Manipud Managbasatayo

Bakasion iti Pagtaengan Ti artikuloyo (Hunio 22, 1990) ket kasla naisurat a maipaay laeng kaniak. Amin dagiti rekomendasion ket nagsayaatanda, kas iti panangaramid kadagiti bambanag a maipaay kadagiti dadduma, panagtrabaho iti balay, panangpasayaat iti kuarto, panangbisita kadagiti lokal a pakaawisan, ken ti ad-adu a panagbasa iti Biblia. Yantangay ages-eskuelaak pay laeng, adda pito a lawas a bakasionko iti kalgaw. Pagyamanan iti tulongyo. Busbosekto daytoy a tiempo a nainsiriban.

M. K., Pederal a Republika iti Alemania

Toreo Ti artikuloyo maipapan iti toreo (Hulio 8, 1990) ket nakapatpateg. Kaaduan nga agtutubo idiay España ti mapan laengen kadagiti panagsasalisal iti soccer ngem iti kasta a nakalalaaw nga aramid, ngem ipilit dagiti ahente ti biahe ti ipapan dagiti turista iti toreo. Ti entablado a paglalabanan, no labananen ti picador ti toro, ket narangranggas pay ngem ti deskripsionyo, ta masansan a masugatan dagiti mausar a kabalio.

C. M., Pederal a Republika iti Alemania.

Rebolusion a Pranses Pagyamanan iti artikuloyo maipapan iti Rebolusion a Pranses. (Disiembre 22, 1989) Gaput’ maysaak nga Americano a kaputotan ti Pranses, nakitak nga aduan impormasion ken makapainteres ti artikulo. Apresiarek ti kinanadumaduma ken ti adu a saklawen dagiti artikulo nga agparang iti Agriingkayo!

J. F. S., Estados Unidos

Lupus Nagsakitak iti agarup innem a bulan, ket di ammo dagiti doktor no aniat’ sakitko. Sumagmamano nga aldaw kalpasan ti panangbasak iti artikuloyo maipapan iti lupus (Mayo 8, 1990), pinatalgedan dagiti resita nga addaanak met iti lupus. No saan a maigapu itoy nga artikulo, awan koma ti pangripiripak no aniat’ sarsaritaen dagiti doktor. Gaput’ adda ammok maipapan iti sakit, nakapagsaludsodak kadagiti saludsod a diak koma maisaludsod. Agyamanak unay iti pananglawlawagyo kaniak.

K. S., Inglatera

Dinosaurs Kas maysa nga arkeologo ken geologo, tinagiragsakko dagiti artikulo ti Agriingkayo! maipapan iti dinosaurs. (Pebrero 8, 1990) No maipapan iti tiempo ti panagpukawda, kinuna dagiti artikulo a dagiti tedtedda ti tao adda kadagiti suson ti batbato iti ngatuen dagiti naglaon kadagiti tedtedda ti dinosaurs ket adda suson ti batbato iti nagbaetanda. Iti adu a paspaset ti lubong, dagiti suson ti batbato iti baetda, wenno strata, naglaonda met kadagiti tedtedda. Adu a baro a klase, wenno kita, dagiti animal ti agparang kadagitoy a suson, kas kadagiti elepante, kas-sable ti ngipenna a pusa, ken sumagmamano a kita dagiti tumaray laeng a tumatayab. Daytoy nabileg ti panangisingasingna a mangparparsua pay laeng ti Dios kadagiti baro nga an-animal kalpasan ti pannakapukawen dagiti dinosaurs ket dagiti dinosaurs nagpukawda bayat ti panawen ti maikanem a panamarsua.

G. S., Canada

Saan nga espisipiko nga ibaga ti Bibila ti tiempo ti panamarsua wenno ti panagpukaw dagiti dinosaurs. Nupay kasta, dagiti komento ni G. S. ket makapainteres.—ED.

Panangibtur iti Kissiw No maipapan iti kissiw (Hunio 22, 1990), makitak nga adut’ tattao a di makaawat iti dayta. Ibaga dagiti tattao kaniak a maalimonko ti dilak, ngem kuna dagiti doktor nga imposible dayta iti pisikal. Naibaga met kaniak nga adda demoniok gapu iti kunaen ti Biblia idiay Mateo 4:24. Gapu iti panangidumduma, di palubosan dagiti tattao ti panangaramid dagiti kissiw kadagiti dadduma a banag. Ngem iti kinapudnona, bassit laeng ti imposible kadakami.

V. E., Australia

Adu a di panagkikinnaawatan ti napasamak maipapan iti Mateo 4:24, isu a mangibaga a pinaimbag ni Jesus ti “naluganan ti demonio ken kissiw ken dagiti paralitiko a tattao.” Nupay kasta, ti naannad a panangbasa iti konteksto ipalgakna a pudno a pagdumaen ti Biblia ti naluganan ti demonio ken dagiti pisikal a saksakit a kas ti kissiw.—ED.