Manipud Kadagiti Agbasbasa
Diborsio Nakapagsuratak tapno iyebkasko ti napalaus a panagyamanko kadagiti serye a “Panangaywan iti Anak—Ania ti Natimbeng a Panangmatmat?” (Disiembre 8, 1997) Kalpasan ti diborsiok, addada parikut iti panangammo no kasano kasansan ti pannakilangen ti dati nga asawak iti balasangmi. Para iti baro nga asawak, masapul a maikagumaan unay a maipaidam ti pannakilangen. Ngem linawlawagan ti Agriingkayo! daytoy nga isyu babaen ti panangipangpangrunana iti pagimbagan ti ubing ken saan nga iti emosion dagiti nagannak wenno dagiti agsiuman.
L. C., Wales
Addaanak iti balasang, bugbugtong nga anak, a naipanaw kaniak idi inkeddeng ti husgado a rumbeng a makipagyan ken amana. Gapuna, kasla naisurat ti artikulo para kaniak. Bendision a maammuan a mangipapaay ni Jehova kadatayo iti ‘taraon iti umiso a tiempo.’—Mateo 24:45.
D. B., Switzerland
Buyogen lulua a nagyamanak ken Jehova idi nakitak ti akkub ti Agriingkayo!, ta dua a tawenen nga iruprupirko ti kalintegak a mangaywan iti annak. Daytat’ emosional unay a kapadasan. Pudno nga apresiarek ti makaisuro, nagsayaat a pannakaidatag daytoy a tema.
A. F., Estados Unidos
Idi ubingak pay laeng, nagdiborsio dagiti nagannak kaniak. Diak ammo ti aramidek ta napategda a dua kaniak. Agasenyo no kasano ti panangapresiarko unay kadagiti artikulo maipapan iti daytoy a tema. Agyamanak unay ta tinamingyo daytoy a parikut manipud iti panangmatmat dagiti annak.
K. D., Yugoslavia
Dagiti Parke iti Kabambantayan Kayatko ti agyaman unay kadakayo iti artikulo a “Ti Kinapintas Dagiti Parke Nasional iti Kabambantayan.” (Nobiembre 22, 1997) Kinaagpaysona, diak inkankano dagiti napalabas nga artikulo maipapan iti nakaparsuaan. Ngem nakitak dagiti nagpipintas a retrato iti artikulo ket inkeddengko a basaek dayta. Idi nabasakon, naamirisko a naikapisak a nangbasa iti adu a dadduma pay a makapainteres nga artikulo maipapan iti nakaparsuaan.
T. M., Ukraine
Homoseksualidad Naragsakanak idi naawatko ti Agriingkayo! a Disiembre 8, 1997 nga addaan artikulo a “Ti Panangmatmat ti Biblia: Dagiti Kristiano Rumbeng Kadi a Guraenda Dagiti Homoseksual?” Nagsayaat ti pannakaisuratna ken natimbeng ti panangtamingna iti sensitibo unay a tema.
L. W., Estados Unidos
Panagsikor Inikkak ti superbisorko iti kopia ti artikulo a “Maum-umaka Kadin iti Trabahom?” (Disiembre 22, 1997) Kabigatanna idiay pagtrabahuan, imbagana kaniak nga ekselente ti artikulo. Impasana dayta iti sumagmamano a katrabahuak ket nangibati iti kopia ti artikulo iti salasmi. Apag-isu ti isasangpet ti artikuloyo!
V. L., Estados Unidos
Pagyamanan kadagiti makapainteres nga impormasion. Agtawenak iti 17 ken agtartrabaho iti amin a tiempo. Ekselente ti imbalakad ti artikulo no kasano a mapagbalinko nga ad-adda a makaay-ayo ti trabahok. Pagyamanan!
E. A., Italia
Pagyamanan unay iti artikulo. Madama nga addaak iti maikadua a tawen ti panagsanayko iti maysa a trabaho ket alusiisenak, a diak matagiragsaken ti panggedak. Ti artikulo tinulongannak a maragsakan manen iti trabahok.
I. F., Alemania
Dagiti Rave Agtawenak iti 19 ken talaga a magusgustuak ti dumngeg iti musika a techno. Ngem nagustuak unay ti artikulo nga “Agimtuod Dagiti Agtutubo . . . Makadangran Kadi a Pagraragsakan Dagiti Rave?” (Disiembre 22, 1997) Daytoy ti damo nga artikulo a nakitak a siuumiso a nangdeskiribir iti daytoy a kita ti musika. Nangnangruna nga agyamanak iti benneg a “Talaga Kadi a Para Kenka Dagiti Rave?” Babaen kadagiti saludsod ken kasuratan, natulonganak a makagteng iti simple ken lohikal a konklusion.
A. P., Slovenia