Napapaut ti Panagbiag ti Babbai Ngem Saanna a Kayat a Sawen a Nasaysayaat
ITI intero a lubong, makiasawa dagiti babbai inton natataengandan, basbassit laeng ti ipasngayda, ken napapaut ti panagbiagda. “Agbalbaliwen ti panagbiag dagiti babbai,” ipadamag ti magasin nga UNESCO Sources. Iti nagbaetan ti 1970 ken 1990, ti kinapaut ti biag ti maipasngay a babbai ket immatiddog iti uppat a tawen kadagiti nabaknang a pagilian ken nganngani siam a tawen kadagiti napanglaw a pagilian. “Kaipapanan daytoy a kadagiti nabaknang a rehion ita, agbibiag dagiti babbai iti promedio nga 6.5 a tawen a napapaut ngem kadagiti lallaki. Kadagiti napanglaw a rehion, ti naggidiatan ket lima a tawen idiay Latin America ken ti Caribbean, 3.5 a tawen idiay Africa ken tallo a tawen idiay Asia ken ti Pacifico.”
Nupay kasta, para iti adu a babbai, ti panagbiag a napapaut dina kaipapanan ti nasaysayaat a panagbiag. Kuna ti Our Planet, maysa a magasin ti United Nations, nga iti kaaduan a babbai iti lubong, dagiti kangrunaan a kalintegan ti tao ti kaskasdi a kasla “icing ti cake a dida pay naramanan. Kalkalikagumanda pay laeng ti ordinario a tinapay ken danum.” Kaskasdi a di pay la magun-odan ti minilion uray dagiti kangrunaan, kuna ti UN, agsipud ta babbai ti kaaduan kadagiti di makabasa ken makasurat, nagbakuit, ken napanglaw a tattao iti lubong. Agpapan pay kadagiti rinang-ayan, ingudo ti UNESCO Sources, “nalidem ti kadakkelan a paset ti ladawan para kadagiti babbai.”