Manipud Kadagiti Agbasbasa
Droga Nagsayaat ti pannakasirarak ti serye a “Konkontrolen Kadin ti Droga ti Lubong?” (Nobiembre 8, 1999) Maysaak a probation officer iti lugar a nagadu ti agtutubo nga adikto iti droga. Adunto ti matulongan daytoy a ruar a mangisardeng iti bisio a panagdroga.
J. T., Alemania
Naparegtaak unay iti pakasaritaan ni Pedro ken ti misisna a ni Ana. Innem a tawen a dinadael ti droga ti biagko. Babaen ti panagadalko iti Biblia ken pannakisaritak iti sabsabali maipapan iti maad-adalko, naaddaanak iti naespirituan a bileg a mangisardeng iti bisiok a panagdroga.
D. J., Estados Unidos
Ag-15 a tawenen a mangisursuroak maipapan iti salun-at kadagiti klase iti eskuelaan. Naintiempuan unay daytoy a ruar ti Agriingkayo!, tangay madama nga isursurok ti tema nga arak, droga, ken panagmaneho. Sigurado nga usarekto ti impormasion iti daytoy a ruar!
C. J., Estados Unidos
Nuez ti Tagua Agbasbasaak iti tunggal ruar ti magasinyo nanipud pay idi 1954, ket kanayon a masdaawak kadagiti artikulo a mangdeskribir kadagiti nakaskasdaaw a pakausaran dagiti banag a pinarsua ni Jehova. Ti “Nuez ti Tagua—Maispalna Aya Dagiti Elepante?” ket maysa kadagita nga artikulo. (Nobiembre 8, 1999) Pagyamanan iti panangtulongyo kadakami nga ad-adda a mangapresiar iti nakaskasdaaw a kinasirib ti Diostayo.
D. H., Estados Unidos
Panagkulam Pagyamanan unay iti artikulo nga “Ania ti Adda iti Likudan ti Panagkulam?” (Nobiembre 8, 1999) Adu idi a tattao ti mangipagarup a naalas ken babbaket dagiti mangkukulam. Ngem ti movimiento a Wicca ti mangaw-awis iti adu nga agtutubo a lallaki ken babbai. Nangrugin a naginteres iti daytoy ti balasangko. Ngem nagkiddaw a maaddaan iti bukodna a suskripsion iti Agriingkayo!, ket adda daytoy nga artikulo iti immuna a ruar a naawatna! Dimteng iti umiso a tiempo.
B. H., Estados Unidos
Anghel Kablaawankayo kadagiti prangka a serye dagiti artikuloyo nga “Ania ti Pudno Maipapan Kadagiti Anghel?” (Nobiembre 22, 1999) Adda met laengen nakaitured a nagsurat iti mapagraeman, ngem napudno a panangibutaktak kadagiti peggad dagiti di umiso a pammati maipapan kadagiti anghel. Apresiarek a nangnangruna ti ladawan iti panid 9, a mangipakita a saan a kayat dagiti anghel ti pammasablog ken kinalatak a maipapaay ita kadakuada.
J.L.A.H., Brazil
Panagsagaba Gapu iti Sakit Pinaregtanak ti pakasaritaan ti pamilia Major iti artikulo a “Nasursuromi ti Agpannuray iti Dios Kadagiti Napasaranmi a Rigat.” (Nobiembre 22, 1999) Adu ti nakaro a depekto ti puso ti anakmi a masapul a maoperaan. Kinuna kadakami ti doktor, ‘Matay ti barom no saan a mayalisonan iti dara!’ Dakam nga agassawa ti pinagsina pay ketdi dagiti doktor a kinasarita tapno mapilitdakami nga umannugot iti pannakayalison ti dara. Ngem kas iti pamilia Major, nagkararagkami a bumileg ken tumuredkami. Nalasatan ti baromi ti adu nga operasion ket nakaradkad itan. Imbagana a kayatnan ti agpabautisar kas maysa kadagiti Saksi ni Jehova.
B. C., Estados Unidos
Nayospital idi ni lakayko, ket imbaga dagiti doktor a maidalit sadiay iti adu a bulan. Mabambannogak unay idi a mangaywan iti tallo nga annakko bayat nga inaldaw met a bisbisitaek ni lakayko. Talaga a nakapatpateg dagiti Kristiano a kakabsatko a timmulong nga agaywan kadagiti annakko. Idi dandani diak maibturanen, nagawiden ni lakayko. Idi binasak daytoy makaparegta nga artikulo, talaga a nakasangitak gapu ta naimpusuan a makipagrikna ken makipagladingitak iti amin a sinagaba ti pamilia Major. Anian a ragsakko a makaammo a kasta unay ti panagpannurayda ken Jehova!
J. A., Estados Unidos