Manipud Managbasatayo

Panagtalek Maladingitanak idi agsipud ta liniputandak dagiti dadduma a gagayyem ken kakabagiak. Nangrugin a pagduaduaak ti kredibilidad ti amin nga adda iti aglikmutko. Ngem dagiti serye nga “Asino ti Pagtalkanyo?” (Pebrero 8, 1996) ti nangted kaniak iti natimtimbeng a panangmatmat iti panagtalek. Pagyamanan iti kasta a naintiempuan nga impormasion.

E. I., Korea

Iti adu a tawen, napadasak ti panangliput ni tatangko, a nangabuso kaniak, ti dua nga asawak, ken maysa a Kristiano a kabsat a lalaki. Nagtengko ti punto nga inkeddengko a diakon agtalek iti asinoman. Kinombinsirko ti bagik a diak kasapulan ti tattao. Ngem timmulong kaniak ti artikulo tapno agbalinak a natimtimbeng. Nupay nagrigat kaniak ti agtalek, ikagumaakto latta. Ita a tiempo, agbalinakton a naan-annad no asinot’ pagtalkak.

C. H., Estados Unidos

Matterhorn Binasak ti artikulo a “Ti “Naisangsangayan a Matterhorn.” (Pebrero 8, 1996) Ti retrato daytoy a nagpintas a bantay ti talaga a nangawis iti atensionko! Ti artikulo ti nangtignay kaniak a mangapresiar nga ad-adda iti panamarsua ti Dios.

J. W., Estados Unidos

Dagiti Mansanas Pagyamanan unay iti artikulo a “No Inaldaw a Mansanas ti Kanenyo Panagpadoktor Maliklikanyo.” (Pebrero 8, 1996) Pinarayrayna ti interesko, tangay adda nasurok a 100 a puon ti mansanas iti bassit a bangkagmi. Tagtagiragsakenmi ti mangtardaw ken mangatud kadagitoy a kayo tapno ad-adut’ maibungada. Apresiarenmi ti kinaumiso dagiti amin nga artikuloyo. Mangipapaayda iti makapabang-ar, mapagtalkan nga impormasion.

P. B., Estados Unidos

Di Mapakpakadaan a Kababalin Pagyamanan iti ekselente nga artikulo a “Di Mapakpakadaan a Kababalin​—Tengtenglenna Kadi ti Biagyo?” (Pebrero 8, 1996) Agtawenak laeng iti 20, ket agsagsagabaak iti di mapakpakadaan a kababalin. Masansan nga ikarkararagko ken ni Jehova nga ikkannak iti impormasion maipapan iti mapaspasamak kaniak.

M. A. C., España

Nangrugi a mariribukanak babaen iti sumken lattan, di mangraem a kapanunotan maipapan iti Dios iti uneg ti tiempo a nangrugiak nga agpayunir, ti panagserbi kas amin-tiempo a managebanghelio. Impagarupko no nakaaramidak iti di mapakawan a basol, ket namin-adun a nagsangitak. Diyo ngata mailadawan ti panagriknak ita a makitkitak dagiti nadeskribir a riknak iti naisurat nga artikulo. Kunak la no sisiak ti agsagsagaba iti kastoy. Pagyamanan kakabsat, iti kanayon a kaaddayo kadakami.

C. B., Nigeria

Namin-adu a binasak ti artikulo a buyogen iti lulua. Inladawannak iti kasta a detalye! Impagarupko idi nga agbagtitak sa metten wenno lugluganan dagiti demonio ti panunotko. Makapabang-ar a maammuan nga adda met gayam dadduma kadagiti kakabsat nga agsagsagaba iti isu met la a sakit.

K. T., Japan

Masansan idin nga agpatulongak ken ni Jehova iti daytoy a parikut. Ngem inkeddengko nga isardengkon agsipud ta pagarupko no barengbareng ken awanen ti makatulong kaniak. Ita maawatakon ti bagik, ket mariknak a nabang-aranak. Silalawag a maawatak a siaayat unay ti pannakaisurat ti artikulo. Masiertok nga agpayso a maseknan ni Jehova kadatayo.

J. F., Czech Republic

Pito a tawenen a tutuokennak dagiti di mapakpakadaan a kapanunotan. Impariknana kaniak a napaksuyan ken malmaldaangak. Mabainak unay ken iti panagriknak makabasolak no ilawlawagko dayta iti asinoman. Talaga nga impagarupko no agbagtitak idin. Idi nabasak daytoy nga artikulo, kasla diak mamati. Adda pay gayam sabsabali nga agsagsagaba iti mapaspasarak! Uray la a nagarubos dagiti luak. Saanak gayam nga agmaymaysa. Diak nakaaramid iti di mapakawan a basol, ket saan a makaunget ni Jehova kaniak.

S. B., South Africa