Manipud Kadagiti Agbasbasa

Cystic Fibrosis Kayatko nga iyebkas ti napalaus a panagyamanko iti artikulo a “Panangibtur iti Cystic Fibrosis.” (Oktubre 22, 1999) Agarup kataebmi ken lakayko ni Jimmy Garatziotis ken ni misisna, ket makaparegta unay a makita dagiti agtutubo nga addaan iti kasta a nabileg a pammati nupay addaanda kadagiti nakaro a parikut.

S. D., Italia

Adun a tawen nga agur-urayak a maipablaak ti kasta nga artikulo. Adda cystic fibrosis ti innem ti tawenna a balasangmi. Isu a binasak a dagus ti artikulo. Makaparagsak a maammuan ti kinaregta ni Jimmy Garatziotis iti trabaho a panangasaba, uray no masakit. Ket makaay-ayo a maammuan nga adda namnamaentayo a baro a lubong a sadiay awanton ti sakit.

H. O., Estados Unidos

Ti ulidan ni Jimmy ti mangpaneknek nga uray no saantayo a nasalun-at, adu ti maaramidantayo a mangidaydayaw ken Jehova.

P. C., Brazil

Droga Pagyamanan iti panangipablaakyo iti serye a “Konkontrolen Kadi ti Droga ti Lubong?” (Nobiembre 8, 1999) Agus-usarak idi iti cocaine, marihuana ken hashish. Nalabes met ti panaginumko iti arak ken nasurok nga 40 ti sigarilioek iti kada aldaw. Nagrigat nga ikkaten dagitoy a bisio, ngem pinabilegnak ti Dios. Siam a tawenen ti napalabas nanipud idi insardengko, ket agyamanak ta nakalung-awak manipud iti nakaisagmakak iti daytoy a lubong a diak naakaran iti aniaman a grabe a sakit wenno nagtungpal iti pagbaludan. Tangay ammok ti panangparigat ti droga iti bagi, panunot, ken ekonomia, namnamaek a dagiti artikulo a kas kadagitoy ti mangtignay iti puso dagiti agtutubo.

G. M., Italia

Inusarko ti serye iti maysa a salaysay idiay eskuelaan. Gapu iti dayta, nakaawatak iti posible a kangatuan a grado ken pammadayaw ti mannursurok. Kanayon a magustuak ti agbasa iti Agriingkayo!, nangnangruna dagiti artikulo a mainaig kadagiti agdama nga isyu. Matulongannak nga agbalin a realistiko maipapan iti biag.

I. M., Italia

Hardin ti Palma Ti artikulo a “Panangsarungkar iti Karkarna a Hardin” (Nobiembre 8, 1999) ti maysa kadagiti kapintasan nga artikulo a nagustuak itay nabiit. Kas man la addaak idiay Paraiso, a siaannad nga agpalplano a mangaramid iti kasta a napintas a hardin. Talaga a naparegtaak iti panagayat daytoy a lalaki kadagiti mulana. Anian ti panangapresiarna kadagiti nagpipintas a parsua ni Jehova ket kastatayo met koma!

L. C., Canada

Pannakigayyem Natignayak unay iti artikulo nga “Agimtuod Dagiti Agtutubo . . . Kasano nga Agbalinak nga Ad-adda a Mannakigayyem?” (Nobiembre 22, 1999). Agtawenak iti 16 ket marigatanak a makikomunikar kadagiti sabsabali, nangnangruna kadagiti Nakristianuan a gimong. Pagyamanan iti pannakaseknanyo kadagiti agtutubo a kas kaniak nga addaan iti kastoy a parikut. Ikagumaakto nga iyaplikar ti nasayaat a balakadyo iti daytoy nga artikulo.

I. A., Francia

Kumakanta a Tumatayab Pagyamanan iti artikulo a “Dagiti Makaay-ayo a Dumudueto.” (Disiembre 8, 1999) Kas man la mangmangngegko ti nagpintas a panagkanta dagitoy a tumatayab iti maysa a sanga ti kayo! Inaldaw nga agyamanak ken Jehova iti panangparsuana kadagiti animal a manglinglingay kadatayo.

Y. S., Japan

Diabetes Kas paset ti innalak a kurso kalpasan ti panagturposko iti kolehio, natudinganak a mangidaulo iti maysa a seminar maipapan iti diabetes mellitus. Nakatulong unay ti simple ken direkta a panangilawlawag a naipablaak iti artikulo nga “Adda Diabetes ti Balasangmo!” (Setiembre 22, 1999). Naamirisko iti pakasaritaan ni Sonya Herd no kasano a kasapulan unay ti pasiente ti nalawag nga impormasion.

T. K., Brazil