roma 13:12.

F. M. M., Brazil

Bakasion Pagyamanan unay kadagiti serye a “Panagbakasion?​—Ti Rumbeng a Maammuanyo.” (Hunio 22, 1996) Dimteng iti umiso a tiempo agsipud ta sumagmamano laeng nga aldaw kalpasanna, nagbakasionkami. Nakatulong unay dagiti singasing. Pagyamanan manen.

L. J., Estados Unidos

Lyme Disease Pagyamanan iti artikulo a “Lyme Disease​—Agpegpeggadkayo Kadi?” (Hunio 22, 1996) Kas doktor, nabiit pay a nakitak ti sumagmamano a pasiente nga addaan iti kastoy a sakit, ket mapasingkedak dagiti panagannad a dinakamatyo. Iti kaaduan a kaso, matagtagilag-an dagiti sintoma ti pasiente isu nga agsagaba iti napaut. Tinaming ti Agriingkayo! ti kita ti arthritis, a nasaknap idiay Estados Unidos. Dua a sabali pay a pathogen ti natakuatan idiay Europa, a sadiay saan nga agkurri dagiti kadawyan a panangeksamen ti laboratorio. Nasamay laeng dagiti antibiotiko para iti Lyme disease no saan pay a grabe ti kasasaad ket masansan a saanen a nasamay inton agangay.

I. S., Alemania

Kas agsagsagaba iti Lyme disease, nabigbigko a makaparegta unay daytoy nakaskasdaaw nga artikulo. Sapay koma ta amin a mangbasa iti dayta ti mangusigto a naimbag iti daytoy a sakit ken aramidenda amin a kasapulan a panagannad.

D. P., Estados Unidos

Saksakit iti Panagsursuro Talaga nga inapresiarko ti artikulo nga “Agimtuod Dagiti Agtutubo . . . Apay a Diak Makasursuro?” (Hunio 22, 1996) Agpakpakarigatak nga ageskuela gapu iti sumagmamano a rason a nadakamat iti artikulo. Iyaplikarkonto dagiti singasingyo. Pagyamanan unay.

R. C., Estados Unidos

Talaga a mapukpukawen ti interesko nga agadal ket diak maipamaysa ti panunotko idiay eskuelaan. Babaen ti panangyaplikarko kadagiti singasing iti artikulo, sapay koma ta rumang-ayton ti panagsursurok.

M. E. O., Uganda

Awan aniaman a sakitko iti panagsursuro, ngem talaga laeng a diak kayat ti agadal. Marigatanak met a mangikabesa kadagiti formula iti matematika. Bueno, dinakamat daytoy nga artikulo ti panangulit ken panangibalikas iti sasao kas tulong kadagiti di unay agpaut a parikut iti panagikabesa. Idi damo, impagarupko a minamaag no agbasaak a napigsa, ngem idi inaramidko dayta, makaparagsak gayam!

N. I., Japan

Pugante Pagyamanan iti panangipablaakyo iti kapadasan ni Franck Mannino, a napauluan “Maysaak Idi a Pugante.” (Hunio 22, 1996) Natignay ken naawatak no kasano ti kinabileg ken kinamanagayat ti Namarsua kadatayo, ni Jehova. Agserserbiak kenkuanan iti 30 a tawen, ket daytoy a kapadasan ti nangparegta kaniak a mangaramid iti amin a kabaelak iti trabaho a panangasaba bayat a siwayawayaak a mangaramid iti dayta.

E. B., Italia

Ti artikulo ti timmulong kaniak a mangapresiar iti pribilehio a tumabuno kadagiti Nakristianuan a gimong. Agkaraladawak a makigimong gapu ta diak maurnos ti bagik. Bassit laeng ti wayawaya ni Franck Mannino bayat a naibalud, ngem nabunga unay ti biagna.

D. W., Estados Unidos

Natignayak iti kinaregta nga impakita ni Franck Mannino, uray kabayatan ti pannakaibaludna. Nupay dakes idi ti rugrugi ti panagbiagna, maysa itan nga ekselente nga ulidan.

C. R., Estados Unidos