Manipud Managbasatayo
Panagragragsak Agtawenak iti 12, ken talaga a nagustuak ti artikulo nga “Agimtuod Dagiti Agtutubo . . . Apay a Maaramid ti Dadduma nga Agtutubo Amin a Pagragsakanda nga Aramiden?” (Hulio 22, 1996) Sangkadamagko met idi ti kasta a saludsod. Idiay pages-eskuelaak, mabalinmo ti agpalista para kadagiti padaya, salaan, ken dadduma nga aktibidad. Masansan a kayatko ti mapan. Ngem tinulongannak ti artikulo a mangipateg a sungsungbatak ken ni Jehova dagiti piliek nga aramiden. Isu a sisisinged a makikaduaak laengen kadagiti Kristiano a gagayyemko.
A. S., Estados Unidos
Addada tiempo a mariknak ti karirikna [ti mannurat ti Biblia a] ni Asaf, a kas iti inlawlawagyo iti artikulo. Daytoy nga artikulo ti nangnayon iti tured a kasapulak tapno ammok ti makilangen idiay eskuelaan.
A. S., Japan
Pudno a talaga a marikna ti sumagmamano nga agtutubo a mapapaidaman wenno maikapkapisda agsipud ta saanda a “mapalubosan” a makipaset kadagiti nailubongan a padaya. Ngem saan a kastat’ panagrikna ti amin nga annak dagiti Saksi ni Jehova! No siak a mismo, kagurgurak dagiti maar-aramid kadagiti nailubongan a padaya, ket kasta met laeng ti panagrikna dagiti Kristiano a gagayyemko. Dakami—ken sigurado nga adu pay a sabsabali—ti di makarikna a maikapkapiskami!
C. H., Estados Unidos
Brewery Gulch Nagsuratak tapno iyebkasko a tinagiragsakko unay ti artikulo a “Nagtubo Dagiti Naespirituan a Sabong iti Brewery Gulch.” (Hulio 22, 1996) Impalagipna kaniak dagiti nagsayaat a kapadasan iti 21 a bulan a panagnaedko sadiay sumagmamano a tawenen ti napalabas. Damdamok idi ti mayadayo iti pamiliak. Dadduma kadagiti pamilia a dinakamatyo iti artikulo—dagiti Smith, Griffin, ken Pugh—nagbalinda kas inna, amma, ikit, ken uliteg kaniak. Tinulongandak nga agmataengan a kas Kristiano. Kaslattay kayatko ti makikadua manen kadakuada idi binasak ti artikulo. Malagipko amin ida buyogen ti kasta unay nga ayat ken panangapresiar.
P. A., Estados Unidos
Bulong ti Kamote Moro Pagyamanan iti artikulo a “Bulong ti Kamote Moro—Inaldaw a Taraon ti Minilion.” (Hulio 8, 1996) Idiay Africa, napateg unay ti kamote moro agsipud ta dayta ti kangrunaan a taraonmi iti adun a siglo. Idiay Nigeria, saanmi unay nga ammo ti maipapan kadagiti bulong, nupay kasta, dagiti ramut ti makaipaay kadakami kadagiti paboritomi a putahe, a kas iti gari ken foo-foo. Makapainteres a maammuan nga iti dadduma a paset ti lubong, maus-usar dagiti bulong saan laeng a pagagas no di pay ket kas naimas a taraon. Pagyamanan ken ni Jehova iti panangparsuana iti kamote moro!
J. S. E., Nigeria
Nabaliwan nga Ipangpangruna Kayatko nga ibaga no kasano a naparegtaak iti artikulo a “No Apay Binaliwanna Dagiti Ipangpangrunana.” (Hulio 22, 1996) Nagserbiakon kas amin-tiempo a managebanghelio iti nasuroken a 13 a tawen, ket saan a kanayon a nalaka ti mangpili kadagiti ipangpangruna iti kumarkaro ti rigatna a lubong. Iti kada tawen, ad-adda nga agbalbalin a karit ti panagtalinaed iti amin-tiempo a ministerio. Ti panangpanunotko no kasano a pinanawan ni Jeremy ti makagunggona a karerana kas warden ti pagitalimengan iti nakaparsuaan tapno agbalin nga amin-tiempo a ministro ti nangipatalged manen kaniak a makagunggona unay ti panangitultuloyko iti ministerio kas kangrunaan iti biagko.
N. C., Estados Unidos
Tawa iti Aanakan Nabiit pay a naammuak a masikogak. Gapu iti maysa a kamali a pamay-an ti panangagas, adda peggad nga addanto depekto ti maipasngay nga anakko. Tinulongannak ti artikuloyo a “Tawa iti Aanakan” (Agosto 8, 1996) a mangikeddeng a di iparegreg ti sikogko. Naawatko ti magasin makalawas sakbay a naammuak a masikogak.
M. C., Estados Unidos
Dyslexia Agyamanak unay iti artikuloyo a “Panangparmek iti Pannakapaay iti Dyslexia.” (Agosto 8, 1996) Manipud adda puotko, ammokon nga adda diperensiak, ngem diak ammo no ania dayta. Nabiit pay a narekonoser ti maysa nga espesialista iti Attention Deficit Disorder nga addaanak iti dyslexia. Ita, masursurokon no kasano nga usaren dagiti tammudok kas tulong iti panagbasak.
P. C., Estados Unidos