Pannakabannog​—Di Makita a Silo Dagiti Tsuper ti Trak

BABAEN TI KORESPONSAL TI AGRIINGKAYO! IDIAY ALEMANIA

BAYAT nga aglabas dagiti oras, ti makauma nga ungor ti makina a kagiddan ti kinasinggit ti 14 a dalig iti kalsada ti mangparigat iti panangikagumaan ti tsuper iti trak a di koma mabannog. Masilawan ti trak dagiti uged iti tengnga ti kalsada a mamagsina iti agsumbangir a turongen dagiti lugan. Kellaat nga agibar-ibar ti trailerna; sumsumiasin iti kalsada.

Babaen ti panangpusiposna iti manibela, imaniobra ti tsuper ti 40-tonelada a luganna tapno agsubli iti kalsada. Tangay namurmurayanen, maamirisna nga awan malagipna iti napalabas a sumagmamano a segundo. Nabannoganen.a

Nalaka la nga agdungsa ti asinoman a manglablaban iti pannakabannog bayat nga agmanmaneho. No usigentay ita dagiti napusek a kalsada, napeggad unay dayta​—uray kadagiti dadduma a magmagna wenno agmanmaneho. Kas pagarigan, idiay South Africa, kadagiti amin nga aksidente a napasamak iti nagbaetan ti Enero 1989 ken Marso 1994, a pakainaigan dagiti lugan nga agkarga iti nadagsen a tagilako, nasurok a 35 a porsiento ket maigapu iti panagdungsa dagiti tsuper bayat nga agmanmanehoda.

Kinuna ni propesor G. Stöcker, managsirarak iti kababalin dagiti tsuper, iti Aleman a magasin a Fahrschule a ti kumarkaro a pannakabannog ti mangituggod iti panagdungsa ken adda dagiti epektona nga umasping kadagidiay patauden ti arak. Siempre, dagiti komentona ket mayaplikar iti tsuper ti amin a lugan, saan laeng a kadagiti trak.

Pakabannogan

Apay a dagiti aksidente a mainaig iti pannakabannog masansan a mapasamak, idinto ta iti adu a pagilian isingasing ti linteg, wenno ipayannurotna pay ketdi, ti maipalubos a kaadu ti oras a mabalin nga agmaneho ti tsuper iti trak? Umuna, masapul nga usigentayo ti dagup nga oras ti panagtrabaho dagiti tsuper iti trak, a pakairamanan ti tiempo a nabusbos saan laeng nga iti panagmaneho no di ket iti panangaramid iti dadduma pay a trabaho. Dagitoy nga oras ti panagtrabaho masansan nga atiddog ken di regular.

Kaaduan a tsuper iti trak maragsakanda a makakita a malpas ti trabaho, a kaipapananna a maitulod ti tagilako iti maysa a suki iti aniaman a kasasaad ti panniempo. Ti magapuanan marukod iti distansia a biahien ken ti karga nga itulod. Ti oras ti panagtrabaho mabalin nga ad-adu ngem iti promedio. Idiay Alemania, kaaduan a tattao agtrabaho iti kumurang nga 40 nga oras iti makalawas, ngem adu a tsuper iti trak ti makapagtrabaho iti mamindua ngem iti dayta.

Iti dadduma a lugar, kasta met la ti kasasaad. Idiay South Africa, nababa ti sueldo, isu nga ikagumaan dagiti tsuper a nayonan ti birokda babaen ti panagmaneho iti napapaut nga oras. Ipakita dagiti report manipud India a nupay mangted dagiti kompania iti pawayway nga oras kadagiti tsuper tapno makompletoda ti biaheda, adu a tsuper iti trak ti mangnayon iti birokda babaen ti panangitulodda iti ad-adu a karga iti ad-adu a lugar, a mangikalikagum iti ad-adu nga oras nga agmaneho. Kasapulanto ngarud a basbassit ti turogda tapno dida maladaw nga agsubli iti kompaniada.

Iti uneg ti European Union, babaen ti panangyaplikar iti kaadu ti oras nga ipalubos ti linteg, makabusbos ti tsuper iti trak iti 56 nga oras nga agmaneho iti makalawas. Ngem iti sumuno a lawas, ti maipalubos a kaadu ti oras ti panagmanehona makissayan tapno agbalin a 34. Ti oras ti panagtrabahona, agraman ti oras a mabusbos nga agkarga ken agdiskarga, ket mairekord babaen iti alikamen a mangmonitor. Daytoy a rekord ti pakaammuan no agtultulnog met laeng ti tunggal tsuper kadagiti pagannurotan.

Ti sabali pay a banag a mangapektar iti kapaut ti oras a mausar iti panagmaneho ket ti panangmatmat ti makinlugan. Itakderan ti trakna ti nangina a puonan a rumbeng a pagganansiaan, no mabalin 24 nga oras iti kada aldaw nga awan mataktak a biahe. Kumarkaro ti kompetision kadagiti kompania ti lugan, ket dagiti manager pilitenda dagiti tsuper tapno situtulok nga agtrabahoda iti napapaut nga oras.

Rumsua ti pannakabannog no napaut ti oras ti panagtrabaho ken kasta met no kaano a mangrugida kadagiti di gagangay a tiempo. Kas pagarigan, kadawyan a mangrugi ti trabaho iti nagbaetan ti ala una ken alas kuatro iti parbangon. Kadagita nga oras a makadungdungsa ken nakapuy unay ti konsentrasion ti kaaduan a tsuper. Kumaro ti pannakapilit no dagiti kompania kayatda a mataginayon ti minimum nga abasto, nga ipaikalikagumda ti panangitulod ‘iti umiso nga oras.’ Kaipapanan daytoy a kasapulan a dumteng ti tsuper iti lugar nga ayan ti suki tapno itulod ti karga iti umiso a napagnumuan nga oras. Mabalin a mangitantan ti nakaro a trapiko, dakes a panniempo, ken pannakatarimaan dagiti kalsada nga ibturan no maminsan ti tsuper.

Agpapan pay kadagiti restriksion iti bilang dagiti maipalubos nga oras ti panagmaneho, dagiti manmano a panangrekisa dagiti polis ti kaskasdi a mangipalgak nga addada linteg a nalabsing. Sigun iti magasin a Polizei Verkehr & Technik, “gistay 1 a tsuper iti 8 kadagiti amin a trak, bus, ken napeggad a dadakkel a lugan dida tungtungpalen ti bilang dagiti oras a maipaannurot para iti panagmaneho ken panaginana.” Kabayatan ti pannakarekisa dagiti lugan idiay Hamburg, natakuatan ti polis a maysa a tsuper iti trak ti nakabusbos iti 32 nga oras nga agmanmaneho a di man la naginana.

Panangilasin iti Peggad

Napagsaludsodan ti maysa a tsuper nga agmanmaneho idi kadagiti adayo a distansia nga agitulod iti internasional a karga iti 30 a tawenen, maipapan iti parikut a pannakabannog. Kinunana: “Ti kinatangsit ken nalabes a panagtalek iti bagi ti mangituggod iti di panangikankano ti tsuper iti bannogna. Dayta ti pakaaksidentean.” Dagiti pagilasinan ti pannakabannog ket nailista iti kahon iti panid 22.

Mangispal iti biag ti pannakadlaw kadagiti nasapa a pagilasinan. Impalgak ti panagadal ti National Transportation Safety Board idiay Estados Unidos ti nakadadanag nga estadistika: Kadagiti 107 nga aksidente iti maysa a trak, 62 ti maigapu iti pannakabannog. Gapuna a ti industria ipategda ti irarang-ay dagiti teknikal a tulong a mangpakdaar no makaturturog ti tsuper.

Maysa a kompania idiay Japan ti mangar-aramid iti elektroniko a sistema a mangusar iti video camera a mangpaliiw no kasano kasansan ti panagkirem ti tsuper. No mamin-adu nga agkirem, ti datin a nairekord a timek ti mangpakdaar kenkuana a napeggaden ti kasasaadna. Mangar-aramid ti maysa a kompania idiay Europa iti alikamen a mangrukod no kasano kaannayas ti pannakamaneho ti lugan. No agibar-ibar ti trak, aguni ti pakdaar iti uneg ti lugan. Nupay kasta, mabayag pay laeng a mapataud dagiti epektibo a tulong.

Panangsumra iti Peggad

Ti bannog ket saan a naawis ken di matarigagayan a pasahero iti gistay tunggal lugan. Ti problema ket no kasano a mapapanaw. Uminum ti dadduma a tsuper iti adu nga addaan caffeine, ngem mariknada a mabannogandanto pay latta. Dadduma ket agusar iti pampaganaygay. Daksanggasat ta makadangran dagitoy iti salun-at. Idiay Mexico, mangan ti dadduma a tsuper iti adu a sili (sili a sairo) tapno agtalinaedda a siririing.

Sakbay ti nasapa a panagbiahe, nasayaat ti maaddaan iti umdas a turog. Ket, mayataday iti prinsipio, rumbeng a suroten ti maysa dagiti maipaalagad a bilang ti oras nga agmaneho. Idiay South Africa, isingasing dagiti eksperto ti panaginana kalpasan ti lima nga oras a panagmaneho. Kadagiti makapasikor a paset ti panagbiahe, rumbeng a taginayonen ti tsuper nga alerto ti isipna ken naipamaysa ti atensionna. Dadduma a tsuper ti dumdumngeg iti radio wenno makisarita iti dadduma a tsuper babaen iti CB a radio. Maysa a tsuper, a maysa kadagiti Saksi ni Jehova, ket dumdumngeg iti cassette maipapan iti Biblia, kas iti Pagwanawanan ken Agriingkayo! ken teksto ti Biblia. Dagiti sumagmamano a singasing ket makita iti kahon iti daytoy a panid.

Rumigrigat ti agbirok iti umdas a pagbiag, isu a narigat ti agbalin a natimbeng. Tagtagibassiten ti sumagmamano a kompania wenno manager ti peggad ti silo a pannakabannog dagiti tsuper. Rumbeng ngarud a laglagipen amin a nainaig iti negosio ti lugan, ti naammuandan maipapan iti pannakabannog. Kanayonanna, masansan nga addaan dagiti tsuper kadagiti makatulong a singasing manipud iti bukodda a kapadasan, a tumulong iti dadduma a manglaban iti panagdungsa.

Siempre, ti kasayaatan a pamay-an tapno agtalinaed nga alerto ket ipangag ti kasapulan ti bagi: No madlawyo ti aniaman a mamakdaar a pagilasinan, agsardengkayo iti sumaganad a mabalin a paginanaan ket maturogkayo. Kalpasanna, sanguenyo manen ti karit ti panagmaneho. Dikay agbalin a biktima iti di makita a silo ti pannakabannog!

[Footnote]

[Kahon iti panid 22]

Dagiti Mamakdaar a Pagilasinan nga Agkalikagum iti Dagus a Tignay

• Nasugpet wenno aglanaylanay kadi dagiti matayo?

• Agdardarepdep wenno agar-arapaapkay kadi?

• Kasla kadi umak-akikid ti kalsada, isu nga agmanehokayon iti tengngana?

• Diyo kadin malagip ti sumagmamano a paset ti biahe?

• Saan kadin a normal ti panangpusiposyo iti manibela ken panangbaddekyo iti preno?

No wen ti sungbatyo iti maysa laeng kadagiti saludsod iti ngato kaipapananna a kasapulan a dagus nga aginanakayo

[Kahon iti panid 23]

Kadagiti Nawatiwat a Biahe

• Maturogkayo a naimbag

• Dikay agpannuray kadagiti pampaganaygay

• Regular nga aginanakayo, agehersisio tapno sumarantakayo

• Laglagipenyo a napegpeggad ti nakawatwatiwat a makauma a biahe iti kalsada

• Dikay agbiahe a mabisin. Iruamyo ti nasayaat nga ugali ti pannangan: kalalainganna ken makapasalun-at a pannangan

• Uminumkayo iti adu, ngem liklikanyo ti arak