Ita, Naragsakakon a Sibibiagak!
“Ammom a mataykanto, di ngamin?” inyimtuod ti doktor. Nakalkaldaang ta namindua idin a kayatko a matayak koman. Ngem saan itan. Palubosandak a mangilawlawag.
NAPADAKKELAK iti deppaar ti Long Island, New York, a sadiay nalatak a kumakarera a tsuper iti kotse ni tatangko. Perpeksionista ken kaykayatna ti makisalsalisal. Managpudpudot met ken nagrigat nga ay-aywen. Iti kasumbangirna, nataltalna, naul-ulimek a tao ni Inang, a madandanagan iti pannakikinnarera ni Amang nga uray la dina maitured a buyaen a makikarera.
Nasapa a nasursuromi ken ni manongko a taginayonen ti di unay panagpadlaw ken liklikan dagiti mangpaunget ken ni Amang idiay balay, banag a nakairuamanen ni Inang. Ngem saan a nalaka. Agbubutengkami a kanayon ken ni Amang. Inapektarannak agingga nga iti panagriknak ket awan aniaman a maaramidak a nasayaat. Nagin-inut a napukaw ti panagraemko iti bagik idi nga, iti nasapa a paset ti kinaagtutubok, maysa a “gayyem” ti pamiliami ti seksual a nangmolestia kaniak. Tangay diak kabaelan a daeran dagiti riknak, pinanggepko ti agpakamatay. Daydi ti damo a kayatko a matayak koman.
Panagriknak ket awan serserbik ken di maay-ayat isu a nakapataudak iti sakit iti pannangan a kadawyan kadagiti agtutubo a babbai a bassit ti panagraemda iti bagida. Nangrugiak a nagbiag a mangsapsapul iti kinagagar, agabuso iti substansia, makiabig, ken agparegreg—“lookin’ for love in all the wrong places,” kas kuna ti linia ti maysa a kanta. Agmotorsikloak, makikinnarera iti kotse, ken ag-scuba diving, ken pasaray mapanak agsugal idiay Las Vegas. Nagpabalakadak metten iti mammadles ken nagusar iti Ouija board kas pagraragsakan, a diak man la ammo idi dagiti peggad ti espiritismo.—Deuteronomio 18:10-12.
Kasta met a ti panangsapsapulko iti kinagagar ti nangituggod iti pannakiramanko kadagiti di legal nga aramid kas iti panaglako iti droga ken panagsipdut. Ti panangsapulko iti ayat ken pananganamong ti nangibunga met iti agkakanat a gagayyem a lallaki ken nobio. Ti panagtitipon amin dagitoy a banag ti nangparnuay iti estilo ti panagbiag a napegpeggad ngem iti impagarupko.
Maysa a rabii, kalpasan ti panaginum iti arak ken panagtomarko iti droga iti pagparadaan ti pakikarerak a kotse, simamaag nga impalubosko a ti gayyemko a lalaki ti agmaneho iti panagawidko. Kalpasan a naawananak iti puot iti makinsango a tugaw, nalawag a naawanan met iti puot. Kellaat a nariingak iti pigsa iti pannakaidungpar. Nayospitalak gapu iti adu a dunor, ngem immimbagak idi agangay, a ti laeng kannawan a tumeng ti nadangran.
Tarigagay nga Adda pay Koma Nasaysayaat
Nupay diak unay ipatpateg idi ti biagko, maseknanak unay iti kinatalged ken kalintegan dagiti ubbing ken animal ken maipapan iti pannakasalaknib ti aglawlaw. In-inanamaek a makita ti nasaysayaat a lubong ket, gapu ta pagreggetak ti tumulong a mangparnuay iti maysa, aktiboak iti adu nga organisasion. Daytoy a panangtarigagay iti nasaysayaat a lubong ti damo a nakaallukoyak kadagiti nasao ti maysa a katrabahuak a maysa kadagiti Saksi ni Jehova. Sangkasaona “daytoy a sistema” iti makapaupay a pamay-an no adda dakes a mapasamak idiay pagtrabahuan. Idi dinamagko no aniat’ kayatna a sawen, inlawlawagna nga addanto aldaw nga awanto aminen a pakadandanagan iti biag. Tangay pagraemak unay, dimngegak buyogen ti panaginteres.
Daksanggasat ta dikamin nagkita, ngem pulos a diak nalipatan dagiti nasaona. Naamirisko nga addanto aldaw a nasken a dakkel ti balbaliwak iti estilo ti panagbiagko tapno maay-ayok ti Dios. Ngem diak idi nakasagana. Nupay kasta, ipakpakaunak kadagiti mayat a mangikasar kaniak nga addanto aldaw nga agbalinak a Saksi ket no dida kayat dayta, makiinnukasak met no kuan.
Kas resultana, kayat ti kaudian a gayyemko a lalaki nga ammuen ti ad-adu pay, a kinunana a no interesadoak, mabalin nga interesadonto met. Isu a rinugianmi a sinapul dagiti Saksi. Ngem dakami ketdi ti nasarakanda idi nagtuktokda iti makinsango a ruanganko. Nairugi ti panagadal iti Biblia, ngem idi agangay, inkeddeng ti gayyemko a lalaki nga isardengna ti makiadal ken sublianannan ni baketna.
Masansan a di regular ti panagadalko iti Biblia. Medio nabayag bassit sakbay a naapresiarko ti panangmatmat ni Jehova iti kinasagrado ti biag. Idi nabalbaliwakon ti panunotko, nupay kasta, nakitak a rumbeng a kanselarekon dagiti biahek a mapan ag-skydiving sa isardengkon ti agsigarilio. Bayat nga ad-addan nga impategko ti biag, sisasaganaak idin a mangurnos ken di mangirisgon iti biagko. Idi Oktubre 18, 1985, insimbolok ti dedikasionko ken Jehova babaen ti bautismo iti danum. Diak man la impagarup nga agpegpeggad gayam idin ti biagko.
Kayatko Manen ti Matay
Sumagmamano a bulan kalpasanna—idi rabii ti Marso 22, 1986—addaak iti sanguanan ti balayko, nga iruruarko iti kotsek dagiti impalabak a kawesko, idi a maysa a bumanesbes ti tarayna a kotse ti nangdalapus kaniak sa naiguyodnak iti nasurok a 30 a metro! Maysaak a biktima ti nadalapus-sa-natarayan nga aksidente. Nupay nadangran ti ulok, diak naawanan iti puot.
Tangay naipaklebak iti tengnga ti nasipnget a kalsada, madanaganak no madalapusak manen. Nagkaro ti ut-ot a kaslattay diak maibturanen. Isu a nagkarkararagak ken ni Jehova a palubosannakon a matay. (Job 14:13) Nagparang ti maysa a babai, a nars gayam. Kiniddawko a baliwanna ti posision dagiti gurongko bayat a nabendaanda. Kastat’ inaramidna, ket nagaramid met iti tourniquet manipud iti maysa a paset ti kawesna, tapno agsardeng ti panagpadara manipud iti nakaro a pannakatukkol ti maysa a gurongko. Nasarakanda ti botasko a daradara iti lugar a maysa a bloke ti kaadayona!
Sangkadamag dagiti aglabas no ayan ti kotsek, ta dida ammo a magmagnaak laeng idi. Tangay diak ammo no kasano kaadayo ti nakaiguyodak, pagarupko no addaak pay laeng iti abayna [ti kotsek]! Idi dimteng dagiti paramedics, pagarupda no matayakon. Isu nga inawaganda dagiti polis a detektib, tangay nadagsen a krimen ti makadalapus. Naaresto idi agangay ti tsuper. Sinawarda ti lugar a kas kettay eksena ti maysa a krimen sada innala ti kotsek kas ebidensia. Agpadpada a nalikkiat dagiti ruangan iti maysa a sikigan ti kotsek.
Panangsaranget iti Krisis
Kabayatanna, idi naisangpetdakon iti lokal a trauma center, sangkaibagak nupay naikabil ti mask ti oksihena: “Didak iyalisonan iti dara, didak iyalisonan iti dara. Maysaak kadagiti Saksi ni Jehova!” Ti maudi a malagipko ket nariknak a kinartibda ti likudan ti kawesko ket agap-apura ken sipipigsa a bilin la a bilin ti trauma team.
Idi nariingak, nasdaawak ta sibibiagak. Agkaraawan idi ti puotko. Kada mariingak, kiddawek iti pamiliak nga awaganda ti agassawa a nangyadal kaniak iti Biblia. Saan a naragsakan ti pamiliak iti panagbalinko a Saksi, isu a basta “linipatandan” a pinakaammuan ida. Ngem impapilitko—dayta ti damo a kiddawek kada agmulagatak. Idi agangay, nagkurri ti panangipapilitko, ket maysa nga aldaw idi a nariingak, addadan. Anian a bang-ar! Ammon ti ili ni Jehova ti ayanko.
Ngem saan a nagpaut ti ragsakko, tangay nangrugin a bimmaba ti blood count-ko ket ngimmato ti gurigorko. Naikkat dagiti tulang a maatap a mangpatpataud iti impeksion, ket uppat a rod ti naikabil iti gurongko. Ngem di nagbayag, ngimmato manen ti gurigorko, ket ngimmisit ti gurongko. Adda gayamen gangrenana, ket ti pannakailasatko agpannuray iti panangputedda iti gurongko.
Pannakapilit nga Agpayalison iti Dara
Tangay nababa unayen ti blood count-ko, naibilang nga imposiblen ti operasion no awan mayalison a dara. Naayaban dagiti doktor, nars, miembro ti pamilia, ken sigud a gagayyem tapno pilitendak. Kalpasanna, nangrugin ti innarasaas iti ruangan. Natimudko nga adda planplanuen dagiti doktor, ngem diak naawatan no ania daydi. Naimbag ta nangngeg ti Saksi a bimmisita kadaydi a tiempo ti plano dagiti doktor nga ipilit kaniak ti panangyalison. Dagus a kinontakna dagiti lokal a Kristiano a panglakayen nga immay timmulong kaniak.
Natangdanan ti maysa a sikiatrista tapno tingitingenna ti kasasaad ti panunotko. Ti nalawag a panggep ket ideklarana a nakapuyakon ken ngarud ipueradan dagiti kalikagumko. Natungday daytoy a plano. Kalpasanna, maysa a miembro ti klero, a nagpayalison met idin, ti naayaban tapno kombinsirennak a mabalin ti agpayalison iti dara. Kamaudiananna, nangala ti pamiliak iti pammilin ti korte tapno ipilitda a mayalisonanak.
Iti agarup alas dos ti parbangon, maysa a timpuyog dagiti doktor, maysa nga estenograpo ti korte, maysa a mensahero ti korte, sumagmamano nga abogado a mangibagi iti ospital, ken maysa a hues ti simrek iti siledko iti ospital. Nangrugin ti bista. Didak pinakaammuan nga umuna, awan Biblia, awan mangibagi kaniak, ken adut’ nayagas kaniak gaput’ ut-ot. Ti imbunga ti bista? Saan a nangted ti hues iti pammilin ti korte, a kinunana a lallalo itan a padayawanna ti kinatarnaw dagiti Saksi ni Jehova ngem idi.
Immanamong ti maysa nga ospital idiay Camden, New Jersey, a mangtaming iti kasok. Tangay nakapungtot ti administrasion ti ospital idiay New York, impaidamda kaniak ti amin a panangagas, agraman dagiti pangep-ep iti ut-ot. Dida met pinalubosan nga aglanding ti helikopter a mangipan kaniak iti ospital idiay New Jersey. Naimbag ta nalasatak ti pannakayambulansiak nga agturong sadiay. Apaman a simmangpetak, nangngegko dagiti sasao a nadakamat iti pangrugian daytoy a pakasaritaan: “Ammom a mataykanto, di ngamin?”
Operasion—Naballigi
Nakakapkapsutak nga uray la kasapulan a tulongannak ti maysa a nars a mangaramid iti marka nga X iti porma ti pammalubos a maoperaak. Kasapulan a maputed ti kannawan a gurongko iti ngatuen ti tumeng. Kalpasanna, bimmaba ti hemoglobin-ko iti nababbaban ngem 2, ket impagarup dagiti doktor no grabe ti pannakadangran ti utekko. Didak ngamin napasungbat idi inyarasaasda ti “Virginia, Virginia”—ti nagan iti dokumento ti pannakayospitalko. Ngem apaman a nangngegko ti “Ginger, Ginger,” a siaalumamay a nayarasaas kalpasanna, nagmulagatak ket nakitak ti maysa a lalaki nga idi la a nakitak.
Ni Bill Turpin ket naggapu iti maysa kadagiti lokal a kongregasion dagiti Saksi ni Jehova idiay New Jersey. Naammuanna ti birngasko a Ginger—nga isut’ ammo dagiti Saksi idiay New York a naganko iti intero a biagko. Nagsalsaludsod iti masungbatak babaen ti panagkiremko, tangay addaak idi iti maysa a respirator ken pulos a diak makasao. “Kayatmo kadi no kanayon a bisitaenka?” dinamagna, “ken ibagak kadagiti Saksi idiay New York ti maipapan kenka?” Masansan a nagkiremak! Inrisgo ni Kabsat Turpin ti ililibasna a sumrek iti siledko, tangay imbilin ti pamiliak nga awan mapalubosan a Saksi a bumisita kaniak.
Kalpasan ti innem a bulan a pannakayospital, kaskasdi a simple a bambanag laeng dagiti maaramidak iti inaldaw, kas iti pannangan ken panagsipilio. Idi agangay, immawatak iti artipisial a gurong ken nakapagnapagnaakon babaen ti maysa a walker. Idi rimmuarakon iti ospital idi Setiembre 1986 ken nagsublin iti apartmentko iti innem pay a bulan wenno nasursurok, maysa a health aide ti nangkadua kaniak idiay balay tapno tulongannak.
Tulong Manipud Panagkakabsattayo
Sakbay pay a nagawidak, agpayso a naapresiarko ti kaipapanan ti panagbalin a paset ti Kristiano a panagkakabsat. (Marcos 10:29, 30) Siaayat nga impaay dagiti kakabsat saan laeng a dagiti pisikal a kasapulak no di pay ket dagiti naespirituan. Babaen ti naayat a tulongda, nakatabunoak manen kadagiti Nakristianuan a gimong sa, idi agangay, nabaelak payen ti makiraman iti maawagan panag-auxiliary pioneer a ministerio.
Narisut iti sumagmamano a bulan ti sibil a darum maibusor iti tsuper ti kotse, a kadawyan a lima a tawen sakbay nga agparang iti kalendario ti korte—a nakasdaawan ti abogadok. Babaen iti kuarta a naawatko manipud iti areglo, nabaelak ti immakar iti nanamnam-ay a balay. Kanayonanna, nakagatangak iti van nga addaan iti wheelchair lift ken addaan iti hand control. Gapuna, idi 1988, simrekak iti ranggo dagiti regular pioneer, a mangbusbusbos iti agarup 1,000 nga oras iti trabaho a panangasaba iti kada tawen. Iti panaglabas dagiti tawen, tinagiragsakko ti makipagtrabaho kadagiti teritoria iti estado ti North Dakota, Alabama, ken Kentucky. Naibiahekon ti nasurok a 150,000 a kilometro iti van-ko, a kaaduan kadagidiay ket iti Nakristianuan a ministerio.
Adut’ makapakatawa a kapadasak iti panangusarko iti de-koriente a tallot’ daligna nga scooter-ko. Namindua a naaksidenteak bayat a makipagtartrabahoak a kadua ti assawa dagiti agdaldaliasat a manangaywan. Naminsan, idiay Alabama, nagkamaliak iti pagarupko a malaktawko ti bassit a waig ngem nagdissoak iti daga, a pitakpitak. Nupay kasta, ti panagtalinaed a naparato ken ti saan unay a panangpanunot iti bagik ti nakatulong kaniak a mangtaginayon iti positibo a kababalin.
Pabpabilgen ti Sigurado a Namnama
No dadduma, gistay manglapunos dagiti parikut iti salun-at. Naminduan a masapul nga isardengko ti agpayunir sumagmamano a tawenen ti napalabas agsipud ta kasla maputedto metten ti maysa pay a gurongko. Kanayon itan a madanaganak a mapukawkonto ti gurongko, ket iti napalabas a lima a tawen, kanayon nga us-usarekon ti wheelchair. Idi 1994, nablo ti takiagko. Kasapulan nga adda tumulong kaniak nga agdigus, agpelles, agluto, ken agdalus ken mangimaneho kaniak sadino man. Kaskasdi, gapu iti tulong dagiti kakabsat, naitultuloyko ti agpayunir nupay adda daytoy a tubeng.
Iti unos ti panagbiagko, sinapsapulko dagiti kasla pakagagaran, ngem ita maamiriskon nga iti pay laeng masakbayan dagiti makapagagar unay a panawen. Ti pammatik nga agasanton ti Dios amin dagiti agdama a sakit iti napartak ti iyaadaninan a baro a lubongna ti mangparagsak itan kaniak a sibibiagak. (Isaias 35:4-6) Iti dayta a baro a lubong, segseggaak ti makipaglangoyto a kadua dagiti balyena ken dolphin, a sukisokekton dagiti bantay nga addaan leon ken dagiti urbonna, ken mangaramid kadagiti simple a banag a kas iti pannagna iti playa. Maragsakanak a mangsirmata nga aramidekton amin a bambanag a nangparsuaan kadatayo ti Dios tapno maragsakantayo iti dayta a Paraiso a daga.—Kas insalaysay ni Ginger Klauss.
[Ladawan iti panid 21]
Idi paset pay la ti biagko ti panagsugal
[Ladawan iti panid 23]
Dagiti kari ti Dios ti mangpabpabileg kaniak