Manipud Managbasatayo

Panaglakot’ Dara Kayatko nga iyebkas ti panangapresiar kadagiti artikulo iti panaglako ken panagusar iti dara ken dagiti produkto ti dara. (Oktubre 22, 1990) Diak ammo a daytat’ nagdakkel gayam nga industria. Anian a pinaunegnat’ panangapresiartay iti Namarsuatayo, nga isut’ mangsalsalaknib iti ilina babaen ti panangiparitnat’ panagusar ti dara!

R. L., Estados Unidos

Agsina a Nagannak Ti artikulo nga “Agimtuod dagiti Agtutubo . . . Agsina dagiti Dadakkelko—Aniat’ Aramidek?” (Agosto 22, 1990) salaysayennat’ kasasaad nga umasping iti napasarak a kas naganak agarup innem a tawen ti napalabas. Ti pasetna nga agkuna a “ti panangipempen iti pungtot ken manangibales nga espiritu sabidonganna ti personalidadyo” pudno a pinatamaanna ti pagtaengan. Dagita a rikna nagtalinaedda kadagiti tallo nga annakko iti napalabas nga innem a tawen. Isut’ gapuna a pinatulodak ida ti kopia daytoy nga artikulo agraman maysa a surat a mangilawlawag no kasanot’ panagayatko kadakuada. Makapagtalekak a nasayaatto dagiti resultana.

E. B., Estados Unidos

No Mailimed ti Kanser Kayatko a maammuanyo no kasanot’ kadakkel ti pannakapabilegko babaen iti estoria ni Rie Kinoshita. (Oktubre 22, 1990) Ti determinasionna nga agserbi iti Dios buyogen ti amin a nabati pay a pigsana isut’ nangparegta unay kaniak. Yantangay nasayaat ti salun-atko, pinaregtanak a mangusar a nasaysayaat kadagiti Sabado ken rabii para iti panangaskasaba a trabaho. No mariknak a nabannogak unayen, malagipko ni Rie—ket rummuarakon!

T. F., Canada

Nagarubos ti luluak bayat a binasak dagiti kumbiksion ni Rie. Natignayak iti naragsak a kababalinna ken ti kinaanusna iti amin-tiempo a ministerio, agpapan pay addaan ti nakaro nga an-anayen.

M. H., Japan

Irarang-ay iti Naespirituan Agyamanak unay iti artikulo nga “Agimtuod dagiti Agtutubo . . . Kasano a Rumang-ayak iti Naespirituan?” (Setiembre 22, 1990) Nagadut’ naimbag a singasingna a mabalinko nga iyaplikar. Namindua a nabasakon. Inlistak metten dagiti naespirituan a kalatko (kas iti insingasingyo), ket ipaskilkonto ida iti didingko.

G. K., Estados Unidos

Agyamanak iti artikuloyo, padpadasekon a basaen ti Biblia 15 minutos iti inaldaw. Masansan nga adu nga oras ti busbusbosek. Nagadut’ naadalkon; nakaskasdaaw!

T. L. P., Canada

Gabsuon a Basura Nagustuak unay ti artikulo a “Ti Gabsuon a Basura—Gaburannatayto Aya?” (Setiembre 22, 1990) Mammano a tattao ti makaammo iti kaadu ti basura a mapatpataud iti inaldaw ken no kasanot’ kinapeggadna iti planeta. Agyamanak iti kinalawag ti artikuloyo.

B. S., Brazil

No Apay a Pinalubosan ti Dios ti Kinadakes Insalaysayyon daytoy a tema iti adu a wagas ken iti adun a beses iti napalabas. Nupay kasta, ti artikulo iti Oktubre 8, 1990 a bilang ket obra maestra. Isuamin, manipud iti arte inggat’ introduksion, ket nagpintas!

G. H., Estados Unidos

Tinulongannak ti artikulo a mangpabileg iti pammatik maipapan kadagiti rason iti kinadakes ken iti adda a namnamak iti masanguanan. Kas resulta, napatibker ti relasionko ken Jehova.

J. H., Estados Unidos

Jaguar Katorse ti edadko, ket nagsuratak tapno iyebkasko no kasanot’ kadakkel ti panangapresiarko iti artikulo a “Ti Naatap a Pusa iti Kabakiran.” (Agosto 22, 1990) Tinarigagayak a kanayon ti makakita iti jaguar. Tinulongandak a makakita. Pinagbalinyo a nabiag ti tema, ket nariknak a kasla aktual nga addak sadiay.

M. C., Francia