Manipud Managbasatayo
Panagbirok ti Maysa nga Ampon Kayatko ti agyaman iti kapadasan a “Makaparagsak a Sorpresa.” (Pebrero 22, 1997) Talaga a makaabbukay a basaen no kasano a nasarakan daytoy nga anak ti agpayso nga inana ken naammuanna nga isut’ maysa met a naespirituan a kabsatna!
M. G. D., Italia
Buyogen lulua a binasak ti pakasaritaan ni Dana Folz. Adda manongko nga ampon a naam-ammona ni nanangna idi nataenganen. Saan a naragsak daydi a reunion. Uray ita, parparmekenna pay laeng dagiti negatibo a riknana iti pamilia ti ina a nangipasngay kenkuana. Ti artikulo ti nangipaawat kaniak iti kinapateg ti panangipakita iti anus ken ayat kenkuana.
M. D. L., Argentina
Nasarakak ti magasinyo iti banio ti maysa a lugar ti negosio. Naglaon dayta iti maysa kadagiti makaabbukay unay a pakasaritaan a nabasak! Masansan a mayimtuod kaniak: “Kasanon no ti maladaga ket nayinaw kabayatan ti pannakarames? Anamongam kadi ti panagparegreg iti sidong dagitoy a kasasaad?” Awanen ti posible a nalawlawag a pakaasi para iti biag ti di pay naipasngay ngem ti makapasegga, agpaypayso a drama ti biag ni Dana Folz.
M. P., Estados Unidos
Organisado a Krimen Maysaak a security consultant ken miembro ti Police-Community Relations Committee. Nakitak a praktikal ken makagunggona unay dagiti singasingyo no kasano a masalakniban ti pamilia ti maysa manipud iti krimen. (“Organisado a Krimen—No Kasano nga Apektarannaka,” iti ruar a Marso 8, 1997) Impasakon ti magasin iti dadduma a miembro ti komite. Makaay-ayo a maammuan nga addanto aldaw nga awanen ti krimen iti lubong.
C. E. J. A., Nigeria
Dagiti artikulo ket nangnangruna a makatulong agsipud ta iyad-adalak iti Biblia ti maysa a lalaki a naitimpuyog iti organisado a krimen iti napalabas a 11 a tawen. Dagiti rigat ti ilalapsut iti organisado a krimen ket siuumiso a nailawlawag. Babaen iti tulong ni Jehova, kabaelanna met ti lumapsut no ikeddengna nga aramiden dayta.
A. M., Estados Unidos
Sabsabong Sangapulo ti tawenko, ket kayatko ti agyaman kadakayo iti artikulo nga “Ipamatmat Dagiti Sabong nga Adda Mangipatpateg.” (Marso 8, 1997) Sinuruannak no kasano a taripatuen dagiti sabong tapno agpautda.
L. C., Italia
Adun a tawen a kayatko a pagpauten dagiti sabong tangay magusgustuak ida. Nupay kasta, kanayon a nabiitda a malaylay. Talaga a nakatulong kaniak dagiti singasing iti Agriingkayo! Agyamanak unay iti trabaho nga ar-aramidenyo.
J. P., Mexico
Pannakaipasngay ti Bituen Ti artikulo a “Pannakaipasngay ti Bituen iti ‘Umok’ ti Agila” (Marso 8, 1997) pinagtuken ken pinagpanunotnak biit maipapan iti nagpintas, di nadadael a parsua ni Jehova a Dios. Kasta unay ti pannakaabbukayko.
J. A., Australia
Panangampon Talaga a mariknak ti rikna a naisalaysay iti artikulo a “Naimpusuan a Pakaasi.” (Marso 8, 1997) Maysaak a di naikasar nga ina idi agtawenak iti 19. Makaunget ken manangsidir unay ni nanang, ket impakaammona kaniak a dina maawat ti ubing. Inkeddengko a pagimbagan unay ti anakko no ipaamponko. Kalpasan a nagbalinak a Kristiano, 15 a tawen nga inkararagko a sapay koma ta isut’ makitak. Nasungbatan met laeng ti kararagko, ket isut’ nakitak ken inranudko ti naimbag a damag kenkuana. Mannakaawat unay kadagiti kasasaad a nakapilitak a mangipaampon kenkuana. Ti maibalakadko kadagiti babbai nga adda iti kastoy a situasion ket itultuloyyo ti agkararag ken ni Jehova. Nalabit agresultanto met iti pannakakitayonto manen iti anakyo. No saan, maipaayannakayo ti Dios iti talna ti panunot ken puso no agtalekkayo a naan-anay kenkuana.
G. S., Estados Unidos