Manipud Managbasatayo
Ipapatay ti Ubing Dagiti artikulo nga “Apay Innala ti Dios ti Anakko?” (Pebrero 8, 1991) ken “Ti Ipapatay ti Anak—Apay a Pinalubosan ti Dios?” (Marso 8, 1991) iti “Ti Panangmatmat iti Biblia” nangipaayda iti liwliwa a kasapulak unay iti apag-isu a tiempo. Idi Enero 9, nangipasngayak iti maysa nga ubing a natay kalpasan iti tallo nga oras. Nakapungtotak iti bagik met laeng ket inturongko pay iti di umiso a panagpungtotko iti Dios. Kalpasanna nabasak dagitoy nga artikulo. Kasta unay a panangngaasi ti Dios ti nailanad kadagiti pinanid, ket kasta unay ti panagsangsangitko. Agyamanak iti inanama nga impaayyo idi maladingitanak ken malidliday.
C. K., Japan
Team ti Eskuelaan Agyamanak iti artikulo nga “Agimtuod dagiti Agtutubo . . . Rebbeng Kadi a Makikaduaak iti Team ti Eskuelaan?” (Hunio 22, 1991) Inawis ti eskuelaan dagiti amin nga estudiante nga interesado a makikadua iti team ti volleyball. Kankanayon a tinarigagayak ti makipaset kadagiti ay-ayam. Ngem siaannad a pinanunotko dayta. Dagiti panagay-ayam ken panagsanay makigiddanda iti ministeriok a panagebanghelio ken kadagiti Nakristianuan a gimgimong. Gapuna kalpasan ti panangbasak iti artikulo, nakumbinsirak a saan a rumbeng a makikaduaak iti team.
M. C. P., Brazil
Dagiti Judio ken Kristiano Kalkalpasko pay laeng a binasa dagiti artikulo maipapan iti tema a “Dagiti Kristiano ken Judio—Mapagkaykaysanto Pay Aya?” (Hunio 22, 1991) Kas maysa a Judio, dimmakkelak a pagaammok nga adda nagdakkelan a di pagkinnaawatan “ti pinili nga ili” ken “ti goyim.” Naisuro met kaniak ti masanguanan nga idadateng ti Mesias, ngem saan a nalawag a maawatan. Maysa nga aldaw simmarungkar dagiti Saksi ni Jehova iti ruanganko ket sinaritada ti maysa a masanguanan a talna ditoy daga a mismo. Kasla makaawis dayta! Nalawag, dagiti Saksi saanda a mainaig kadagiti simbaan. Kasta met, daydayawenda ti Dios ni Abraham, Isaac, ken Jacob. Ngarud inapresiarko a ti panagbalin a pudno a Kristiano dina laksiden ti tawidko a Judio. Ngarud inapresiarko, nga ad-adda ngem dagiti sasao, dagiti nabiit pay nga artikulo, ket inanamaek nga ad-adu pay a tattao ti makakita iti rumimrimat a nagdumaan dagiti Saksi ni Jehova ken dagiti dadduma a relihion.
N. S., Estados Unidos
Panangbalbaliw iti Kinataoyo Nupay no pinadasko a parmeken ti dakes nga ugali a masturbesion, naupayak iti panagsubli. Nupay kasta, babaen kadagiti serie dagiti artikulo maipapan iti tema a “Rebbeng Aya a Baliwam ti Kinataom?” (Hulio 8, 1991), nakasuroak kadagiti lima nga addang a mabalinko a panangbalbaliw iti bagik. Pinabilegko ti determinasionko a mangparmek iti dakes nga ugalik.
R. H., Japan
Asbestos Agyamanak unay iti artikulo a “Ti Estoria ti Asbestos—Mangispal-Biag Nagbalin a Makapapatay” (Marso 22, 1991) Nagtrabahoak iti maysa a paktoria ket masansan nga agtrabaho a mangusar iti asbestos. Nupay kasta, gaput’ diak ammo no kasano kapeggad ti material, nagtrabahoak nga awan iti pangsalaknib nga addang a naisingasing iti Agriingkayo! Ngarud makagunggona ti artikulo kaniak ken kadagiti katrabahuak, ta nabaelak a sinarita ti maipapan iti banag iti inaldaw a panagtataripnongmi maipapan iti kinatalged.
J. R. T., Brazil
Adda aksidente iti trapiko a pakairamanan ti asbestos, ket dagidiay a makipaspaset iti panangalaw dida ammo no kasano kapeggad ti pannakaisarang iti material. Nabasak iti artikuloyo sumagmamano nga aldaw sakbay daytoy a pasamak. Kas maysa nga enheniero, nabaelak ti nangipaay iti panangiwanwan tapno ti panangalaw ket maibanag a sitatalged.
D. C., Brazil
Agkanta a Tumatayab Pagyamanan iti makaawis nga artikulo maipapan kadagiti agkanta a tumatayab iti Mayo 22, 1991, a bilang. Ti asawak pakpakanenna dagiti tumatayab iti makinlikud a paraanganmi iti adun a tawtawen, ket tinagiragsakmi a dua ti mangbuybuya kadakuada. Ngem kalpasan ti panangbasak maipapan iti di nakapapati a pamay-an ti panangpataud dagiti tumatayab kadagiti nota, itan imdenganmin ida a naimbag. Agyamankami iti kasta unay iti nagpintasan ti pannakaisuratna a deskripsion iti sabali pay a pagsidsiddaawan nga aramid ni Jehova.
J. S., Estados Unidos