Manipud Managbasatayo
UFO’s Ti asosasionmi binusbosnat’ napalabas a 18 a tawen a mangpalpalutpot kadagiti makunkuna a nakitkitan nga UFO, ket kaaduan a pannakakita mabalin a maipagapu a kas panagbiddut. Bayat a pagdidiligenmi ti literatura ti UFO iti intero a lubong, ti artikuloyo (Nobiembre 8, 1990) ket maabrasa a panagbalbaliw. Padayawanmi dagiti mannurat ti kasta a naibatay iti kinapudno ken nalawag a panangiparang. Nupay no iti kadakkelanna diak makitunos iti pammatiyo, kayatmi nga iyebkas ti panangapresiarmi iti daytoy nga artikulo.
H. K., Central Research Network for Extraordinary Heavenly Phenomena, Alemania
Saksakit iti Pannangan Agyamanak unay kadagiti artikuloyo iti saksakit iti pannangan. (Disiembre 22, 1990) Nagsagabaak iti anorexia dua a tawenen ti napalabas, ket uray pay ita mariknak nga agsubsubliak kadagiti dati a wagas ken kababalinko. Ti iyaasideg ken Jehova pudno a natulongannak. Nagsayaat a makita no kasano a ti Agriingkayo! iyegnat’ tulong ken bang-ar kadagiti agsagsagaba iti kasta a naayat ken mannakaawat a pamay-an.
L. H., Inglatera
Masansan a maragsakanak iti wagas a panangsaklaw ti magasinyo kadagiti kontrobersial a topiko a masansan a di ikankano dagiti Katoliko. Ngem ti artikulo maipapan iti saksakit iti pannangan pinaaynak. Naaddanak ti anorexia iti 11 a tawen. Awaganyo dayta a pagkapuyan ken irekomendaryot’ panagturong iti Dios para iti pannakapakawan. Ngem ti anorexia ket saan laeng a maysa a pagkapuyan; daytat’ maysa a nakaro a sakit. Nakarkaro ngem ti panagtarigagay a mangay-ayo kadagiti dadduma; daytat’ panangpadas a pannakisango iti buteng a dika maay-ayat.
J. W., Alemania
Dimi pinakapuy ti kinaserioso dagiti saksakit iti pannangan no di ket impakitami a rimsuada manipud ‘nakaro a pannakariribuk ti emosion.’ Ti ‘buteng a di maay-ayat,’ kas ehemplo, masansan nga ipamatmatnat’ kangrunaan a panagkurang ti agsagsagaba. Gapuna ti artikulo impaganetgetnat’ panangpatanor ti panagtarigagay a mismo kadagiti pagalagadan ti Biblia ken panangpatanor iti pannakigayyem iti Dios. No adda dagiti rumsua a problema iti panangparmek iti daytoy a sakit, ti maysa nga agsagsagaba mabalin a maliwliwa iti pannakaammo a ti Dios ket manangpakawan ket maawatanna a nalaing ti gapuanan ti pagkapuyantayo.—ED.
Nagsina a Nagannak Ti artikulo a “Kasanok a Pakilangenan ti Naganakko a Pimmanaw iti Pagtaengan?” (Nobiembre 8, 1990) insublina dagiti rikna a napasarak iti kinaubingko idi pinanawannakami ni tatangko. Siam ti tawenko idi ket nariknak a nailibakak, napanawan, ken marurodak. Nagtalinaed kaniak dagitoy a rikna agingga nga iti maysa nga aldaw binasak ti Salmo 27:11. Nabigbigko idin a ni Jehova ti nangaywan kaniak a kas iti maysa nga Ama.
H. S., Estados Unidos
Ti salmo kunaenna: “No da ama ken ina baybay-andak, ni ngad Jehova pidutennakto.”—ED.
Tallo a tawenen ti napalabas nagdiborsiokami ken lakayko. Idi napan a tawen pinanawanna ti ili a di nagpakpakada kadagiti annakna. Nakarot’ emosional a panagsagabada ket mariknada nga isut’ makagura kadakuada. Nagballigi ti artikulo ta impakitana a dagiti annak saanda a mapabasol. Namnamaek a dumtengto ti panawen a patienda dayta.
L. M., Estados Unidos
Maysaak nga ina a tallot’ annakna, ket nairamanak iti riribuk ti panagdiborsio dagiti nagannakko. Dagiti artikuloyo tinulongandak a mangbalbaliw iti kapanunotak manipud iti makadadael a nagbalin a makapaimbag. Kalkalpasko laeng ti surat a maiturong ken tatangko, ket padpadasek a risuten ti problema nga adda iti nagbaetanmi.
K. Y., Japan
Quadriplegic Agyamanak iti artikulo nga “Imbagada Kaniak Diakto Makapagna manen!” (Agosto 22, 1990) Kalpasan ti nakaro nga aksidente idi 1980, nagbalinak met a quadriplegic. Kaawatan, kaaduan a tattao dida ammot’ kaipapanan ken saklawen daytoy. Ngem ti artikulo ipaaynat’ maitutop nga impormasion a kasapulan ti tattao tapno makatulongda iti dadduma nga agsagsagaba kadagiti resulta ti nakaam-amak a pannakadangran.
W. K., Estados Unidos