Kinatalged ti Kalsada Para iti Atap nga An-animal
BABAEN TI KORESPONSAL TI AGRIINGKAYO! IDIAY BRITANIA
ITI kada tawen, 100,000 a sora ken nagadu a hedgehog ken koneho ti matmatay kadagiti kalsada ti Britania, agraman 40,000 a badger, 5,000 a barn owl, ken nasurok a sangamilion a pilat. Ti angep no kalam-ekna ken ti kinasipnget ti dadduma kadagiti makagapu a madalisan dagiti atap nga animal babaen kadagiti napaspas a lugan kadagiti highway. Masansan nga aglisi dagiti tsuper tapno dida madalisan ti animal ngem madadael ti luganda wenno maidungparda pay ketdi iti sumungsungad a lugan. Daytoy ti agresulta no dadduma iti pannakakettel ti biag. Kalpasan ti aksidente a pakainaigan ti animal, adu a tsuper ti maamaken, ket sigun iti report ti polisia, ginasut ti din makabael a mangituloy iti biaheda.
Iti dadduma a highway iti Britania, nangikabilen dagiti autoridad iti espesial a replektor tapno mapabutngan dagiti ugsa iti kalsada. No masilawan ti kotse dagiti replektor, kaslattay matmata ida dagiti lobo! Iti sadinoman, ad-adayon manipud iti kalsada ti nakaimulaan dagiti kayo tapno nalaklakan a masirpatan dagiti tsuper ti aniaman a sumungad nga atap nga animal. Idiay Estados Unidos, dadduma a motorista ti nangikabit iti busina kadagiti luganda a mangpataud iti napigsa nga uni no agtartaray ti lugan iti nasurok a 55 a kilometro iti kada oras. Ti angin a lumasat iti busina ti mangpataud iti 60-decibel nga uni a ti kapigsana di mangngeg ti tao ngem nalawag a mangngeg ti atap nga an-animal. Ti alikamen napaneknekan nga epektibo unay kadagiti animal a natangar ti lapayagda. Inreport ti polisia a bimmassit dagiti nadungpar nga ugsa iti 50 porsiento idi naipadas ti pannakausar ti busina.
Kasano a maliklikam ti peggad ken ti di rumbeng a pannakapapatay ti atap nga an-animal iti kalsada? No agmanmanehoka, nangnangruna no kalamiisna wenno no rabii, agmenorka ken surotem dagiti pagilasinan iti kalsada a mangpakdaar iti kaadda dagiti animal.