Manipud Kadagiti Agbasbasa

Danag Gapu iti Impormasion Binasak dagiti serye ti “Danag Gapu iti Impormasion​—Kasano nga Apektarannaka?” (Enero 8, 1998) Kunayo a ti kinaadu ti impormasion ket nalabit a gapu iti iyaadu dagiti damag ken magasin. Patiek a ti magasinyo ket mabalin a mairaman iti daytoy nga iyaadu ti impormasion. Saan kadi a kaso daytoy ti di nainkalintegan a panangbabalaw, tangay mapabasol met ti magasinyo iti iyaadu ti impormasion?

J. K., Estados Unidos

Imbutaktak dagiti seryemi ti panagadu dagiti “awan serserbina” nga impormasion. Sigurado a saan a mairaman ti “Agriingkayo!” iti daytoy, ta ti nakuna a panggepna ket ‘sukimaten ken ipaganetgetna ti pudno a kaipapanan dagiti agdama a pasamak.’ Imposible a maawagan nga awan serserbi ti kasta nga impormasion.​—ED.

Ni Maria ken ni Napagungar a Kristo Agsuratak tapno agreklamo maipapan iti artikulo iti “Panangmatmat iti Lubong,” a napauluan “Ni Maria ti Immuna a Nakakita iti Napagungar a ni Kristo?” (Enero 8, 1998) Impakitayo ti kinaignoranteyo kadagiti Kasuratan, a mangipasimudaag met iti kurang a panaginteresyo iti kinapudno. Adu dagiti banag a napasamak ken nadakamat a saan a naisurat iti Biblia. Basaenyo ti Juan 21:24.

J. G., Estados Unidos

Impadamag laeng ti artikulomi ti naisalaysay iti opisial a periodiko ti Vatican nga “L’Osservatore Romano.” Nadakamat sadiay a kinuna ni Pope John Paul II a ni Maria ti “nalabit immuna a tao a nagpakitaan ni napagungar a Jesus.” Nupay raemenmi ti kalintegan dagiti agbasbasa a mamati iti kayatda a patien, awan ngamin ti pammaneknek iti Biblia iti kasta a panangipapan.​—ED.

Dagiti Troubadour Ti artikulo a “Dagiti Troubadour​—Saanda Laeng a Kumakanta iti Samiweng ni Ayat” (Pebrero 8, 1998) ket maysa a naannad a panangusig iti papel dagitoy a kumakanta-mannaniw iti kagimongan idi edad media. Kas maestra iti literatura, inadalko dagiti Portugues a troubadour, ket tinulongannak ti artikuloyo a mangtarus iti daytoy artistiko a movimiento iti intero a kontekstona. Makaipaay kredibilidad iti magasinyo dagiti artikulo a kastoy ti kalidadna.

R. N. A., Brazil

Masapul nga aklonek a kasapulan ti panagregget tapno mairugi ti panangadal iti daytoy nga artikulo, ngem apaman a rinugiak, dagus nga inallukoyna ti interesko. Nangnangruna a naragsakanak a nangadal no siasino ti nangyun-una iti kustombre a “babbai pay nga umuna.” Awan ti kustombre iti Japan a “babbai pay nga umuna,” ngem ni lakayko a napadakkel kas maysa kadagiti Saksi ni Jehova, kanayon nga impakitanan ti kasta a kustombre sipud pay idi agnobiokamin. (Lima a tawenmin nga agassawa.) Maragsakanak unay.

Y. N., Japan

Crossword Puzzle Kayatko ti naimpusuan nga agyaman kadakayo kadagiti crossword puzzle. Paregtaendaka a mangala iti Bibliam ken mangsungbat iti nalaka ken nasaririt a pamay-an.

N. C., Italia

Panagkinnita Manen ti Agina Kasta unay ti pannakapikapikko iti artikulo a “Naisangsangayan a Panagsinnublianan.” (Pebrero 22, 1998) Para kaniak, dakkel ti epektona iti emosionko ti pannakaammok iti nagtaudak a pamilia. Di nagkallaysa da nanang ken tatangko. Sangkapanunotko idi ni tatangko, ngem ababa laeng ti sungbat dagiti saludsodko. Nabiit pay a dinamagko ken nanang no ania ti kompleto a nagan ni tatangko. Babaen ti panagusarko iti direktorio ti telepono, nasarakak ti ading ni tatangko, ket anian a siddaawko ta naammuak nga isu ket maysa kadagiti Saksi ni Jehova! Inlawlawagna a pimmusay ni tatangko idi 1980, ket pulos a di nagasawa. Nupay kasta, ni nanangko ken ni ikitko ti pudno a liwliwak iti tiempo a kasapulak dayta. Dagiti artikuloyo ket nagbalin met a paset iti proseso ti panagpaimbagko.

L. D., Estados Unidos