Manipud Managbasatayo

Kararag iti Panagay-ayam Agyamanak kadakayo iti “Panangmatmat iti Biblia: Kararag iti Panagay-ayam—Umim-imdeng Aya ti Dios?” (Mayo 8, 1990) Ugalik ti agkararag iti Dios sakbay ti panagay-ayam iti bola. Bayat dagiti kangrunaan nga ay-ayam, agkararagak a maaddaanak iti bileg a mangabak. (Pulos a dikam nangab-abak kadagitoy nga ay-ayam.) Itan ammokon a dagita a karkararag saanda a maitunos iti pagayatan ti Dios.

M.A.L.S., Brazil

Agtutubo—Dagiti Karit iti ‘90’s Binasak ti libro a Dagiti Saludsod nga Iyimtuod dagiti Agtutubo—Dagiti Sungbat nga Epektibo idi damo a naawatko dayta. Dagiti artikuloyo maipapan iti agtutubo (Setiembre 8, 1990) ti nangparegta kaniak a mangirugi a mangbasa manen iti dayta. Ket kunaek, ad-adda pay a tagtagiragsakek dayta iti maikadua a daras!

B. B., Estados Unidos

Maysaak a 13-años nga ubing a babai, ket tarigagayak nga ibaga kadakayo a pudno a tinagiragsakko dagiti artikulo maipapan iti agtutubo. Addaanak iti suskripsion iti Agriingkayo! Ngem no makaawatak iti magasin iti koreo, idulinko ida. Daytoy ti nangawis kaniak, gapuna binasak ket pudno a natignayak iti dayta. Kalpasanna, inruarko dagiti dadduma a kopiak iti Agriingkayo! ket binasak ti dadduma kadagiti artikulo. Itan dinawatkon ken nanangko nga iyadalannak iti Biblia.

A. P., Estados Unidos

Panagbekkel Ni nanangko, maysa a matalek nga adipen ti Dios, kinettelna ti biagna kalpasan ti makabulan a nakaro a panagliday. Ti ipapatayna ti nangibati iti di madeskribir a babantot ken sakit ti nakem kadakami amin a mangay-ayat kenkuana. Ti kapanunotan a diakto pulos makita manen ti mamagbalin a narigrigat nga ibturan ti pannakapukawna. Ti artikuloyo (“Panangmatmat iti Biblia: Dagiti Agbekkel—Mapagungar?” Setiembre 8, 1990) ti nangiparikna kaniak nga ad-adda a “normalak” ken maragsakan, ta ammok a mainanamak iti panagungarna.

T. M., Estados Unidos

Naasi ti artikulo. Ngem saan kadi a matmatan dagiti malidliday dayta a kaasi a kas kalintegan iti panangala iti “nalaklaka a pamay-an”?

N. G., Estados Unidos

Dagiti awan ressatna a pannakarikna iti pannakaupay ti mamagbalin iti ipapatay a makaawis iti nakarot’ panaglidayna. (Idiligyo iti Job 10:1.) Ngem yantangay ti panagbekkel ket panangpapatay iti bagi met laeng, daytat’ pananglabsing iti linteg ti Dios ken ti di maawat a pili maipaay iti Kristiano. No ti panangpampanunot iti panagbekkel saplitenna ti maysa a tao, dina koma laglag-anen ti kaasi ti Dios ngem sapulenna koma ti tulong ti Dios a manglapped kadagiti makadangran-bagi a pagreggetan. (Santiago 1:14, 15) Mabalin a panunotenna ti nasaem a kinakawaw nga epekto ti ipapatayna iti biag dagiti inay-ayatna. Masapul a laglagipenna a ni Jehova “asideg kadagiti sitatarumpingay ti pusoda” ket iyallatiwda ti awitda Kenkuana. (Salmo 34:18; 55:22) Masapul met nga ipakaammona ti pakaupayanna kadagiti padana a Kristiano ket awatenna ti suportarda. Nupay kasta, no maparmek ti maysa a tao kadagiti rikrikna iti panagbekkel, maliwliwa koma dagiti natayan iti pannakaammo a ti masanguanan ti inay-ayatda ket adda iti im-ima ti maysa a naayat a Dios.—ED.

Panangsaranget iti Paralysis Kalpasan ti panangbasak iti “Palawaen ti Itutulong iti Dadduma” (Setiembre 22, 1990), basta tarigagayak laeng ti agyaman kadakayo iti kasta a makapabileg ken positibo nga artikulo. Gaput’ nasalun-atak, no dadduma agpanunotak no kasano a makapagballigiak iti sidong ti kasta met laeng a kasasaad. Datay amin addatayo iti sidong ti nakaro unay a panangparigat daytoy a lubong, ngem ni Tony Wood napagballigianna daytoy ket ad-adda pay babaen iti panagpannuray ken Jehova.

P. G. Inglatera

Dagiti Sine Agyamanak iti artikulo nga “Agimtuod dagiti Agtutubo . . . Kasanot’ Panangpilik iti Nasayaat a Sine?” (Agosto 8, 1990) Itatta kaaduan kadagiti agtutubo dida ammo ti kita ti sine a maibagay a buyaen ti maysa a Kristiano, wenno dida pay saludsoden kadagiti dadakkelda no masapul a buyaenda ti maysa a sine wenno saan. Pagay-ayatko ti kapanunotan a no ti maysa a tao nairana a mangbuybuya iti di umiso a sine, masapul nga iddepenna dayta.

J. N. S., Brazil