Manipud Managbasatayo
Pannakaadikto iti Crack Agyamanak unay iti artikuloyo iti Hulio 22, 1990, a “Pannakaadikto iti Crack—Ti Sasaaden ti Di Pay Naipasngay.” Kasapulantayo ti ad-adu pay a pannakaammo ti publiko ken ti panangedukar iti publiko maipapan iti daytoy a tema. Ammok daytoy ta agtartrabahoak iti maysa a programa a mangag-agas kadagiti masikog nga adikto iti droga.
D. P., Estados Unidos
Panagbekkel Agyamanak unay iti artikulo a “Dagiti Agbekkel—Mapagungar?” (Setiembre 8, 1990) Tinulongannak a mangapresiar no kasano ti panangipateg ni Jehova kadatayo ken kasapulan a raementayo ti biag a naited kadatayo. Sinursuruannak met a saan a pulos a mangtagtagibassit iti pannakabalin ti di kaikarian a kinamanangngaasi.
M. R., Estados Unidos
Nagbekkel ni nanangko idi agedadak pay laeng iti 14 años. Dakkel a paset ti bagik ti naikuyog a natay kenkuana. Ngem ita 26 ti edadkon ket maysan a dedikado nga adipen ti Dios. Ti artikuloyo, a mangipapaay iti pammaneknek a mabalin a mapagungar ni nanangko, ti mangibagbaga kaniak a ti paset ti bagik a napukawko mabalin a magun-odan no isut’ makitakto manen.
L. R., Estados Unidos
Libro nga “Iyimtuod ti Agtutubo” Binasak a buyogen ti napasnek a panaginteres ti artikulo a “Sungbat ti Managbasa iti Libro nga Iyimtuod ti Agtutubo.” (Setiembre 8, 1990) Di pay nabayag kasanguanan ti pannakaawatko itoy a bilang, inyawatko ti libro iti maysa a baketen nga estudiante ti Biblia, nga insingasingko nga itedna dayta iti apona a babai. Nupay kasta, iti sumaganad nga isasarungkarko kenkuana, ti baket a mismo nalpasnan a binasa ti libro. Impakitak kenkuana ti paset iti artikulo a sadiay saritaenna ti maysa a babai a “74 añosen” a nagunggonaan iti panangbasa iti dayta. Idi binasana daytoy, kinunana: ‘Umanamongak, pagarupko a masapul a maammuak pay ti linaon ti libro sakbay ti panangitedko iti dayta iti apok, ngem idin naan-anayen a naipamaysak ti panangbasbasa iti dayta.’ Naiparparna, isut’ 80 años ti “edadnan”!
K. H., Japan
Agtutubo—Karit iti ’90’s Ita a malem naawatko ti bilang a Setiembre 8, 1990, a mangtaming kadagiti agtutubo. Dagus a binasak dayta ket tinagiragsakko ti tunggal artikulo. Di pay nabayag mariknak nga awan ti uray maysa a makaawat kaniak. Ngem kalpasan ti panangbasak iti magasin, nabigbigko no kasano a biddutak. Agyamanak unay iti panangipategyo kadagiti agtutubo.
B. P., Estados Unidos
Dagiti Artikulo Maipapan iti Nakaparsuaan Ti Mayo 22, 1990, a bilang inawisnak. Linaonnat’ maysa nga artikulo maipapan iti Point Lobos, pudno a nakaskasdaaw a lugar maipaay kadagiti animal ken dagiti managayat iti nakaparsuaan. Tinulongandakami met a makadiskubre iti Haida, dagiti tattao nga agnanaed iti adayu nga amianan iti Pacifico. Siempre, saan a tunggal maysa ket makapan sadiay. Ngem babaen iti bassit a panangpampanunot, ti adu a paset ti panagbiahe mabalin a pagparangen babaen iti panagbasa ti material ken ti panangbuya kadagiti ladawan. Agyamanak kadagitoy a nagsayaatan pannakaiparangna nga artikulo.
R. F., Francia
Lupus Ti report maipapan iti lupus iti Agriingkayo! a Mayo 8, 1990, imbatinak a masmasdaawan. Bayat ti panangleppasko a mangbasbasa iti dayta, inugedak dagiti sasao a mangdeskribir iti kasasaadko. Kalpasanna, babaen iti maysa a kopia iti Agriingkayo!, sinarungkarak ti doktorko. Binasak ti report ket dagus nga imbilinna ti pannakasukimat ti darak. Itan maag-agasanakon maipaay iti resistensiak, saan a maipaay iti rayuma.
C. K., Pederal a Republika iti Alemania
Panagsikog ti Tin-edyer Agyamanak unay maipaay iti artikulo a “Panagsikog ti Tin-edyer—Aniat’ Maaramidan ti Ubing a Babai?” (Mayo 8, 1990) Idi Agosto 16, 1989, nabendisionanak iti maysa a nagpintasan nga ubing a babai. Idi masikogak, diak ammo ti aramidek. Mariribukak maipapan iti panagasawa ken ti panangtagibi ngem diak pay pinampanunot ti aborsion. Idi rimmuar ti artikulo, ammok nga inaramidko ti umiso a pangngeddeng. Itan tumabtabunoakon kadagiti Nakristianuan a gimgimong a kaduak ti anakko a babai ken manginanama nga agbalinton a maysa a dedikado a Saksi iti mabiiten.
D. A., Estados Unidos