Manipud Managbasatayo

Narcolepsy Tallopulo a tawenen ti napalabas naresitaak nga addaan iti narcolepsy. Iti intero a panagbiagko inibturak dagiti parparikut a tumaud iti pannakaturog iti di umiso a tiempo. Agsipud ta makaturogak kadagiti Nakristianuan a gimgimong, daddumat’ agkuna a bassit ti panangapresiarko kadagiti naespirituan a bambanag. Dagiti panangikagumaan a mangilawlawag iti kasasaadko ket awan ti mamaayna. Ngarud, agyamanak iti nagsayaatan nga artikuloyo (Abril 8, 1991) maipapan iti nakaskasdaaw a sakit a pannaturog.

R. N., Alemania

Panagdayaw kadagiti Natataengan Agyamanak kadagiti artikuloyo maipapan iti “Dayawenyo Kadi dagiti Natataengan?” (Marso 22, 1991) Kalpasan iti 40 a tawen a matalek a panagserbi iti Dios, ni nanangko kasapulannan iti amin-tiempo a panangaywan gapu iti sakit nga Alzheimer. Ti kalendario nga impablaak ti Watch Tower Society napaneknekan a dakkel a tulong, ta dagiti adu a bisitana isuratda dagiti nagnaganda iti petsa ti ibibisitada. Ngarud mabalinko nga ipalagip kenkuana a saan laeng a sisiak ti bisitana, ta nasurok a kagudua kadagiti petsa ti napno kadagiti nagnagan! Kasta met, isut’ makaaw-awat iti nagsayaatan a pannakaaywan manipud kadagiti kamkameng ti nursing home agsipud ta ammoda a nakaad-adu ti interesado iti pagimbaganna. Agyamanak iti pannakaseknanyo kadakami.

W. J. H., Estados Unidos

Ni nanangko, a paralisado manipud iti siket nga agpababa, dinan malapdan ti isbona wenno iblengna. Binigat isut’ ugasanmi a naan-anay ken sukatanmi dagiti abbong ti kamana. Isut’ masukatan ken mapakan, ket masansan a kasapulanna ti pannakaagas. Ti asawak ken dagiti annakko ket pudno a makatulongda, ngem ti dakdakkel a rebbengen adda kaniak. Addada kanito a maupayak, ket ti espiritu ti panagsakripisio kankanayon a kasapulan. Ngarud kasta unay ti rag-ok idi nabasak dagiti artikuloyo. Agyamanak iti naimpusuan unay.

L. D., Italia

Ulidan para kadagiti Kakabsat Ti artikuloyo nga “Agimtuod dagiti Agtutubo . . . Kasanot’ Panagbalinko nga Ulidan dagiti Addik?” inapektarannak iti kasta unay. (Abril 8, 1991) Gaput’ siak ti inauna kadagiti tallo nga annak, ti laeng makunak ket tarigagayak a nabasak koma dayta nga artikulo idi ubingak. Itan addaanakon iti dua nga annak ket mabang-aranak ta addaanda ti kasta a nasayaat a balakad a suroten.

L. K., Alemania

Panagaw-awir Agyamanak iti kasta unay iti artikulo nga “Agimtuod dagiti Agtutubo . . . Kasanoak nga Agbalin a Naimbag a Para-Awir?” (Marso 8, 1991) Naawatko dayta iti koreo bayat nga aw-awirek ti innem-tawenna a kabsatko a lalaki. Bayat ti panangbasak iti dayta, imbagak kenkuana a pidutenna dagiti ay-ayamna. Kalpasanna nakagtengak iti parapo a sadiay nadakamat a ti pananggunggona iti nasayaat a kababalin nasaysayaat ngem ti nakaad-adu a pammutbuteng. Pinadasko daytoy, ket nagkurri! Inapresiarko met ti paset a sadiay nadakamat a saan a nasayaat a kunaen iti ubing a maag wenno nengneng. Aw-wagak ida idi iti maag, ket itan mabigbigko a daytoy ket kinamaag iti biangko.

A. L., Estados Unidos

Asbestos Kas maysa a nasanay nga Asbestos Project Worker, kayatko nga ibaga a kasta unay ti panangtagiragsakko iti natimbeng nga artikulo a “Ti Estoria ti Asbestos.” (Marso 22, 1991) Kas paset iti pannakasanayko, nagdengngegak kadagiti palawag manipud kadagiti espesialista iti kanser. Maysa a doktor ti nangpaneknek a ti gundawayyo a maaddaan iti dakes nga epekto iti asbestos ket dakdakkel no agsigariliokayo. Kas gagangay, dagiti artikuloyo ket umiso ken napnuan impormasion.

J. M., Estados Unidos

Lupus Impatulodannak ti pangamaek iti artikulo nga addaan iti estoria ni Robin Kanstul “No Kasanot’ Panangibturko iti Lupus.” (Mayo 8, 1990) Binasak ti intero a magasin ket tinagiragsakko dayta. Siak agsakitak met iti lupus, ket pulos a di imbagbaga dagiti doktor ti kagudua iti imbaga ti artikulo. Agyamanak, Robin Kanstul, iti panangibagam. Agyamanak, Agriingkayo!, iti panangipablaakyo iti estoriana. Itan ammokon a saan laeng a sisiak, ket masursurokon ti agibtur.

R. B., Estados Unidos