Manipud Managbasatayo
Gundawayan ti Babaknang a Nasion Dagiti Napanglaw Agtawenak iti 14, ket agyamanak unay kadakayo kadagiti serye a “Kanayonto Kadi a Gundawayan ti Babaknang a Nasion Dagiti Napanglaw?” (Nobiembre 22, 1995) Nangted ti maestromi iti geograpia iti assignment-mi nga agsurat maipapan iti tema a “Panagsagaba.” Nagsapulak kadagiti periodiko ken magasin ngem awan nasarakak a maitutop a mausar. Ngem idi kasapulak unayen, dimteng daytoy a magasin tapno agserbi a pakaikugnalan ti reportko. Naawatko ti kangatuan a grado iti klase, ket agyamanak unay kadagitoy nga artikulo.
A. O., Brazil
Di Mapakpakadaan a Kababalin Pagyamanan iti makapabileg nga artikulo a “Di Mapakpakadaan a Kababalin—Tengtenglenna Kadi ti Biagyo?” (Pebrero 8, 1996) Agsagsagabaak iti di mapakpakadaan a kababalin, ket makaparegta unay a maammuan a saan la a sisiak ti kastoy. Binuribornak unay sipud pay kinaubingko. Manipud nagadalak iti Biblia, sangkapanunotko a nakabasolak sa maibusor iti nasantuan nga espiritu. In-inut a nakontrolkon dagiti problemak. Anian a nagsayaat a maammuan a maawatan ni Jehova dagiti imperpekto nga adipenna!
A. B., Alemania
Apresiarek unay a maawatan ti Namarsua kadatayo daytoy a sagubanit ken “dakdakkel ngem kadagiti pusotayo ket ammona ti isuamin a bambanag.” (1 Juan 3:20) Pangngaasiyo ta itultuloyyo nga ipablaak dagiti kastoy nga artikulo; makaparegtada unay kadakami.
W. E., Switzerland
Diyo mailadawan no kasano a liniwliwanak daytoy nga artikulo. Adda nagdakes, nabassawang a kapanunotak, a mangituggod iti panagleddaang ken no dadduma panagpanggep pay idin nga agpakamatay. Ngem ita kaslattay naikkat ti nagdagsen nga awit iti abagak, bayat a maamirisko a saannak nga ilaksid ni Jehova no di ket kasta unay ti panagayatna kaniak.
I. B., Francia
Manipud bassitak, sangkabuggok dagiti imak. Sukimatek ti paglutuan iti mamitlo a daras, uray no kasapulan pay a rummuarak tapno aramidek dayta. Siguraduek no nakaluban dagiti kaserola, ken no imbalunetko met laeng a naimbag amin a ruangan. Maturogak a nabannogan gapu iti pannakidangadangko kadagiti di mapakpakadaan a kababalin. Pagyamanan iti artikuloyo.
M. P., Venezuela
Dagiti Robin Naallukoyak iti artikulo a ti “Mannakigayyem a Robin.” (Pebrero 8, 1996) Sumagmamano a tawenen ti napalabas, bayat nga agkalkaliak iti trensera iti hardin, nangngegak ti nakaay-ayat a kanta ti robin a nagbatay iti asideg a karuotan a mangpalpaliiw kaniak. Di nagbayag idi nga inkagumaak a tuladen ti unina, nagbatayen iti abayko iti trensera. Tinagiragsak ti robin a tuktoken dagiti insekto iti rabaw ti kapalpala a daga. Pangngaasiyo ta itultuloyyo ti mangipablaak kadagiti damag maipapan iti lubong dagiti ayup!
F. S., Alemania
Dagiti Iceberg Pagyamanan iti artikulo a “Dagiti Kristal a Palasio iti Baybay.” (Disiembre 8, 1995) Iti laengen panangbasak iti dayta a material ken ti panangiladawanko iti bagik iti sanguanan ti maysa kadagidiay nagdadakkel a bloke ti yelo, naabbukay unayen ti riknak kadagiti nakaskasdaaw a banag nga impaay ti Namarsua kadatayo, ni Jehova a Dios, a pagragsakantayo. Kas kinuna ti salmista maipapan ken Jehova idiay Salmo 104:24, “ti daga napno iti pagsanikuaa[nna].”
A. I. B., Brazil
Pang-eskuelaan a Salaysay Talaga a naabbukay ti riknak iti pakasaritaan ti pang-eskuelaan a salaysay ni Eric a “No Mabalbaliwak La Koma ti Agdama a Kasasaad.” (Pebrero 22, 1996) Inabbukaynak nga uray la padayawan ken pagyamanak dagiti nagannak kenkuana. Impaayda la ketdi ti adu nga oras ken regget a mangpadakkel iti anak nga addaan iti kasta a naisangsangayan a tured ken ayat para ken Jehova, nupay ubing pay laeng.
C. N., Italia