Manipud Managbasatayo

Relihion ken Gubat Nakapagsuratak tapno iyebkasko ti panangapresiarko kadagiti makaisuro a serye a nangisalaysay iti relihion a makinamnamin iti gubat. (Abril 22, 1997) Talaga a naallukoyak iti immuna nga artikulo a “Panagpipinnatay iti Nagan ti Dios.” Ababa ken direkta, nangnangruna iti panangikalinteganna iti gapu nga inanamongan ni Jehova a Dios ti panangpapatay dagiti nagkauna nga Israelita kadagiti Cananeo.

S. J., Estados Unidos

Pakasaritaan ni Ginger Klauss Palubosandak a mangibaga kadakayo no kasano a naparegtaak iti kapadasan ni Ginger Klauss, “Ita, Naragsakakon a Sibibiag!” (Abril 22, 1997) Kas kenkuana, awan a pulos idin ti panagtalekko iti bagik, a nariknak nga awanen ti serserbik ken din maipatpateg. Tangay malapunosakon kadagidiay a rikna, inaldaw nga agsangsangitak a nangibaga iti Dios a kayatkon ti matay. Para kaniak, ni patay ti pakabang-arak. Ngem maysa nga aldaw inkararagko, “No pagayatam, pangngaasim ta ipaayannak iti pammaregta nga agbiag.” Kalpasan unay ti panangikararagko iti kasta, naawatko daytoy a ruar ti Agriingkayo! Idi nakitak daytoy nga artikulo, para kaniak ket sinungbatan ti Dios ti kararagko. Naammuak ken ni Ginger a ti panagtalinaed a naparato ken ti saan unay a panangpanunot iti bagik ti tumulong kaniak a mangtaginayon iti positibo a kababalin. Talaga a maikunak a daytoy a magasin ti nangted kaniak iti inspirasion nga agbiag.

M. K., Japan

Kabasbasak ti artikulo iti maikanem a daras, ket saanto a dayta ti kaudian! Agtawenak iti 21 ken amin-tiempo nga ebanghelisador. Dayawek unay ni Ginger Klauss gapu iti kinaregtana a mangasaba agpapan pay iti pannakaidalitna iti wheelchair. Ti kapadasanna ti nakatignayak a mangaramid iti amin a kabaelak nga agserbi ken ni Jehova.

S. Z., Italia

Agyamanak unay iti makapikapik a kapadasan. Gapu iti muscular dystrophy, kaaduan nga oras iti kada aldaw ket naidalitak iti pagiddaan, ken talaga a marigatanak unay a mangaramid iti trabaho a panangasaba a naka-wheelchair. Ti kapadasan ni Ginger ti nangparegta unay kaniak a mangsaranget kadagidiay a kanito no medio maldaangak gapu iti sakitko.

M. R., Italia

Agsakit iti Nakaro? Agyamanak iti artikulo nga “Agimtuod Dagiti Agtutubo . . . Apay pay Laeng nga Agsakitak iti Nakaro?” (Abril 22, 1997) Agtawenak iti 21 ken addaanak iti sickle-cell anemia. Maawatak ti rikrikna dagiti agtutubo iti daytoy nga artikulo. Sangkapanunotko no addanto pay ngata mangipateg ken mangikallaysa kaniak agpapan pay iti kaadda daytoy a sakitko. Ngem tinulongannak ti artikuloyo agsipud ta ammok itan a saan la a sisiak ti makarikrikna iti kastoy.

D. R., Estados Unidos

Di Agsinsina nga Aggayyem Pagyamanan iti kapadasan ni Anne-Marie Evaldsson. (Abril 22, 1997) Dayawek unay ti naespirituan nga irarang-ay daytoy a kabsat agpapan pay iti kinabulsekna. Ti pakasaritaan pinagpanunotnak. Adu kadakami ti di mangap-apresiar iti naited kadakami tapno usaren nga agserbi ken ni Jehova. Kayatko a komendaran ti kabsat ken ti nasungdo a gayyemna. Anian a nagsayaat a pagwadan!

R. A., Ecuador

Makaparegta unay ti pannakadamag nga adda pisikal a bulsek a makatrabaho, makapangasaba iti binalaybalay, makaidaulo iti panagadal iti Biblia, ken makatabuno kadagiti Nakristianuan a gimong iti kada lawas. Daytat’ nangiparikna kaniak a makagunggona ti panangaramidko iti amin a kabaelak iti ministerio, nga ipangpangrunak dayta. Agpayso nga awan kaasping ti kinapateg ti naespirituan a panagkita. Diakto malipatan ni Anne-Marie Evaldsson buyogen ti nauneg a panagayat ken panangapresiar.

J. O., Nigeria