Manipud Managbasatayo

Ti “Agriingkayo!” Mapan iti Kolehio Maysaak a propesor iti Ingles, ket us-usarek ti magasin nga Agriingkayo! kadagiti kurso a komposision iti kolehio iti napalabas a pito a tawen . . . Dagiti artikulo iti Agriingkayo! saanda laeng a makaliwliwa ken makaisuro no di ket nangato met ti kalidadda no iti gramatika. Usarek ida tapno isitar ti umiso nga usar ti puntuasion, idiomatiko a sasao, piguratibo a lenguahe, ken umiso nga usar ti sasao.

J. D. G., Estados Unidos

Biag iti Makinruar a Law-ang? Pagyamanan iti makailawlawag nga artikulo “Adda Aya Biag iti Makinruar a Law-ang?” (Abril 8, 1990) Diak pay idi pulos nakaawat iti makapnek a sungbat iti daytoy a saludsod. Ngem ti lohikal a panagrasrason iti artikuloyo, a naibasar iti Biblia tinulongannak a mangapresiar nga anian a nagdakkel ti pribilehiotayo nga agbiag iti daytoy naisangsangayan a planeta.

A. A. C., Brazil

Panaglakot’ Dara Dagiti artikulo iti “Ti Panaglakot’ Dara Dakkel a Negosio” (Oktubre 22, 1990) ket naisangsangayan a makapainteres kaniak, ta naopreseranak iti dakkel-sueldona a trabaho a manggun-od iti dara maipaay iti banko ti dara. Kalpasan ti pannakabasak iti material, nakumbinsirak a daytoy ket di umiso. Nupay no nausarko koma ti kuarta, napanunotko dagiti makadangran nga epekto ti dara ket diak inawat ti trabaho.

R. M., Estados Unidos

Biddut a Pannakabigbig Iti Nobiembre 8, 1990, a ruaryo iti UFO, tinukoyyo daydi “pimmusay a Dr. James McCampbell.” Mabalin a ti talaga a kayatyo a tukoyen isun Dr. James McDonald, sientista a natay idi 1971. No kaniak, masansan a maud-udiak, ngem mabalin a maragsakan ti dadduma a managbasa a mangngegan a saanak pay a “pimmusay” iti terminal a kaipapanan.

James M. McCampbell, Estados Unidos

Kas panangbulod iti ebkas manipud ken Mark Twain, agparang a dagiti report maipapan iti ipapatay ni Mr. McCampbell ket napasobraan unay. Dispensarenmit’ panagkamali.—ED.

Panangpili ti Sine Sangapulot’ tawenko. Agyamanak iti artikulo nga “Agimtuod ti Agtutubo . . . “Kasanot’ Panangpilik iti Nasayaat a Sine?” (Agosto 8, 1990) Sumagmamano a tiempo kalpasan a binasak dayta, nagargariak nga agbuya iti di nasayaat a sine, ngem nalagipko ti balakad nga intedyo ket nagkedkedak.

M. B., Estados Unidos

Iti kinapudnona, adda dagiti tiempo a rimmuarak iti pagsinean. No dadduma, nupay kasta, nagtalinaedak nupay rebbeng a pimmanawak koma. Mabutengak a di mangpagusto kadagiti makunkuna a gagayyemko idinto nga ad-adda a rebbeng koma a maseknanak iti di panangay-ayo iti Dios. Nasarakak a makatulong unay daytoy nga impormasion. Agyamanak unay iti pannakaseknanyo kadagiti ub-ubbing.

G. B., Estados Unidos

Panangikkat iti Buli Masdaawkam unay a nakabasa iti artikuloyo a “Napnot’ Buli a Lubong?” (Agosto 8, 1990) a ‘ti laeng nakangingngina a reverse-osmosis filter’ ti epektibo a makaikkat iti buli a nailaok iti inumen a danum manipud kadagiti tubo iti balay. Nasaknap a mabigbigbig nga addada dadduma a pamay-an a panangikkat iti buli.

G. J., Estados Unidos

Dispensarenmi no naitedmi ti di umiso a kapanunotan. Dimi rinanta a di iraman dagiti sabali pay a wagas a panangikkat iti lead, kas iti ‘distillation systems.’—ED.

Gabsuon a Basura Insagutannak ti maysa a gayyemko iti maysa a suskripsion iti Agriingkayo!, ket nasarakak a nagdudumat’ linaonna ken makapainteres. Nadismayaak unay a nakabasa kadagiti artikulo maipapan iti gabsuon a basura (Setiembre 22, 1990) ta ngamin diak impagarup a narikut unay daytoy a banag! Nupay saanak a maysa kadagiti Saksi ni Jehova, magustuak dagiti nagsayaat nga artikulo kadagiti magasinyo.

L. R. A. Brazil