Ti Dalan nga Agawid iti Paraiso

GAPU iti panagtarigagay ti tao iti Paraiso ken ti dadakkel man ken babassit a panangikagumaan a mangparnuay manen iti dayta, mabalin a panunoten ti maysa a rumbeng a nagbalin koman ti daga nga agpaypayso a paraiso. Ngem saan met.

Imbes ketdi, impangpangruna ti sangatauan ti kinaagum, a masansan a mangkonkontrol, uray payen no pakadadaelan ti aglawlaw ken ti nadumaduma a sibibiag a bambanag. Gapu ta patienda a mangrimbawto ti material a kinabaknang, napukawen ti adu a tattao ti amin a namnamada a daytoy a daga maisublinto kas daydi paraiso ti Eden. Imbes ketdi, in-inanamaenda ti biag kalpasan ti ipapatay idiay langit kas ti kakaisuna a namnamada iti Paraiso. Daytoy a panirigan ipamatmatna, umuna, a ti panagtarigagaytayo kas tao iti Eden ket mapaayto nga agnanayon ken, maikadua, binaybay-anen ti Dios daytoy a planeta iti kinamaag ken kinaagum ti tao. Kastoy kadi nga agpayso? Ania kadi ti ipagteng ti masanguanan? Ken sadinonto ti pakapasaran iti dayta a masanguanan?

Paraiso​—Idiay Langit Wenno Ditoy Daga?

Dandani 2,000 a tawenen ti napalabas, idi makisasao iti agbabbabawi a mannanakaw a nailansa iti sibayna, kinuna ni Jesu-Kristo: “Makikaduakanto kaniak idiay Paraiso.” (Lucas 23:43) Kayat kadi a sawen ni Jesus a mapan idiay langit ti mannanakaw a kaduana? Saan.

Saan pay ketdi a pinanunot ti managdakdakes dayta. Apay a saan? Agsipud ta mabalin a pagaammona dagiti teksto iti Hebreo a Kasuratan, nga adda idi kaaldawanna, kas ti umuna a paset ti Salmo 37:29: “Ti sililinteg tawidennanto ti daga.” Insuro ni Jesus dayta met laeng a kinapudno, a kunkunana: “Naragsak dagiti naalumamay ti kaririknada, yantangay tawidendanto ti daga.” (Mateo 5:5) Maitunos daytoy a teksto iti kadawyan pannakaawagna a Kararag ti Apo, a kunaenna: “Maaramid koma ti pagayatam, kas sadi langit, kasta met iti rabaw ti daga.”​—Mateo 6:9, 10.

Isursuro ti Biblia a ti Dios pinarsuana ti daga, saan a ti langit, a pagtaengan ti pamilia ti tao. Kuna ti Saona a “pinarsuana [ti daga] a saan nga ongaong” no di ket “binukelna tapno isu ti pagyanan.” (Isaias 45:18) Kasano kabayag? “Isu a nangikabil kadagiti pamuon toy daga, a dinto maisina uray kaanoman.” (Salmo 104:5) Wen, “ti daga agtaeng iti agnanayon.”​—Eclesiastes 1:4.

Panggep ti Dios agpaay iti kaaduan kadagidiay agserbi kenkuana a pagbalinen daytoy daga a pagtaenganda iti agnanayon. Usigenyo no kasano a komentuan daytoy ti Sao ti Dios, ti Biblia. Ipakpakauna ti Salmo 37:11: “Dagiti naemma tawidendanto ti daga, ket maay-ayatandanto iti kinaruay ti talna.” Kasano kabayag? Kuna ti Salmo 37:29: “Ti sililinteg tawidennanto ti daga ket agtaengto kenkuana nga agnanayon.” Kadayta a tiempo, matungpalton ti teksto a kunana: “Ukradem [Dios] ta imam ket pennekem ti tarigagay ti isuamin a nabiag,” a kaipapananna, ti tarigagay a maitunos iti pagayatan ti Dios.​—Salmo 145: 16.

Kasano ngay dagidiay dida kayat nga aramiden ti pagayatan ti Dios? Kuna ti Proverbio 2:21, 22: “Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes, magudasdanto ditoy daga; ket dagiti nagulib, maparutdanto kenkuana.”

Naisubli a Paraiso

Iti mabiiten, maibanagton dagiti panangukom ti Dios iti daytoy nadangkes a lubong. (Mateo 24:3-​14; 2 Timoteo 3:1-5, 13) Ngem ispalento ti Dios ti “dakkel a bunggoy” ti tattao iti dayta sumungsungad a pannakadadael nga agturong iti aramidenna a baro a lubong.​—Apocalipsis 7:9-​17.

Kalpasanna, iwanwanto ti Dios ti naragsak a trabaho nga aramiden dagiti iturayanna a tattao a panangisubli iti intero a daga a paraiso a pagtaengan ti sangatauan. Ikari ti Biblia: “Ti let-ang ken ti namaga a daga naragsakdanto, ket ti tay-ak a langalang agrag-onto ket agsabongto kas iti rosa. . . . ta iti let-ang pumsuakto dagiti dandanum, ken barbaresbes iti tay-ak a langalang.”​—Isaias 35:1, 6.

Iti dayta a lumawlawa a Paraiso, awanton ti bisin, kinakurapay, iskuater, awan balayda a tattao, wenno napnuan-krimen a luglugar. “Addanto kinaruay ti bukel iti daga.” (Salmo 72:16) “Ti kayo iti away mangtedto iti bungana, ket ti daga mangtedto ti rang-ayna.” (Ezequiel 34:27) “Sigurado a bangonendanto dagiti balay ket agnaeddanto kadakuada; ket agmuladanto kadagiti kaubasan ket kanendanto ti bungada. Didanto mangbangon ket sabali ti agnaed; didanto agmula ket sabali ti mangan.” (Isaias 65:21, 22, NW) “Agtugawdanto a talaga, tunggal maysa iti sirok ti kayona nga higos, ket awanto ti mangpabuteng kadakuada.”​—Mikias 4:4, NW.

No Apay a Dadduma ti Mapan Langit

Nalabit bigbigen ti kaaduan a tattao a tartarigagayanda ti paraiso a daga. Natural dayta, ta pulos a saan nga intukit ti Dios kadakuada a tarigagayan ti langit; dida pay ketdi matukod no ania ti biag idiay langit. Kas pagarigan, iti pannakisaritana iti ministro ti relihionna a Church of England, ni Pat, nupay napeklan a kameng ti relihionna, kinunana: “Pulos a diak pinanunot ti mapan idiay langit. Diak kayat ti mapan, sa ania ngamin aya ti aramidek sadiay?”​—Idiligyo ti Salmo 115:16.

Pudno, isursuro ti Biblia nga adda a talaga ti mapan idiay langit a limitado a bilang ti tattao a 144,000. (Apocalipsis 14:1, 4) Ilawlawagna pay ti makagapu: “Pinagbalinmo ida a kas pagarian ken papadi iti Diostayo, ket agturaydanto a kas ar-ari iti daga.” (Apocalipsis 5:9, 10) Kaduada ti Arida, ni Jesu-Kristo a mangbukel iti daytoy a “pagarian,” ti baro a nailangitan a gobierno ti daga, nga ikarkararag dagiti Kristiano. Daytoy a gobierno ti mangtarawidwidto iti naan-anay a panagbalbaliw ti daga ken sangatauan.​—Daniel 2:44; 2 Pedro 3:13.

Nupay kasta, tangay ti tarigagay nga agbiag idiay langit ket saan a nainkasigudan iti tattao, ti naisangsangayan a panagtignay ti espiritu ti Dios ti “mangsaksi” kadagiti 144,000 tapno mariknada daytoy a naisangsangayan a “panagpangato nga ayab.” (Roma 8:16, 17; Filipos 3:14) Ngem nabatad, a saan a kasapulan ti kasta a panagtignay ti nasantuan nga espiritu iti sangatauan nga en heneral agsipud ta ti agnanayon a pagtaenganda ket iti paraiso a daga.

Isagsagana ti Naespirituan a Paraiso ti Dalan

Kasano a maikari ti maysa nga agbiag nga agnanayon iti Paraiso a daga? “Daytoy kaipapananna ti agnanayon a biag,” kinuna ni Jesus, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Iti pananginaigna iti natalna a relasion ti tao iti pannakaammo maipapan iti Dios, kuna ti Isaias 11:9: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova a kas dagiti dandanum saknapanda ti baybay.”​—Idiligyo iti Isaias 48:18.

Siempre, daytoy a pannakaammo ket saan laeng a basta pananggun-od iti adu a pannakaammo. Impluensiaanna ti personalidad ti maysa ken patanorenna dagiti nadiosan a kalidad, kas ti “ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel.” (Galacia 5:22, 23) Ikagkagumaan dagiti Saksi ni Jehova a patanoren a kanayon dagitoy a kalidad, ket uray itan, mabembendisionanda iti natalged a naespirituan a paraiso.​—Isaias 65:13, 14.

Anian a naigidiat ti naespirituan a kasasaadda iti lubong, a kumarkaro ti kinadakes ken kinarinukerna! Din agbayag, nupay kasta, dadaelenton ti Dios daytoy a nadangkes a lubong. Kabayatanna, aw-awisendakayo dagiti Saksi ni Jehova a sumarungkar​—wen, usigen​—ti naespirituan a paraiso a tagtagiragsakendan. Paneknekanyo a mismo nga agdaman a siuulimek nga iturturong ni Jesus, ti di makita a nailangitan nga Ari, dagiti masanguanan nga agindeg iti dayta baro a lubong iti akikid a dalan nga agturong iti naindagaan a Paraiso ken agnanayon a biag!​—Mateo 7:13, 14; Apocalipsis 7:17; 21:3, 4.

[Ladawan iti panid 8, 9]

Tagiragsakento dagiti makalasat iti panungpalan daytoy a lubong ti makipaset iti pannakaisubli ti daga kas paraiso