Manipud Kadagiti Agbasbasa

Selibasia Diak umanamong iti maysa a benneg ti “Panangmatmat iti Lubong” a napauluan “Selibasia​—Apay?” (Setiembre 22, 1999) Kinunayo a “saan a naibasar kadagiti Kasuratan” ti argumento ti Simbaan. Gapu iti Mateo 19:10-12 ken 1 Corinto 7:8, 26, 27, masapul nga ibagak nga adda nakaibasaran ti selibasia.

M. T., Estados Unidos

Agpayso nga isingasing ti Biblia ti panagwaywayas kas ti matarigagayan a kalat para iti dadduma. Ngem saan nga ipakalikagum ti Biblia a masapul a di makiasawa dagiti Kristiano a ministro. Kasado a lallaki ni apostol Pedro ken ti dadduma pay a mapagtalkan a lallaki iti nagkauna a kongregasion Kristiano. (1 Corinto 9:5; 1 Timoteo 3:2) No kasta, saan a naibasar iti Kasuratan ti kapilitan a selibasia.​—ED.

An-anito Kas linguista, masapul a pakaammuankayo iti maysa a kamali iti Oktubre 22, 1999, nga Agriingkayo! Iti serye nga “An-anito​—Apay a Nakapegpeggad?” imbagayo a ti Aleman a sao a gesundheit isut’ pamay-an ti panangibaga iti “Bendisionannaka koma ti Dios” no adda agbaen. Iti Iloko, “salun-at” ti kayulogan dayta a sao.

C. C., Estados Unidos

Saanmi nga ibagbaga a ti “gesundheit” ti eksakto a patarus ti Iloko a sao. Nailista dayta agraman ti dua a ganggannaet pay a lenguahe a “kaasping” ti pannakausar ti Iloko a balikas a “Bendisionannaka koma ti Dios.”​—ED.

Cystic Fibrosis Kabasbasak ti artikulo a “Panangibtur iti Cystic Fibrosis.” (Oktubre 22, 1999) Natignayak iti wagas ti panangibtur ni Jimmy Garatziotis iti daytoy nakaro a sakit. Makaparegta met ti panangapresiarna iti patpatgenna nga asawa. Maamirisko no kasano kaadu ti tagtagilag-anentayo​—uray ti normal a panagangestayo!

D. A., Inglatera

Awan kasta a sakitko ngem adda sakit ti barak a pulmonary atresia ken adda depekto dagiti uratko. Naliwliwaak a nangbasa iti daytoy a kapadasan. Agpadakami ken ni Jimmy iti ar-arapaapen idi kinunana a kayatnanto ti agtaray iti tay-ak, arapaap a namnamaentayo a matungpal iti asidegen a baro a lubong nga inkari ti Dios.

F. A., Italia

Ti Danube Kayatko ti agyaman kadakayo iti nagsayaat nga artikulo a “Ti Danube​—No Makapagsao La Koma!” (Oktubre 22, 1999) Idi ubingak pay, nagnaedak iti asideg ti puon ti Danube ket nagustuak dayta. Kas hydrologist wenno mangad-adal iti kasasaad ti danum, adda gundawayko a mangadal a naimbag kadagiti karayan, ket patiek a nakaskasdaaw dagitoy a parsua ti Dios.

D. O., Croatia

Kinunayo a ti University of Vienna, a naipasdek idi 1365, ti kabayaganen iti lubong dagiti Aleman ti pagsasaona. No dagiti lugar nga Aleman ti lenguahe nga agdama a maus-usar ti tuktukoyenyo​—Alemania, Austria, ken sumagmamano a paset ti Switzerland​—husto daytoy a kinunayo. Ngem ti kabayaganen nga unibersidad nga Aleman ti maus-usar a lenguahe ket naipasdek idi 1348 idiay Prague, ti kabesera ti agdama ita a Czech Republic. Austria idi ti makinsakup iti dayta.

M. E., Alemania

Kinapudnona, ti Prague ti kabesera idi ti Bohemia. Nupay agpadpada nga Aleman ken Czech ti pagsasao sadiay, Latin ti opisial idi a lenguahe iti unibersidad.​—ED.

Kinamanagbabain Pagyamanan unay iti artikulo nga “Agimtuod Dagiti Agtutubo . . . Apay a Saanak Unay a Mannakigayyem?” (Oktubre 22, 1999) Taraon daytoy iti umiso a tiempo. Managbabainak nanipud pay idi ubingak. Agtawenak iti 17 ket marigatanak a makiam-ammo ken makilangen kadagiti kabbaro kadagiti Nakristianuan a taripnong. Gapu iti daytoy, adun a gundaway ti nakaikapisak a makiam-ammo iti adu ken matagiragsak ti pannakilangen kadagiti kakabsat. Tinulongannak ti artikuloyo a nangamiris a gagangay ti kinamanagbabain ken kabaelak a parmeken dayta.

B. H., Estados Unidos