Manipud Managbasatayo
Panangaywan—Panangsaranget iti Karit Daytoy ekselente a serye dagiti artikulo (Pebrero 8, 1997) pinaregtanak unay. Agtawenak iti 17, ket ay-aywanak ni apongko a lakay a naatake ken ni inangko a naaddaan iti nervous breakdown. Makaliwliwa a maammuan a normal laeng ti pasaray masuron kadagiti pasiente ken iyimtuod ti, ‘Apay a napasamak daytoy kaniak?’ Apresiarek met ti artikulo maipapan iti praktikal a tulong a maipaay iti mangay-aywan.
P. T., Italia
Agpayso ken napnuan iti pannakaawat ti deskripsionyo iti rikrikna ti tattao a mangay-aywan kadagiti masakit nga ay-ayaten iti biag. Agyamanak ken ni Jehova ta inabbukaynakayo a mangisurat kadagitoy a nagpipintas nga artikulo. Siguradoak a tumulongdanto amin kadakami nga adda iti kastoy a situasion tapno maitunosmi ti bagimi iti dayta ken agtultuloy nga agserbi ken ni Jehova buyogen ti rag-o ken regta.
B. V., Czech Republic
Nabiit pay a nakidiborsioak nga ina ti dua a tin-edyer, ket ti barok nakaro ti panagsagsagabana iti ADHD (Attention Deficit Hyperactivity Disorder). Napalalo ti rigat a kakuykuyog daytoy a dadagsen. Babaen kadagiti nabiit pay nga artikulo maipapan iti panangaywan, naawatak ti rikriknak a mabain, makaunget, maldaang, ken kinapimpiman. No dakamaten ti positibo a banag, dagiti natataengan a kakabsat iti kongregasion ti timmulong a nangaywan iti barok. Anian a rag-o a makita ti ayat a maipakita babaen ti panagtignay!
C. C., Estados Unidos
Agsagsagaba ni lakayko iti dementia ket agpampannuray iti panangaywanko. Maamakak idi a diak kabaelanen nga aywanan. Ni Jeanny, a nadakamat kadagiti artikulo, ti nangpabileg kaniak idi imbalakadna: “Ti panagamak iti mabalin a mapasamak masansan a dakdakes ngem ti kinapudno.”
A. P., Slovakia
Agay-aywanak idi ket nariknak ti adu a rikrikna a nadeskribir kadagiti artikulo. Namin-adu a diak maibaga kadagiti sabsabali ti pannakaupay ken panangsidir ti konsiensiak. Dagitoy nga artikulo ti timmulong kaniak a nangipeksa kadagiti rikriknak.
F. F., Nigeria
Diak impagarup a maipablaak dagita nga espesial nga artikulo. Naidalit ni nanangko sipud pay idi 1989. Kas bugbugtong nga anakna, ken awan a pulos kabsatko wenno amak, siak ti nangibaklay iti responsabilidad a mangaywan kenkuana. Umanamongak iti maudi a parapo ti serye—a ni Jehova ken ti Anakna, ni Jesu-Kristo, dagiti naasi unay nga agay-aywan. Iti namin-adu a kasasaad, idi a ti situasion kimmaro ket impagarupko a diak madaeranen, nagkararagak ken ni Jehova ket impakpakaasik a tulongannak. Ti laeng panangammo nga isut’ umim-imdeng, nariknak a bumilbilegak manen.
M. A. M., Peru
Masakit ni lakayko, ket napasarak ti gistay amin a nadakamat ti magasin. Malagipko ti adu a pasamak idi a dagiti kakabsat dinamagda ti kasasaad ni lakayko. No dadduma masuronak idi, a pampanunotek: ‘Apay a sangkadamagda? Siak met ngay?’ Ita maawatakon a gagangay laeng dagita a rikna.
M. A. I. I., España
Pakarigatan nga Agsursuro Siak ti ina ti sangapulo ti tawenna a barito nga addaan nakaro nga ADHD. Maragsakanak a mangibaga a tangay naipablaak dagiti artikulo a “Tulong Kadagiti Ubbing a Marigatan nga Agsursuro” (Pebrero 22, 1997), sumagmamano a gagayyem ti nangibaga kaniak a nupay ikarkarigatanda a tarusan ti sakit ken tulongandak, pulos a dida idi maawatan no kasanot’ panagriknami nga agina. Kaaduan ti nagkomento nga ad-adda a sidadaanda itan a tumulong. Maysa a kabsat a babai iti kongregasion ti nangiwaya a mangrepaso iti artikulo a kadua ti barok ket pinaregtana. Idi agangay, inasitgannak ti barok ket kiniddawna a basaek manen ti magasin.
L. A. D., Estados Unidos