Manipud Kadagiti Agbasbasa
Ekolohikal a Pagtaraknan Agyamanak iti artikuloyo a “Ti Pantanal—Makakayaw a Pagtaraknan.” (Setiembre 8, 1999) Pinampanunotko a kas man la kimmuyogak iti nagsurat iti dayta a makapainteres unay a lugar, a nangtagiragsak iti natalna ken natalingenngen a kasasaad sadiay. Sigagagar nga ur-urayek ti aldaw inton pagbalinen ti Dios a kasta ti kasasaad ti intero a planeta.
M. A., Italia
Diabetes Kabasbasak iti maikadua a daras ti artikulo nga “Adda Diabetes ti Balasangmo!” (Setiembre 22, 1999) Sangapulo a bulanen ti napalabas idi naammuak nga addaanak iti Type 1 a diabetes. Kanayon idi a nakaradkadak ken agserserbi kas maysa a payunir, amin-tiempo a managebanghelio, nanipud idi agtawenak iti 17. Kapilitan nga adu ti balbaliwak iti biagko iti napalabas a sumagmamano a bulan. Masapul nga agusarak iti insulin pump, ket kapilitan nga insardengko ti panagpayunir gapu iti gastos ti pannakaagas ti sakitko. Ngem agyamanak iti panangipablaakyo kadagita nga artikulo a mangipalagip kadakami a mapaspasaran met ti dadduma ti umasping a pakasuotan.
B. F., Estados Unidos
Adda diabetes ti uppat ti tawenna a barok nanipud pay idi dua ti tawenna. Maawatanmi a naimbag ti rikna ni Sonya ken ti pamiliana a naisalaysay iti artikulo. Yamanenmi ti naayat a Nakristianuan a panagkakabsat a nakatulong kadakami a mangdaer iti parikut.
C. R., Moldova
Medio nabayagen nga ur-urayek nga adda koma makaparegta a pagiwarnak maipapan iti daytoy a tema. Sangapulo ket pito ti tawenko ken addaanak iti diabetes nanipud pay idi 5 ti tawenko. No maminsan nakarigrigat a daeran daytoy a sakit. Ngem maragsakanak ta adda simple nga artikulo a maipakitak iti pamiliak ken iti gagayyemko a mangsungbat iti salsaludsodda ken mangpalawa iti pannakaammoda maipapan iti diabetes.
K. W., Canada
Delikado? Nabasak ti nagsayaat nga artikulo a napauluan “Adu ti Naaramidan Dagiti Babbai.” (Hunio 22, 1999) Medio nasdaawak a nakakita nga awan ti aniaman a pangsalaknib iti mata dagiti babbai nga agtartrabaho iti konstruksion.
R. L., Estados Unidos
Manamnama dagiti agbasbasa nga adda pangsalaknib iti mata dagitoy a boluntario a trabahador no aktual nga agtartrabahoda. Nakiddaw kadakuada a maretratoda—nga awanan iti pangsalaknib iti mata—tapno napimpintas ti pannakaretrato dagiti naragsak a rupada.—ED.
Kinaawan Hustisia Kayatko ti agyaman iti artikulo nga “Agimtuod Dagiti Agtutubo . . . Kasano a Madaerak ti Kinaawan Hustisia?” (Setiembre 22, 1999) Nupay ubingak pay, adun ti sinagabak a kinaawan hustisia ken kinaranggas isu nga adu ti ing-ingpek a sakit ti nakem. Daytoy ti gapu a narigatanak a mangitultuloy iti kinapayunirko iti napalabas a walo a tawen. Naparegtaak iti sasao nga: “Aramidem ti amin a kabaelam tapno makadaerka.” Ipasimudaag dagitoy a sasao ti ayat, isu a naimpusuan nga agyamanak kadakayo.
A. G., Italia
Musika Adun a tawen nga agserserbiak a panglakayen iti kongregasion Kristiano ken kanayon a maseknanak kadagiti agtutubo. Ngem naupayak itay nabiit, agsipud ta di naikankano ti pammagbaga nga inkagumaak nga iranud maipapan iti dadduma a moderno a musika. Nupay kasta, ti serye a “Musika—Nabilbileg Ngem ti Pagarupmo” (Oktubre 8, 1999) ti talaga a kasapulak. Nagsayaat dagiti naadaw a sasao manipud iti dadduma a sekular a pagbasaan ken mannurat maipapan kadagiti dakes nga epekto ti dadduma a musika. Iranudkonto dagitoy a kapanunotan kadagiti agtutubomi.
D. H., Bolivia
Kas maysa a kumakanta ken maestra ti musika iti elementaria, makapainteres unay dagiti nabiit pay nga artikuloyo maipapan iti musika. Pagyamanan!
K. F., Estados Unidos