Manipud Managbasatayo
Panagsakit Nagustuak ti artikulo nga “Agimtuod Dagiti Agtutubo . . . Kasano a Madaerak ti Nakaro a Panagsakitko?” (Hunio 22, 1997) Dayawek da Jason, Ashley, ken Carmen iti naballigi a panangdaerda iti sakitda.
R. D., Francia
Agpayso a praktikal, makaparegta, ken epektibo ti imbalakadyo. Ti pakasaritaan ni Ashley ti partikular a nangparegta kaniak. Maysaak nga amin-tiempo a ministro dagiti Saksi ni Jehova. Ti panangpanunot nga adda tattao nga agregget a sumrek iti amin-tiempo a ministerio ngem dida kabaelan gapu iti salun-atda ti nangparegta kaniak nga agtultuloy iti laksid dagiti pakarigatak.
D. I., Albania
Sipud idi naammuak nga addaanak iti Crohn’s disease, nasurok a sangapulon a daras a nayospitalak ken kasapulan a mamindua a maoperaak. Nupay kasta, iti napalabas nga uppat a tawen, nakapagserbiak iti naiputputong a teritoria iti ganggannaet a lugar. Ket nupay saanak pay laeng a nasalun-at a naan-anay, dakkelen ti pimmipiaanna. Dakkel a pammaregta kaniak dagiti artikulo.
G. H., Ecuador
Mapukpukaw nga Atap nga An-animal Agad-adalak iti zoology, ket talaga a nagustuak dagiti serye ti “Asinonto ti Mangispal Kadagiti Animaltayo?” (Hulio 8, 1997) Sapay koma ta maamiris dagiti tattao a mangbasbasa kadagitoy nga artikulo no kasano a ti kinaagum ken kinaulpit inapektaranda ti adu a kita ti biag.
G. H., Estados Unidos
Kas managayat unay iti atap nga an-animal, naragsakanak a nangbasa kadagiti artikuloyo. Dakkel ti maitultulong dagiti zoo kadagiti agpegpeggaden a maungaw a kita ti biag. Ngem no dagiti zoo ti maudi a namnama dagiti atap nga an-animal, talaga nga agpegpeggad ngarud dagiti atap nga an-animal. Saan a solusion ti panangikkat kadagiti animal iti natural a pagnanaedanda ken paaduen ida iti konkreto a kabakiran.
M. T., Canada
Nupay makomendaran dagita a panagregget para iti panangitalimeng, patienmi a ti kakaisuna a manayon a solusion ket ti panangtaming ti Pagarian ti Dios kadagiti kinabaknang ti daga. (Isaias 11:9)—ED.
Kinatalged Kadagiti Taraken Kayatko ti agyaman iti artikulo a “Natalged Kadi Dagiti Ubbing iti Asoyo?” (Hulio 8, 1997) Maysaak a propesional a para sanay iti aso iti 18 a tawen ket kanayon nga ikagkagumaak nga ipaganetget ti kinapateg ti panangsanay iti aso ken panagbalin ti maysa a tao a responsable. Nasdaawak unay a nangbasa iti makaisuro nga artikulo ket naragsakanak a nakaammo nga ar-aramiden ti nainterbiu a para sanay ti umasping a panangsanay nga ar-aramidenmi. Sapay koma ta amin nga addaan iti aso basaen ken iyaplikardanto ti balakad.
B. C., Estados Unidos
Kayatko nga inayon ti maysa a punto: Nainkasigudan dagiti aso ti agtignay no adda makan. Mabalin a mabiktima ti ubing a mangipaypayapay iti hot dog wenno kendi bayat a magmagna a manglabas iti aso. Saan a panggep ti aso ti dumuklos, ngem mabalin nga agawenna ti taraon ket, inton agangay, makagatna ti ima ti ubing. Maibalakad unay kadagiti nagannak nga aramidenda ti annongenda a mangsaluad iti daytoy a banag.
K. S., Estados Unidos
Apresiarenmi dagitoy a kanayonan a kapaliiwan.—ED.
Narugit nga Estilo ti Panagbiag Apresiarek ti artikulo a “Narugit nga Estilo ti Panagbiag—Kasano ti Kanginana?” (Hulio 22, 1997) Kas Kristiano nga agtutubo, adu ti pakasulisogak. Ngem daytoy nga artikulo ti nakaamirisak a no surotek dagiti prinsipio ti Biblia, maliklikanmi dagiti sakit ken pannakadangran.
R. K., Estados Unidos
Agsao a Tambor Kalpasan ti panangbasak iti nagsayaat nga artikulo a “Talaga Kadi nga Agsao Dagiti Tambor iti Africa?” (Hulio 22, 1997), nagdamagak ken ni lolok, a nasurok a sangagasuten ti tawenna, tapno maammuak no agpayso ti sinaguday ti artikulo. Pinasingkedanna ti kinaagpayso ti tunggal detalye, ket nasdaawak!
G. M. O., Nigeria