Manipud Managbasatayo
Panangpanuynoy Agtawenak iti 22, ket kayatko ti agyaman kadakayo kadagiti serye ti “Panangpanuynoy—Aglablabes Kadin ti Lubong?” (Enero 22, 1997) Kasapulan a sarangten dagiti agtutubo a Kristiano ti adu a karit. Dagitoy nga artikulo ti nangparegta kaniak a di aglablabes ken pinabilegda ti determinasionko nga agserbi ken ni Jehova agpapan pay kadagiti panangparigat ti lubong.
M. B., Italia
Ti Raven Talaga a nagustuak ti makaisuro nga artikulo a “Ti ‘Raven’—Aniat’ Nakaidumaanna?” (Enero 8, 1997) Agtawenak iti 18 ket kaal-aladak laeng kas paset-tiempo a naturalista iti nature center iti lugarmi. Dua a nagpipintas a raven ti karaman dagiti animal a tartaraknenmi. Natakkuatak a kapadada unay ti panangiladawan ti artikuloyo—nakasarsaririt. Panggepko nga iranud ti artikulo kadagiti katrabahuak.
J. C., Estados Unidos
Agpayso ken makapainteres unay ti impaayyo nga impormasion. Ti kinapudno a nakaro a mannanakaw dagiti billit iti pamilia dagiti wak ket agdindinamag iti kampus ti unibersidad a pages-eskuelaak ditoy Ghana. Mapaneknekan a takawen dagiti wak ditoy ti aniaman—manipud ikan agingga iti sabon. Naipadamag payen a nagkallong dagiti wak kadagiti pariok ti sumagmamano nga estudiante!
F. A. A., Ghana
Ragsak iti Kosina Pagyamanan iti artikulo a “Mabalin a Pakaragsakan ti Kosina.” (Enero 8, 1997) Nagunggonaanak met kadagiti saritaan a maang-angay iti kosina. Bayat nga aguk-ukisak iti sibuyas ken patatas, sursuruannak idi ni nanangko nga ayatek ni Jehova ken pinaregtanak nga agserbi kenkuana a naan-anay. Dagitoy a saritaan iti kosina ti napaneknekan a napateg kabayatan dagidi narigat a tiempo a busbusoren ni tatangko ti relihionmi. Ita maragsakankam ken ni nanang a makakita ken ni tatangko nga agbalin nga adipen ni Jehova. Kasta met a nasursurok ti agluto iti sumagmamano a naimas a putahe!
A. M. M., Italia
Agtartrabahoak kas kosinero iti balay ti maysa nga amo nga adda iti industria ti paglinglingayan. Gapuna, namin-adun a nagundawayak nga iranud dagiti naespirituan a taraon kadagiti sangaili—agraman iti sumagmamano nga artista—bayat nga agtartrabahoak iti kosina. Agiduldulinak iti sumagmamano a literatura iti Biblia iti uyosen ti kosina. Naminsan, maipapan iti Biblia ti nagsaritaanmi iti maysa a sangaili. Nagsubli idi agangay idiay kosina tapno ituloymi ti saritaan. Bayat nga okupadoak nga agpritprito iti manok, sipipigsa a binasana ti kopiak iti libro nga Apocalipsis—Ti Grande a Tampokna Asidegen! Wen, hustokayo. Mabalin a pagragsakan ti kosina!
A. R., Estados Unidos
Panangipudno iti Basbasol Agserserbiak kas panglakayen iti kongregasion, ket kayatko nga iyebkas ti apresasionko iti artikulo nga “Agimtuod Dagiti Agtutubo . . . Rumbeng Kadi nga Ipudnok ti Basolko?” (Enero 22, 1997) Tinignay daytoy nga artikulo ti adu nga agtutubo a mangipudno kadagiti nadagsen a basol a naaramidda iti napalabas. Makaparagsak a makita a kalpasan nga immawatda iti naayat a tulong, nakirelasion manen dagitoy nga agtutubo ken ni Jehova. Determinadoda a taginayonen a nadalus ti bagida.
O. B., Italia
Ti artikulo tinulongannak a mangbigbig a mabalin a makadangran unay ti panagilimed. Ti panagpudno mabalin a nakababain, ngem no ipudnom ti basolmo ken ni Jehova ken kadagiti dadakkelmo, mariknam a nabilbileg, nadekdekket ti relasionmo kadakuada.
B. K., Guyana
Dimteng ti artikulo iti tiempo a kasapulak unay dayta. Tinulongannak a mangamiris a kasapulan nga ibagak kadagiti dadakkelko ken papanglakayen iti kongregasion ti naaramidak. Nariknak a ti artikulo kasla naisurat para kaniak. Idi imbagak met laengen kadakuada dagiti parikutko, simmayaat unay ti riknak!
A. A., Estados Unidos