Awanan-Parikut a Paraiso​—Mabiiten a Matungpal

“MAKIKADUAKANTO kaniak idiay Paraiso.” Anian ti panangipanamnama dagidiay a sasao iti lalaki a kriminal ti napalabas a panagbiagna! Saan, dina pagarupen a maliklikanna ti ipapanna iti umap-apuy nga impierno ket mapan idiay langit no matay. Imbes ketdi, naliwliwa ti mannanakaw iti sibay ni Jesus iti namnama a mapagungarto inton naisublin ti Paraiso iti planeta. Pangngaasiyo ta amirisenyo no asino ti nangaramid iti kasta a makaawis a sasao maipapan iti Paraiso​—ti Anak ti Dios a mismo, ni Jesu-Kristo.​—Lucas 23:43.

Ania ti nanggutugot iti panangikari ni Kristo iti Paraiso? Nagpakaasi ti mannanakaw: “Jesus, laglagipennak inton makagtengka iti pagariam.” (Lucas 23:42) Ania daytoy a Pagarian, ket ania ti pakainaigan dayta iti naindagaan a paraiso? Kasano nga ipanamnama daytoy a ti Paraiso awananto iti parikut?

Ti Pannakabalin a Mangyeg iti Paraiso

Umanamongkayo a ti pudno a paraiso dumteng laeng ditoy daga inton mapukawen dagiti amin nga agdama a parikut. Napaay ti panagregget ti tao a mangikkat kadakuada, kas paneknekan a naimbag ti historia. Binigbig ti Hebreo a mammadto a ni Jeremias: “O Jehova, ammok a . . . saan nga agtaud iti tao a magna ti panangiturong kadagiti addangna.” (Jeremias 10:23) Asino, ngarud, ti makabael a mangpukaw iti amin nga agdama a parikut?

Dakes a Panniempo ken Polusion. Idi adda napigsa a bagyo iti Baybay ti Galilea a nangyeg iti dadakkel unay a dalluyon a dandani pakarakrakan ti bilog, riniing dagiti marino ti kaduada nga agbibiahe. Ket, basta kinunana iti baybay: “Agtalnaka! Agulimekka!” Estoriaen ti salaysay iti Ebanghelio ni Marcos ti napasamak: “Nagtalna ti angin, ket naglinak unay.” (Marcos 4:39) Dayta a kaduada a biahero ket awan sabali no di ni Jesus. Adda pannakabalinna a mangkontrol iti panniempo.

Daytoy met la ti Jesus a nangipadto babaen ken apostol Juan a dumtengto ti tiempo nga ‘iyeg [ti Dios] ti pannakadadael dagidiay mangdaddadael iti daga.’ (Apocalipsis 1:1; 11:18) Daytoy a paglaingan saan nga imposible iti Daydiay nangpukaw iti intero a lubong dagiti nadangkes a tattao iti Layus idi kaaldawan ni Noe.​—2 Pedro 3:5, 6.

Krimen ken Kinaranggas. Ikari ti Biblia: “Dagiti agaramid ti dakes magessatdanto; ngem dagidiay nga agpannuray ken Jehova tawidendanto ti daga. Ngem dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:9, 11) Manen, ti Dios a ni Jehova, ti mangikari a mangikkat kadagiti amin a krimen ken kinaranggas, a mangireserba iti Paraiso para kadagiti naemma.

Kinapanglaw ken Bisin. Ti agdama a panangirurumen palubosanna dagiti gobierno iti maysa a lugar iti lubong a mangurnong iti agsobsobra, “aglaplapusanan” a taraon, bayat a dagiti napanglaw a pagilian sagsagabaenda ti kinapanglaw. Dagiti ahensia ti saranay, a supsuportaran dagiti maseknan a tattao iti sangalubongan, padasenda nga ipaay dagiti nasken a kasapulan ngem masansan a matungday no madadael dagiti gakat ti panagiwaras gapu iti awan a linteg ken urnos. Pagdumaenyo daytoy iti inlanad ni mammadto nga Isaias: “Iti daytoy a bantay ni Jehova dagiti buybuyot agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti ar-arak iti rabaw dagiti aributed, dagiti nalukmeg a banag a napno iti pata, dagiti arak a nadalusan a naimbag kadagiti aributed.” (Isaias 25:6) Saan kadi nga ipasimudaag dayta a ti gawat ken bisin mapukawton? Sigurado la ketdi.

Gubat. Dagiti panagregget a mangituray itoy a lubong babaen iti maymaysa nga autoridad napaneknekan a saan a naballigi. Ti Liga de Naciones, a naipasdek idi 1920, dina nalapdan ti ibebettak ti Gubat Sangalubongan II ket narpuog. Ti Naciones Unidas, a masansan a maitan-ok a kas ti kasayaatan a namnama maipaay iti talna, ikagkagumaanna a pagadaywen dagiti agbimbinnusor a partido kadagiti lugar a pagdadangadangan. Nupay adda dagiti naipablaak a panagreggetna iti talna, naruay ti gubat, dayta man ket sibil, panaggiginnubat ti puli, wenno komunidad. Ikari ti gobierno ti Pagarian ti Dios nga ikkaten dagiti agdama-aldaw nga aggiginnubat a grupo ken sursuruan dagiti iturayanna kadagiti wagas ti talna.​—Isaias 2:2-4; Daniel 2:44.

Pamilia ken Pannakadadael ti Moral. Nasaknap ti pannakasinasina ti pamilia. Nagadu dagiti delingkuente nga agtutubo. Nasaknap ti imoralidad iti amin a tukad ti kagimongan ti tao. Ngem, dagiti pagalagadan ti Dios agtalinaed a saan a nabaliwan nanipud idi punganay. Pinatalgedan ni Jesus a “ti maysa a lalaki panawannanto ni amana ken ni inana ket makitiponto ken asawana, ket dagiti dua agbalindanto a maymaysa a lasag . . . Gapuna, ti pinagmaymaysa ti Dios saan koma a pagsinaen ti tao.” (Mateo 19:5, 6) Imbilin pay ni Jehova a Dios: “Dayawem ni amam ken ni inam . . . tapno aglak-amka iti naimbag ken makapagtalinaedka iti daga.” (Efeso 6:2, 3) Maannurotto dagita a pagalagadan ditoy daga iti sidong ti Pagarian ti Dios.

Sakit ken Ipapatay. “Ni Jehova . . . isalakannatayo,” inkari ni mammadto Isaias, “ket ti agtaeng dinanto kunaen, Masakitak.” (Isaias 33:22, 24) “Dagiti isupapak ti basol isu ti ipapatay,” binigbig ti Kristiano nga apostol a ni Pablo, “ngem ti sagut nga ipaay ti Dios isu ti agnanayon a biag babaen ken Kristo Jesus.”​—Roma 6:23.

Ni Jehova a Dios ikkatennanto amin dagitoy a parikut babaen iti nailangitan a gobiernona nga iturayan ti Anakna, ni Kristo Jesus. Nupay kasta, mabalin a kunaenyo, ‘Daytoy ket kasla arapaap nga Utopia. Talaga a makaparagsak no pumayso dayta, ngem pumaysonto kadi?’

Ti Talaga a Kinapudno

Para kadagiti adu, kasla imposible a matungpal ti posibilidad nga agbiag iti awanan-parikut a paraiso ditoy daga a mismo. No kasta ti pagarupyo, sukimatenyo ti pammaneknek a pudno a mapasamakto daytoy.

Dagiti Saksi ni Jehova ket agdama itan nga internasional a komunidad dagiti nasurok a lima a milion a tattao nga addaanen iti sangkabassit nga awanan-parikut nga aglawlaw kadagiti 82,000 a kongregasionda a naisaknap iti 233 a lugar. Mabalin a sumarungkarkayo iti aniaman a panagtitiponda, dadakkel wenno babassit, ket anianto ti masarakanyo?

(1) Maysa a Makaay-ayo, Nadalus nga Aglawlaw. Iti panagkomentona maipapan iti maysa a kombension dagiti Saksi ni Jehova idiay Norwich, Inglatera, kinuna ti manedyer ti estadium ti football: “Ti natalna nga aglawlaw iti uppat nga aldaw . . . ket makaakar. Mapadasam ti personal a kinakalma a naan-anay a naiduma iti aniaman a sabali nga uppat nga aldaw iti makapadanag a lubong ti negosio ken ti inaldaw a panagbiag iti aglawlawtayo. Dagiti Saksi ni Jehova pudno nga adda naiduma a banag maipapan kadakuada ket narigat nga ilawlawag.”

Kinuna ti maysa a mamalbalakad kadagiti agsansanay iti industria ti konstruksion a simmarungkar kadagiti opisina dagiti Saksi ni Jehova idiay London: “Nasdaawak agpadpada iti nakitak ken nangngegko ket talaga a nalapunosak iti kasasaad a naan-anay a talna ken kinatalingenngen nga adda saan laeng a kadagiti patakderyo no di ket iti ummong dagiti [lallaki ken babbai]. Ammok a ti wagas ti panagbiag ken ti kinaragsakyo adu ti maisurona kadagiti dadduma iti daytoy nariribuk a lubong.”

(2) Kinatalged ken Kappia. Maysa a kolumnista iti Journal de Montréal idiay Canada ti nagsurat: “Saanak a Saksi. Ngem nasaksiak ti kinapudno a dagiti Saksi paneknekanda ti kinaepektibo ken umiso a kababalin. . . . No isuda laeng ti tattao iti lubong, saanen a masapul nga ibalunettayo dagiti ruangantayo ken mangikabit iti alarma para kadagiti agtatakaw.”

(3) Ti kinasungdo iti gobierno ti Pagarian ti Dios ti pakailasinan kadagiti Saksi. Ti neutral a takderda upayenna ti dadduma, nupay saan koma a kasta. Ti saanda a pannakiraman kadagiti masukatsukat a napolitikaan a gakat itatta saan a maigapu iti kinaawan ti interes a mangparang-ay iti kagimongan. Imbes ketdi, ikagkagumaanda ti agtignay iti pamay-an a mangay-ayo iti daydiay mangituray babaen iti nailangitan a gobierno, kayatna a sawen, ti Namarsua iti daga, ni Jehova a Dios.

Ti pammati dagiti Saksi, a naibatay nga interamente iti Sao ti Dios, ti Biblia, lapdanna ida manipud iti pannakasilo nga agbalin a sekta wenno kulto. Adda naasi a panaginteresda kadagiti amin a sabali a tattao, iti aniaman a relihioso a pakaallukoyan. Saan, dida padasen a piliten dagitoy a tattao a mangbalbaliw iti panangmatmatda. Pagreggetanda a tuladen ti Panguloda, ni Kristo Jesus, babaen ti panangiparangda kadagiti Nainkasuratan a pammaneknek iti awanan-parikut a Paraiso a mabiiten a maipasdek ditoy daga.​—Mateo 28:19, 20; 1 Pedro 2:21.

(4) Naespirituan a Salun-at ken Kinaragsak. Saan nga akuen dagiti Saksi ni Jehova a naan-anay nga awananda iti parikut iti daytoy a tiempo. Imposible daytoy kadagiti tattao nga addaan iti pakakitaan ti natawid ken Adan a basol. Ngem babaen iti tulong ti nasantuan nga espiritu ti Dios, agtrabahoda a mangpatanor kadagiti personal a galad a kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaemma, panagteppel.” (Galacia 5:22, 23) Ti panagdayawda ken Jehova babaen ken Kristo Jesus ti mamagkaykaysa kadakuada ken mangbibiag iti namnamada.

Agtalekkami a ti isasarungkaryo kadagiti lokal a paggigimongan dagiti Saksi ti mangkombinsir kadakayo a ti Dios pagbalinennanto ti daga a maysa a literal a paraiso.

Awanton dagiti agdama a parikut. Uray pay ti naundayen a kinaimperpekto main-inutto a mapukaw bayat a mayaplikar dagiti gunggona ti daton a subbot ni Kristo iti natulnog a sangatauan. Wen, addanton naan-anay a salun-at ken kinaragsakyo.

Dagiti simple a panagsagana tulongannakayto a mangtagiragsak iti kasta a namnama. Kiddawenyo kadagiti Saksi ti personal a kopiayo iti libro a Pannakaammo a Mangiturong iti Biag nga Agnanayon.a Babaen itoy, iti apagbiit a tiempo, masursuroyo no ania ti kalikaguman ti Dios kadakayo tapno mabalinyo met a tagiragsaken ti biag iti awanan-parikut a paraiso iti agnanayon.

[Footnote]

[Blurb iti panid 10]

Ti pammati dagiti Saksi, a naibatay nga interamente iti Biblia, lapdanna ida nga agbalin a maysa a sekta wenno kulto

[Dagiti ladawan iti panid 8]

Maipaspasdeken ti pamuon ti maysa nga awanan-parikut nga paraiso

Din agbayag addanton maysa a pisikal a paraiso iti sangalubongan