Ti Mannakigayyem a Robin
BABAEN TI KORESPONSAL TI AGRIINGKAYO! IDIAY BRITANIA
MABAYAG pay sakbay nga agbalin a maris kape ti kakaykayuanmi idiay Northumberland iti makaay-ayo a tiempo ti otonio, ipadlawen ti robin ti kaaddana. Ti nakalablabbaga a barukongna ken ti natinggaw a panagkantana ti mangnayon iti biag ken kinapintas ti hardinmi. Anian a nakaay-ayat a kadua!
Nalaka la a mailasin ti robin babaen iti maris kape ti olibo nga abaga ken ulona; ti maris kahel-nalabaga a barukong, karabukob, ken mugingna; ken ti puraw a tianna. Daytoy a panimbukelen a billit, kanayon a naparagsit, makaay-ayo ti natakneng a takderna, a 14 sentimetro ti kaatiddogna manipud sippit agingga iti ipus. Isu met la nga idi 1961, napili ti robin kas ti nailian a billit ti Britania.
Basbassit ti robin ti Britania ngem ti kaaspingna a taga America a pinanaganan dagiti taga Inglaterra a managkolonia idi unana iti robin, nagan a pamiliar kadakuada. Nupay kasta, adda naisangsangayan nga ugali ti robin ti Britania. Maisupadi uray ti robin iti kontinente ti Europa kas managbabain a billit nga agpakpakni latta iti uneg ti kakaykayuan.
No dumtengen ti otonio, nalawag nga agpakitan ti robin iti hardin ti Britania. Agtakder iti asideg ti tao nga agkalkali ken palpaliiwenna no adda rummuar nga igges. Pasaray, no agin-inaná ti hardinero, agdisso ti robin iti pala tapno paliiwenna ti aglawlaw. Nabayagen nga agdindinamag daytoy a nalukmeg ti pingpingna a billit a mangsurot iti desdes ti mole tapno sukisoken ti kakalkalina a bunton. Nadumaduma ti taraon ti robin—insekto, bukbukel, ken berry, agraman igges.
Anian a makaparagsak ti pannakasarak iti umok dagiti robin! Pakaawisan ti agassawa [a robin] ti aniaman a nakalukat a malinlinongan a ridaw wenno tawa. Nalaka la a maaramid dagiti umok kadagiti daan a masetera wenno naibellengen a kapetera, kadagiti nagpulipulipol a bárut, wenno uray pay iti bulsa ti panghardin a coat! Awan ti limitasion ti kinasiglat dagiti robin a mangbirok iti naisangsangayan a pagumokanda.
Ti robin ti maysa kadagiti kalalakaan a masuruan a billit a mangan iti dakulapyo. Bayat a sumungad ti kalam-ekna ken bumassiten ti suplay ti kadawyan a taraonna, mangikabilkayo iti bassit a taraon iti dakulapyo—naderder a keso wenno appan nga igges—ken ti dadduma iti rabaw ti di aggargaraw a banag iti asideg. Kalpasan ti mamindua wenno mamitlo a panangpakan bayat nga ib-ibusen ti robin ti taraon iti di aggargaraw a banag, makapagtalekton ket mangala iti sample manipud iti nakaukrad a dakulapyo. Nupay mabalin a pulos a dinto agdisso kadagiti ramayyo, manipud iti dayta ibilangnakayton ti robin kas gayyemna. Dinakayto malipatan no agsubli inton sumaganad a tiempo—no kasano a saanyonto met a malipatan ti gayyemyo, ti robin!