Naraniag a Masakbayan Para Kadagiti Annaktayo
NANIPUD idi nagpatingga ti Gubat Sangalubongan II, nakaaramid ken nangpirman dagiti gobierno iti lubong kadagiti adu a tulagan a mangsalaknib kadagiti sibilian iti tiempo ti gubat. Mairaman kadakuada dagiti tulagan a mangipaay iti kawes agraman dagiti agas ken abasto a taraon a maipaay kadagiti ubbing. Dagiti nagnunumuan ti adu a nasion ikarida a salakniban dagiti ubbing manipud iti pannakagundawayda iti sekso, pannakatutuok, ken kinaranggas. Iparit met ti tulagan ti pannakaipalista iti puersa armada ti siasinoman nga awan pay 15 a tawenna.
Ti The State of the World’s Children 1996, maysa a report ti United Nations Children’s Fund, idayawna dagitoy a linteg a kas “napudno a pakabigbigan” ket kunana pay: “Dagiti politiko a makaammo nga adda dagiti pagalagadan a pakaukomandanto inton agangay nalabit usigendanto dagidiay pagalagadan kadagiti naannad a panagplanoda.”
Siempre, mabigbig met dagiti politiko a ti internasional a komunidad masansan nga awanan agpadpada iti abilidad ken pagayatan a mangipakat kadagita a linteg. Aminen ngarud ti report a “gapu iti kasaknap ti di pannakaikankano dagitoy a prinsipio, nalaka a laisen ti adda a nakadagupan ti internasional a linteg.”
Sa adda parikut maipapan iti kuarta. Idi 1993, nagraranget ti 79 a nasion. Innem a pulo ket lima kadakuada ti napanglaw a nasion. Nangalaan dagitoy a nasion kadagiti armas a pakidangadangda? Kaaduanna kadagiti baknang a nasion. Ket ania dagiti lima a kangrunaan nga agilaklako iti armas iti napanglaw a lubong? Dagiti lima a permanente a miembro ti United Nations Security Council!
Dagidiay Maseknan
Siempre, adda dagidiay maseknan unay maipapan iti kasasaad dagiti ubbing iti tiempo ti gubat. Agpadpada dagiti indibidual ken organisasion siaayat a tulonganda dagiti agtutubo a biktima iti gubat. Kas pagarigan, dagiti Saksi ni Jehova, a di makigubgubat, ar-aramidenda dayta. Ngem tapno nalawag a mapukaw ti pannakabiktima dagiti ubbing iti gubat kaipapananna a pukawen ti gubat a mismo, maysa a namnama a kasla di matungpal. Gapu iti nabayagen a pakasaritaan ti sangatauan iti panagdadangadang ken panaglalaban, adu ti agkuna a dagiti tattao pulos a didanto maiyeg ti sangalubongan a kappia. Iti kastoy a panangmatmat, umisoda.
Mabalin met a kunaen dagiti tattao a dinto pulos makibiang ti Dios kadagiti aramid ti nasnasion wenno mangyeg iti napaut a kappia iti planeta. Iti kastoy a panangmatmat, agbiddutda.
Ti Namarsua kadatayo, ni Jehova a Dios, maseknan unay kadagiti bambanag a maar-aramid ditoy daga. Iti Saona, ti Biblia, saludsoden ni Jehova: “Adda aya aniaman a ragsakko iti ipapatay ti nadangkes . . . saan aya a nasaysayaat nga isu agsubli koma manipud iti dalanna, ket agbiag?” Sigaganetget a sumungbat ti Dios: “Awan ti ragsakko iti ipapatay daydiay a matay.”—Ezequiel 18:23, 32.
Panunotenyo dayta: No ti naasi a Namarsua kadatayo tarigagayanna uray dagiti nadangkes nga adulto nga agbabawi ket tagiragsakenna ti biag, sigurado a kayatna nga agbiag ken tagiragsaken met dagiti ubbing ti biag! Ngem, ti naayat a Diostayo dinanto an-anusan dagiti nadangkes iti agnanayon. “Dagiti agaramid ti dakes magessatdanto,” ikari ti Sao ti Dios. “Bassit pay a darikmat, ket ti nadangkes maawanton.”—Salmo 37:9, 10.
Ni Jesu-Kristo, a naan-anay a nangiparangarang iti personalidad ti nailangitan nga Amana, inayatna dagiti ubbing ket kinunana a “ti pagarian ti langlangit kukua dagiti kakasta.” (Mateo 19:14) Ti pannakaidaton dagiti ubbing kadagiti didios iti gubat ket makarimon ken Jehova a Dios ken ti Anakna, ni Jesu-Kristo.—Idiligyo ti Deuteronomio 18:10, 12.
Ti Kari ti Dios a Naraniag a Masakbayan
Pinalubosan ti Dios dagiti gubat ken panagsagaba iti adun a siglo tapno ti kinapudno nga imbaga ni mammadto a Jeremias mapasingkedan iti agnanayon: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong iti addangna.” (Jeremias 10:23) Din agbayag, ikari ti Biblia, itan-okto ni Jehova ti sapasap a kinasoberanona babaen ti ‘panangpasardengna kadagiti gubgubat inggana iti ungto ti daga.’ (Salmo 46:9) Naipadto met iti Biblia ti tiempo inton “[dagiti tattao] pandayendanto dagiti kampilanda a pagbalinen a dingding ti arado ken dagiti pikada a pagbalinen a kumkumpay. Ti nasion saannanto nga itag-ay ti kampilanna a maibusor iti nasion, ket didanto met adalenen ti pannakigubat uray kaano.”—Isaias 2:4.
Anianto ti mapasamak kadagidiay natay iti gubat? Adda kadi aniaman a namnama para kadakuada? Inkari ni Jesus ti panagungar dagiti natay iti maysa a daga nga awanan iti gubat, a kunkunana: “Um-umayen ti oras nga amin dagidiay adda kadagiti pakalaglagipan a tanem . . . rummuardanto.” (Juan 5:28, 29) Kasta met, sitatalek a kinuna ni apostol Pablo: “Addanto panagungar agpadpada dagiti nalinteg ken dagiti nakillo.”—Aramid 24:15.
Talaga a matungpalto dagiti kari ti Dios. Addaan iti pannakabalin ken determinasion a mangibanag kadagiti amin a pinanggepna. (Isaias 55:11) No ibaga ni Jehova a pukawennanto ti gubat, paypaysuenna dayta. No ikarina a pagungarenna dagidiay natay, aramidennanto dayta. Kas kinuna ni anghel Gabriel, “iti Dios awan ti deklarasion a saanto a mabalin.”—Lucas 1:37.
[Ladawan iti panid 10]
No awanton ti gubat, amin nga ubbing tagiragsakendanton ti nasalun-at a biag