Manipud Managbasatayo

Nagsina a Nagannak Nagdiborsio dagiti nagannakko idi tallot’ tawenko. Iti las-ud ti 36 a tawen inamirisko no ania a lugar iti biagko ti pakaisaadan ni tatangko, a di nagmatalek ken ni nanangko. Ti agduadua pannakidasigko napaneknekan a diak madaeran. Ti artikuloyo nga “Agimtuod dagiti Agtutubo . . . “Kasanok a Pakilangenan ti Naganakko a Pimmanaw iti Pagtaengan?” (Nobiembre 8, 1990) sinaklawnat’ tunggal paset daytoy a banag. Amin a rikriknaek nailugarda itan, ket mariknak a kasla sidudungngo a sinallabaynak ni Jehova ket kinunana, ‘Maawatanka.’

G. M., Estados Unidos

Didigra iti Eroplano Kalkalpasko laeng a binasa ti artikulo a “Ti tuokko iti Flight 232” (Disiembre 22, 1990), ket diak matngelan ti panagarubos ti luluak a mangpampanunot iti mabalin a napasaran ni Lydia, a nakapukaw iti lakayna. Lima a bulan ti napalabas, napukawko ni nanangko gaput’ kanser. Napalalo unay ti yamanko iti naayat a Diostayo gaput’ panamagbalinna a posible a makitatayto manen dagiti ing-ingungotentayo babaen ti panagungar.

C. G., Francia

No Apay Pinalubosan ti Dios ti Panagsagaba Binasbasakon ti intero a paset ti Agriingkayo! manipud idi 1985, ngem diak pulos nakakita iti kasta a nalawag a sungbat iti saludsod a no apay a pinalubosan ti Dios ti panagsagaba kas iti naipaay iti Oktubre 8, 1990 a bilang. Asinoman a managpanunot a tao magun-odannat’ nalawag a sungbat babaen ti panangbasa kadagitoy a nagsayaat ti pannakaisuratna nga artikulo.

E. T. V., Brazil

Trabaho Kalpasan ti Eskuela Ti artikuloyo nga “Agimtuod dagiti Agtutubo . . . Ti Kadi Panggedan Kalpasan ti Panageskuela Tulongannak nga Agmataengan?” (Nobiembre 22, 1990) inikkannak ti sumagmamano a makatulong unay a naintiempuan a balakad. Tinulongannak a mangusig kadagiti pagsayaatan ken pagdaksan ti maysa a trabaho ket makapagdesisionak a nasaysayaat nga amang ngem no iti bukbukodak koma dayta. Pagyamanan!

M. R., Estados Unidos

Pudno a nagustuak ti artikulo. Tallopulo ket duat’ edadko, addaanak ti dua nga anak, ket agtartrabahoak iti dua a rabii iti maysa a restauran ti fast-food. Napalalot’ kinagaget dagiti ubbing a katrabahuak. Mabalin ngarud a daddumat’ masair iti termino a “fast-food joint.”

C. B., Estados Unidos

Maawatanmi a nalaing ti rikriknaen ti dadduma iti daytoy a banag. Nupay kasta, ti termino ket naadaw kas iti panagparangna iti “The Wall Street Journal.” Iti artikulo, inusarnat’ sasao a “fast-food restaurant.”—ED.

Saksakit iti Pannangan Gapu ta addaanak mismo iti panagleddaang ken anorexia, pudno nga inapresiarko ti simple a panangisalaysay ti Sosiedad kadagitoy a narikut a problema, nga ipinakita a dagiti babbai kabalinanda a parmeken dagiti saksakit iti pannangan. (Disiembre 22, 1990) Agyamanak iti panangtamingyo kadagitoy mammano a maisalaysay a naisangsangayan a suheto.

C. L., Francia

Resistensia Kalkalpasko laeng a nabasa ti artikulo a “Ti Resistensiatayo—Milagro iti Panamarsua.” (Nobiembre 22, 1990) Idi damo, kasla diak magustuan a basaen, ngem idi narugiakon, linuktanna dagiti matak iti no kasano ti kinamanangnibinibi ti Dios!

L. Z., Estados Unidos

Kinellaatnak ti artikuloyo. Ti panangirepresentar iti resistensia kas dagiti naarmasan a soldado ket di maitutop. Kas Kristiano, guraentayo ti gubat. Wenno ti kadi panangiladawan ket rebbeng a di matmatan a siseserioso?

D. C., Alemania

Ti panangidilig a naaramid ket saan met a panangisingasing iti natauan a pannakidangadang. Agpaay laeng a mangtulong kadagiti agbasbasa tapno maawatanda ti nakarikrikut a tema. Makapainteres, ti Biblia a mismo usarennat’ gubat kas pakaibatayan dagiti ilustrasion, nga iyaspingna dagiti Kristiano kadagiti naarmasan a soldado. (Efeso 6:16-17)—ED.