Manipud Kadagiti Agbasbasa
Kaadda ti Dios Diak madeskribir no kasanok a naamiris a makatulong unay ti serye a “Pudno Aya nga Adda Dios?” (Pebrero 8, 1999) Insurona kaniak ti Dios a namin-adun a nangnangngegko ngem diak pay idi am-ammo. Naimpusuan nga agyamanak ta linawaganyo ti dana ti kinapudno kadagiti tattao a kas kaniak.
C. P., Brazil
Makatulong Nupay Bulsek Pagyamanan iti pakasaritaan ti biag ni Polytimi Venetsianos a “Makatulong ken Naragsak Nupay Bulsekak,” iti Pebrero 8, 1999 a ruar. Ti tured ken nabileg a pammatina iti Dios ti nangtukay unay iti pusok. Iti sabali a bangir, napno iti saem ken rigat ti biag daytoy naisalsalumina a babai. Ngem iti kasumbangirna, napnuan dayta kadagiti di magatadan a pagimbagan. Patiek a dakkelto ti maitulong ken maiparegta ti pakasaritaanna iti amin a nabannoganen kabayatan daytoy narigat a lumba iti biag.
K. R., Russia
Panagkawkawes Agtawenak iti 11, ket awan ti maibagak a pangyebkas iti panagyamanko iti ekselente nga instruksion iti artikulo a “Ti Kita ti Kawes nga Isuottayo—Pudno Aya a Napateg?” (Pebrero 8, 1999) Kayatko idi a tuladen ti panagkawkawes dagiti kaklasek. Ngem tinulongannak daytoy nga artikulo a makaawat a rumbeng a naurnos ti panagkawkawesko—saan a naburara wenno aglablabes.
A. S., Estonia
No dadduma, maladingitanak no ibaga dagiti dadduma a kadaanan wenno nakaporpormal dagiti kawesko. Makaparegta unay ti artikuloyo agsipud ta pinasingkedanna a makagunggona ti panangsurot kadagiti prinsipio ti Biblia.
R. L., Brazil
Adun a tawen a no dadduma ket maasianak wenno maay-ayatanak kadagiti Saksi ni Jehova. Idi kuan, adda gayyem a nangted kaniak iti Pebrero 8, 1999 a ruar ti Agriingkayo! Makaparagsak unay ti panangbasak iti magasin ken binalbaliwanna ti panangmatmatko kadagiti Saksi. Ti nangnangruna a nakaallukoyak isu ti artikulo maipapan iti panagkawkawes, a nangdeskribir iti mismo a kababalinko no panaggatang iti kawes ti pagsasaritaan. Iti masanguanan, saanton a bin-ig a dagiti kawes a mabigbigbig ti etiketada ti ipangpangrunak. Ket kiddawekto iti gayyemko nga ikkannak iti ad-adu a pay a magasinyo a basaek!
U. B., Alemania
Dagiti Pestisidio Naragsakankam a dua ken baketko iti artikulo a “Saan Laeng a Dagiti Peste ti Paksiaten Dagiti Kemikal nga Pestisidio.” (Pebrero 22, 1999) Kas espesialista iti natauan nga ekolohia, pinadasmin a parmeken ti pannakasabidong daytoy daga. Makaliwliwa a maammuan nga adda tattao idiay Brazil, China, ken iti dadduma pay a pagilian a maseknan met ken adda makagunggona nga ar-aramidenda.
W. G., Canada
Panagtsismis Pagyamanan unay iti artikulo nga “Agimtuod Dagiti Agtutubo . . . Ania ti Pagdaksan ti Panagtsismis?” (Pebrero 22, 1999) Sumagmamano a tiempon ti napalabas, idi adda nangiwaras iti sayangguseng a siak ti sumaganad a mailaksid iti kongregasion, naamirisko a mismo nga anian a nagsaem ti ibunga ti panagtsismis. Makapasair unay dayta a pammardaya! Nagpadispensar ti nangitsismis, ngem napukawen ti panagtalekko kenkuana.
R. M., Switzerland
Gagangay ti panagtsismis idiay eskuelaanmi, isu a makaparegta ken makapabileg unay ti artikulo kaniak. Mabainak a mangibaga a nangitsismisak met idin tapno talaga a mapadakes dagiti dadduma. Ket idi pinadakes dagiti gagayyemko ti sabsabali, dimngegak ken nakipasetak pay iti saritaan. Isu nga idi binasak ti artikulo, naklaatak ken nariknak a balbalakadannak ti tunggal sasao maipapan iti ar-aramidek. Mabainak unay iti amin nga intsismisko. Ammok nga agtultuloyto ti panagtsismis idiay eskuelaanmi, ngem determinadoak a diakton makipaset iti dayta.
M. W., Japan