Manipud Kadagiti Agbasbasa
Saan a Nasalun-at nga Estilo ti Panagbiag Iti napalabas a sumagmamano a bulan, agsaksakitak, isu a makaparagsak a maammuan a mapasayaattayo ti salun-attayo babaen ti panangbalbaliw iti estilo ti panagbiagtayo. Iti panangbasak iti serye a “Patpatayennaka Aya ti Estilo ti Panagbiagmo?” (Hulio 8, 1999) naamirisko a masapul a kissayak ti mangan iti dadduma a taraon ken mangan iti balanse a taraon a pakairamanan ti ad-adu a prutas ken natnateng.
E.P.M., Brazil
Mabayag a Panagtignay Pinaregtanak ti artikulo a “Bukbukel a Nagbunga Kalpasan ti Adu a Tawen.” (Hulio 8, 1999) Daytoy ti maikatlo a tawenko nga agserserbi kas amin-tiempo nga ebanghelisador, ket no saan nga agballigi dagiti namnamaek, maupayak ken mapukaw ti ganaygayko nga agtultuloy. Nakatulong kaniak ti panangbasak iti daytoy nga artikulo a mangaramid iti amin a kabaelak itan, a baybay-ak a ni Jehova ti mamagbunga.
T. N., Japan
Pannakaumsi Nagustuak ti Hunio 22, 1999 nga artikulo nga “Agimtuod Dagiti Agtutubo. . . Kasanok a Madaeran ti Pannakaumsik?” Sipud pay idi addaak iti kindergarten, agsalsaludsoden kaniak dagiti kaeskuelaak maipapan kadagiti patpatiek. No dadduma, masaktan ti riknak iti wagas ti panagsaludsodda. Namin-adu a daras a dandanin diak makaanus. Mautobko itan a suot laeng ti pammati dagita. Uray ta naballigi ti panangasabak kadagiti dadduma a kaeskuelaak.
L. C., Estados Unidos
Nalalaisak met gapu ta nagkedkedak a mangrambak iti dadduma a narelihiosuan a piesta wenno makiraman iti patriotiko a seremonia. Binutbutengdak met gapu iti panagbalinko a napudno ken gapu iti panangsurotko kadagiti moral nga estandarte ti Biblia. Ti pananggun-od iti umiso a pannakaammo ti nangtulong kaniak a mangikalintegan. Natulongannak daytoy a di agbain a mangyebkas ken mangipakaammo kadagiti patpatiek.
H. C., Zambia
Nupay nabayagen a nalabsak ti kinaagtutubo—nasurok a 50 ti tawenkon!—naapresiarko ti artikulo. Adda dagiti tiempo a ti ibubusor a maipasango kadatayo iti ministerio kigtotennatayo ket kasla kayattayo ti bumales/sumungbat. Dayta ti makagapu nga inapresiarko ti pammalagip a “ti makapainsulto a sungbat, uray mayangaw dayta, ad-adda laeng a mangrubrob ken mangawis iti ad-adu pay a panangumsi.” Ikagkagumaanak ti mangikalintegan a di agparang a bumalbalesak, ket daytoy a pammalagip ti nangkombinsir kaniak a masapul nga itultuloyko nga aramiden ti kasta.
A. F., Estados Unidos
Agbiag a Naun-unday Natignayak nga agsurat maigapu iti nagsayaat a serye a napauluan “No Kasano ti Agbiag a Naun-unday ken Nasalsalun-at.” (Hulio 22, 1999) Kamaudiananna, maawatakon ti nagdumaan ti promedio ti biag ken ti manamnama a kaatiddog ti biag. Kasta met, ti nasayaat a balakad no kasano a lapdan dagiti makadadael nga epekto ti panaglakay wenno panagbaket ket pammalagip a mausarko a sitataktika tapno matulongak ti 88 ti tawenna nga apongko a lakay, a mangsarsaranget iti sagpaminsan a panangay-ay iti bagina.
T. N., Estados Unidos
Aso a Para Dengngeg Kayatko ti agyaman kadakayo iti artikulo a “Ti Asok ti Para Dengngegko!” (Hulio 22, 1999) Ti pannakaammok a kasapulan a sarangten dagiti tattao nga addaan parikut iti panagdengngeg dagiti nakaro a problema ti nakatulong kaniak nga agbalin nga ad-adda a mannakaawat kadakuada. Pagay-ayatko met dagiti aso, ket naragsakanak a makaammo no kasano a makatulong ken makasaranayda iti adu a tattao.
L. B., Italia
Adda met aso a tumultulong kaniak. Adu a tiempo nga addaak iti wheelchair, gapu ta agsagsagabaak iti fused spine ken fibromyalgia. Awan umanay a sasao a mangdeskribir kadagiti banag nga ar-aramiden ti asok para kaniak. Tulongannak no mapanak aggatang ken no agdalusak iti balay. Tulongannak pay ketdi iti Nakristianuan a ministerio babaen ti panangawitna iti literaturak.
K. W., Estados Unidos