Manipud Managbasatayo

Angkit Naimpusuan nga agyamanak iti artikulo maipapan iti angkit. (Marso 22, 1990) Pudno a nagballigikayo a nangdeskribir itoy nakarikrikut a sakit iti simple, maawatan a termino. Agnanaedak ita a kadua ti anakko iti maysa a klinika a sadiay isut’ masubsubok maipaay iti angkit. Ti kasona kasla mainaig iti alergy iti taraon, tapuk, ken babassit nga insekto. Isuamin a masursuromi maitunos iti artikulo.

M. S., Pederal a Republiko iti Alemania

Bautismo Pagyamanan unay iti artikulo nga “Agimtuod dagiti Agtutubo . . . Masapul Aya nga Agbautisarak?” (Marso 22, 1990) Iti rabii sakbay ti pannakaawatko itoy a bilang, nagkararagak maipaay iti tulong tapno maammuak no sisasaganaakon nga agbautisar. Apag-isu nga inyebkas ti artikulo ti marikriknak. Inanamaek ti umadani a pannakabautisarko.

A. S., Estados Unidos

Iti artikuloyo nga “Agimtuod dagiti Agtutubo . . . Sisasaganaakon Aya a Mabautisaran?” (Abril 8, 1990), imbagayo a ‘nalabit ti karirikutan a saludsod iramanna ti relasionyo iti Dios.’ Pudno unay dayta! Idi nabautisaranak iti edad a 14, awan ti nasinged a personal a relasionko ken ni Jehova. Itan ammokon no aniat’ kaipapanan ti kaadda iti nasinged a personal a relasion iti Dios. Pudno a dayta ti sekreto.

J. R., Estados Unidos

Dakkel a tulong ti artikulo kaniak; ta agpabautisarakon iti sumaganad nga asamblea sirkito dagiti Saksi ni Jehova. Pudno a nakasaysayaat ti panangipakitayo iti dasig dagiti agtutubo kadagiti bambanag.

K. M., Pederal a Republika iti Alemania

Lupus Saanak a maysa kadagiti Saksi ni Jehova, ngem masapul a kablaawankayo iti Mayo 8, 1990, a bilang nga addaan kadagiti artikulo maipapan iti pulusion ken ti nagsayaatan nga estoria maipapan iti lupus. Nagsagsagabaakon iti lupus iti 14 a tawtawen. Ti pannakabasak iti estoria ni Robin ket kasla binang-aranna ti biagko. Isut’ nagtignay a sipopositibo, banag a masapul nga aramiden dagiti amin nga agsagsagaba iti lupus.

Y. M. B., Inglatera

Naparegtaak iti kasta unay iti pannakabasak maipapan kadagiti adu a Kristiano a kakabsat a lallaki ken babbai nga, inaldaw-aldaw, agpannurayda ken Jehova a maibturanda dagiti an-anayenda. Iti nabiit pay, nakariknaak iti panagsakit dagiti sakak (osteoarthritis iti patong) ket diak makatakder iti nasurok a maysa nga oras. Ngem agyamanak iti kaasi ni Jehova, nabaelak ti nagtultuloy a nagserbi kas amin-tiempo a ministro. Impakita ti estoria ni Robin no kasano ti panangaywan ni Jehova kadagiti kasapulan ti tunggal maysa kadatayo.

H. A., Japan

Agapa a Nagannak Iti artikuloyo nga “Agimtuod dagiti Agtutubo . . . Aniat’ Aramidek no Agapa dagiti Dadakkelko?” (Disiembre 8, 1989), insingasingyo a ti agtutubo basta agdispensar ket mapan iti kuartonan no agapa dagiti dadakkelna. Makitak a napeggad daytoy. No pumanawak iti lugar a pagapaanda, ti agresibo nga amak mabalin a mapapatayna ni nanangko! Ngarud makitak a napateg nga addaak a kanayon sadiay a mamagsina kadakuada no agapada.

P. M. E., Nigeria

Maysa a footnote iti artikulo ti nagkuna: “Dikam dakdakamaten dagiti kasasaad a sadiay ti manangabuso nga ama butbutngenna dagiti miembro ti pamiliana iti kinaranggas.” Agduduma dagiti kasasaad, ket ti maysa nga agtutubo mabalin a nainkalintegan a maseknan iti kinatalged ti maysa kadagiti dadakkelna. Ngarud ti footnote innayonna: “Kadagita a kaso, dagiti miembro ti pamilia mabalin a mapilitda a manggun-od iti tulong iti ruar tapno masalaknibanda manipud iti pisikal a pannakadangran.”—ED.