Manipud Managbasatayo
Ay-ayam iti Computer Agtawenak iti 15, ket kayatko ti agyaman iti artikulo nga “Agimtuod Dagiti Agtutubo . . . Rumbeng Kadi nga Agay-ayamak Kadagiti Ay-ayam iti Computer Wenno Video?” (Agosto 22, 1996) Talaga nga impakitana ti pagdaksan dagidiay nga ay-ayam, ket tumulongto kadagiti Kristiano a mangtingiting iti pagimbagan ken pagdaksan ti panagay-ayam kadagita.
F. R., Indonesia
Agtawenak iti 17, ket pagay-ayatko idi dagiti naranggas nga ay-ayam iti computer. Impagarupko no didak apektaran, ngem nagbalinak nga adikto unay kadagitoy nga ay-ayam—nangnangruna iti inladawanyo a naranggas a kita. Ita, dinadaelkon amin a disk ti computer-ko a mainaig iti kinaranggas ken dara. Ti resultana? Nasaysayaaten ti riknak, ken ad-adun ti tiempok nga agadal, agsursuro, ken agsao maipapan ken ni Jehova a Dios.
S. A., Grecia
Kinabirhen Pagyamanan iti ababa ngem nagsayaat nga artikulo a napauluan “Kinabirhen—Apay?” (Agosto 22, 1996) Kadagitoy a panawen, no pampanunoten dagiti tattao a nalaadka no piliem ti agbalin a birhen, talaga a makaparegta a makita dagiti agkabannuag, naimnas a tattao a mangitantandudo kadagiti pagalagadan ni Jehova. Pagyamanan manen!
R. D., Estados Unidos
Dagiti American Indian Kayatko nga iyebkas ti panangapresiarko kadagiti serye a “Dagiti American Indian—Aniat’ Masakbayanda?” (Setiembre 8, 1996) Binasak amin dagiti artikulo ket basaekto manen ida. Ti paset maipapan iti panagungar ti nangnangruna a nakatukay kaniak.
S. B., Italia
Dagitoy pay laeng nga artikulo ti nangabbukay iti riknak. Tinulongandak a mangamiris a saan idi a nasayaat ti panangmatmatko kadagiti Indian ken saan a maitunos kadagiti nadiosan a prinsipio. Manipud idi ages-eskuelaak, basta minatmatak dagiti Indian kas narungsot unay a tattao. Dagiti libro ti historia didakam inikkan iti umiso a panangmatmat iti lubong iti aglikmutmi. Dagiti artikuloyo ti timmulong kaniak a mangtarus iti nakalkaldaang a kasasaad dagiti Katutubo nga Americano—sabali pay a pagarigan a “ti tao inturayanna ti tao a maipaay iti pagdaksanna.”—Eclesiastes 8:9, NW.
M. M., Estados Unidos
Kas kaputotan dagiti Katutubo nga Americano, naragsakanak unay a nangbasa kadagiti artikuloyo. Nakasangitak a nangbasa kadagiti panagsagaba nga inanduran ti tattao nga addaan iti kasta a panagayat iti panamarsua. Ania la ketdin ti panangsegseggak iti aldaw inton balbaliwanen ti Dios dagiti panangilupitlupit a naaramid iti amin a sangatauan ken sangsangkamaysa a pagraranudantayo ti paraiso a daga.
N. S., Estados Unidos
Pompeii Nabiit pay a nabasak ken talaga a nagustuak ti artikuloyo a “Pompeii—Lugar nga Awan ti Nagbalbaliw.” (Setiembre 8, 1996) Kaslattay addaak sadiay! Ngem kayatko a lawlawagan ti maysa a banag. Kuna ti artikulo nga asinoman a mangsarungkar iti Pompeii “mapaliiwna pay laeng dagiti pagkiskisan iti mais.” Korehirendak no kamaliak, ngem saan kadi a ti mais ket naggapu iti kontinente ti America nga idi kaaldawan laeng ni Christopher Columbus a naammuan dagiti taga Europa?
R. D., Estados Unidos
Dispensarendakami no nakapataudkami iti aniaman a makariro iti daytoy a banag. Nasaysayaat koma no kinunami a dagiti pagkiskisan iti “binukel” ti makita sadiay. Makapainteres ta ti Ingles a sao para iti “mais” mabalin a kaipapananna laeng “dagiti bin-i ti maysa a ruot a binukel,” a kas iti trigo wenno oat.—ED.
Manipud kinaubingko, pagay-ayatko ti kadaanan a historia. Ti pakasaritaan ti Pompeii ti nangnangruna a nakaallukoyak. Idi binasak ti artikulo, ti panagriknak ket kaslattay agpaspasiarak iti uneg ti siudad. Nagsayaaten! Naammuak ti adu a detalye a kabbaro kaniak. Kayatko met ti pannakayarig daydi a tiempo iti panungpalan ti aldawtayo. Pagyamanan iti panangtulongyo kaniak a mangammo kadagiti lugar a diak mapasiar.
J. S. A., Brazil